Қазақша рефераттар

Отбасы туралы баяндама

Ақшұқыр мектеп-лицейі

Мұғалімі: Нұржанова Гүлден

Сынып сағатының тақырыбы: «Отбасым – алтын діңгегім!» (7-сынып)

Отбасы — адамға бақыт пен толыққанды тыныс-тіршілік сыйлайтын құндылық. Отбасының басты қазығы, алтын діңгегі — бала. Баланың тәрбиелі, жан-жақты болып өсуіне берекелі, өнегелі, ынтымақты отбасының ықпалы ерекше.

Мақсаты

А) Отбасы құндылығы туралы түсініктерді кеңейту; отбасын сүйе білуге, отбасы игілігі үшін талмай еңбек етуге үйрету.

Ә) Отбасының өмірдің ұйытқысы екенін, оның киелі қасиетке ие болу сырын және отбасы тәлімінің мәнін түсіндіру.

Б) Отбасы тәрбиесінің мән-мағынасын ашып көрсете отырып, ұлттық салт-дәстүрді түсініп, құрметтеуге баулу және алдағы өмірге даярлау.

Сабақтың құрылымы

  1. I Ұйымдастыру кезеңі
  2. II «Шаттық шеңбері»
  3. III Сұрақ-жауап: «Отбасы» ұғымын түсіну
  4. IV Отбасы туралы баяндама
  5. V Әке және ана туралы баяндама, өлең шумақтары
  6. VI Топтық тапсырма: «Берекелі отбасы» схемасы
  7. VII Ұлағатты сөздермен танысу
  8. VIII Сурет арқылы Абай Құнанбайұлының қарасөздерін жатқа айту
  9. IX «Қызым, саған айтамын...» айдары
  10. X Отбасы туралы бейнеролик
  11. XI Сұрақ-жауап
  12. XII Көрініс: «Байлық, табыс, сүйіспеншілік»
  13. XIII Шығармашылық жұмыс: «Отбасы құндылықтары»
  14. XIV Толғаныс
  15. XV Сауалнама
  16. XVI Қорытынды

Кіріспе сөз

Жүргізуші: Сәлеметсіздер ме, құрметті ұстаздар, қадірменді ата-аналар мен оқушылар! «Отбасым – алтын діңгегім!» атты тәрбие сағатымызға қош келдіңіздер!

Отбасы ата мен баланың, келін мен ененің және өзге де отбасы мүшелерінің өзара жылы қарым-қатынасынан құралады. Отбасы берекелі, тату болуы үшін сыйластық, мейірімділік, жанашырлық және бауырмалдық әр адамның жүрегінен орын алуы қажет.

Отбасын құрғанда адам өмірге ұрпақ әкеліп қана қоймай, сонымен бірге оған жалпыадамзаттық және ұлттық құндылықтарды, ата-бабаның салт-дәстүрін жас ұрпақтың бойына сіңіреді.

Балаларын өздерін қоршаған ортаға және қоғамға пайдалы азамат етіп өсіру — ата-ананың ең маңызды міндеті. Халқымыз «Отан отбасынан басталады» дейді: елдің болашағы, даму деңгейі ең алдымен отбасындағы тәрбиеге байланысты.

«Шаттық шеңбері»

Оқушылар бүгінгі сыныпты — өзіміздің шағын отбасымыз деп қабылдап, оның бақытты екенін білдіру үшін шаттық шеңберін құрады. Әрқайсысы қолындағы жүректі келесі адамға ұсынып, өз есімінің бас әрпінен басталатын жылы сөз айтады.

  • «Мейірімді Мөлдірмін»
  • «Ізетті Інжумін»
  • «Ақылды Ақжарқынмын»

Сұрақ-жауап

Оқушылардың ой-пікірін ашу үшін төмендегі сұрақтар талқыланады:

Отбасы деген ұғымды қалай түсінесіңдер?

Отбасы деген не? Отбасы құрамы деген кімдер?

Отбасының адам өміріндегі маңызы қандай?

Отбасы туралы қысқаша баяндама

Отбасы — бірлесіп күн көретін, туыстық қатынастағы адамдар тобы. Ол балалар тәрбиесін жүзеге асырып, сондай-ақ қоғам тұрғысынан мәні бар қажеттіліктерді қанағаттандырады. Отбасы некелік немесе туыстық байланыстар арқылы құрылады.

Отбасының маңызды сипаты — оның қызметі, құрылымы және даму динамикасы.

Әке туралы

Әке — асқар тау. Болаттай берік, құрыштай қайсар әкенің өз перзентіне көрсетер үлгі-өнегесі мол. Ол отбасының, балалардың қамын ойлап, туған-туысқа қолдау көрсетеді.

Шығыс халқында: «Әкеден артық арман жоқ, әкеден артық қорған жоқ, әкеден артық дана жоқ, әкеден артық пана жоқ» деген ұлағатты сөз бар.

Өлең шумақтары

Асқар тау әкешім бар — сүйенішім,

Ізгілік, адалдықты сүйеді шын.

Қабақ шытса балалық қылығыма,

Ешқашан болмайды оған ренішім.

Ойлайды әрқашанда бала қамын,

Көремін аялаған алақанын.

Әкемнен алған асыл қасиетті,

Елімнің керегіне жаратамын.

Әкенің орны отбасында әрқашан айрықша.

Ана туралы

Ана — аққан бұлақ. Ана есіміне қатысты қасиетсіз дүние жоқ деуге болады. Сондықтан ананы ардақтамайтын халық жоқ.

Ана баланы тоғыз ай көтеріп, дүниеге әкеліп қана қоймай, көзінің қарашығындай қорғап, аялап өсіреді, өмірге бейімдейді.

Ы. Алтынсарин — «Ананың сүюі» (үзінді)

Кім сендерді, балалар, сүйетұғын,

Қуанышыңа қуанып, қайғыңа күйетұғын.

Түн ұйқысын төрт бөліп, кірпік қақпай,

Шешең байғұс дамылсыз жүретұғын.

Кім сендерді, балалар, тербететін,

Еркелетіп, ойнатып, сергітетін?

Жалқау болсаң, балалар, жаман болсаң,

Қамқор анаң көз жасын көлдететін.

Кім сендерді сағынар шетке кетсең,

Ғылым іздеп, тез қайтпай, көпке кетсең.

Ұмытпа, ең кемінде жұлдыз сайын,

Хат жазып тұр — ұмытпа, төбесі көкке жетсін.

Кім сағынар сендерді, келгеніңше,

Құлындарын көзімен көргенінше?

Сендер қайтып келгенде адам болып,

Еш арманым болмас дер өле-өлгенше.

Барша анаға тән осы мейірім — перзентке деген шексіз сүйіспеншіліктің айғағы. Ата-ананың үміті мен арманы баласымен бірге жасайды; бар тілегі — баланың амандығы мен абыройы.

Бала — отбасының алтын діңгегі

Бала — бауырдағы құрақ. Ата-ана — өмірдің тірегі, ал бала — сол өмірдің жалғасы. Баланың кісілік келбетін қалыптастыратын басты орта — өз үйі, өз ұясы.

Халқымыз: «Ұяда не көрсең, ұшқанда соны ілерсің» дейді. Сондықтан айналадағы адамдарды сыйлау — алдымен ата-ананы құрметтеуден басталады.

Әке-шешесін, бауырларын қадірлей алмаған адам өзгені де шынайы сыйлай алмайды.