Қазақша рефераттар

Құрметті ата - аналар, қымбатты оқушылар

Шығыс Қазақстан облысы, Аягөз ауданы, Мамырсу ауылы

«С. Ғаббасов атындағы жалпы орта білім беретін мектеп» КММ, математика пәнінің мұғалімі — Темиртаева Асель

Ойын-сайыс: «Менің отбасым және математика» (8–9 сыныптар)

Бұл іс-шара — оқушы, ата-ана және мектеп қауымдастығын бір арнаға тоғыстыратын, математиканы күнделікті өмірмен байланыстыра отырып қызықты форматта ұсынатын ойын-сайыс.

Мақсаты

  • Ата-аналарды балаларымен бірге мектепішілік іс-шараларға тарту.
  • Отбасы мүшелерін ортақ мақсатқа жетуге ынталандыру.
  • Қатысушылардың математикаға қызығушылығын арттыру.
  • Математикалық мәдениеттілікке тәрбиелеу.

Қатысушылар

Команда құрамы

Әкесі, шешесі, баласы және көмекші тобы.

Көмекші топ

Әр сыныптан 4 оқушы.

Жанкүйерлер

Сынып оқушылары, ата-аналар, сынып жетекшілері.

Әділқазылар

Мектеп әкімшілігі және мұғалімдер.

Бағалау ұстанымы

Әр кезеңде әділ бағалау үшін сайыс шарттары алдын ала дайындалып, әділқазылар алқасының қарауына ұсынылады.

Командалар

  • 8 «А» сынып

    Отбасы командасы

  • 8 «Ә» сынып

    Отбасы командасы

  • 9 «А» сынып

    Отбасы командасы

  • 9 «Ә» сынып

    Отбасы командасы

Сайыс барысы

Жүргізушілердің кіріспе сөзі

1-жүргізуші

Сәлеметсіздер ме, ата-аналар мен оқушылар! Нақты ғылымға қызығушылар — естігенін есте сақтап, оқығанын ойға тоқитындар.

2-жүргізуші

Сәлеметсіздер ме, ұстаздар! Сіз оқытқан оқушылардың және олардың отбасыларының сыналар сәті келді.

1-жүргізуші

Есепті түрлі тәсілмен шығарамыз, арасында ойын ойнап жарысамыз. Ойландыратын сұрақ та, қиын сұрақ та, әзіл есеп те бар.

2-жүргізуші

Ендеше, кешімізді бастайық. Әділ бағасын беретін әділқазыларды ортаға шақырамыз.

2-жүргізуші

Шын жүйрік шабысынан танылады. Нақты білім мен терең ой сыналар сәтте, әділқазыларға құрметпен қол соғайық.

Мұғалімнің құттықтауы және идеясы

Құрметті ата-аналар, қымбатты оқушылар! Бүгінгі кешіміз қызықты өтіп, тек оқушыларға ғана емес, ата-аналарға да әсері мен пайдасы тиеді деп сенемін. Математика — барлық ғылымдардың патшасы. Күнделікті өмірде математикасыз бір күніміз өтпейді.

«Менің отбасым және математика» тақырыбын таңдаудың себебі де осы: бала математика туралы алғашқы түсінікті көбіне отбасынан алады. Мысалы, анасы баласын дүкенге жұмсайды, әкесі тұрмыстық (ұсталық) жұмыстарға баулиды, анасы қызымен бірге киім тігіп, рецепт бойынша ас әзірлейді — мұның бәрі есептеу мен өлшеуді қажет етеді.

Қызықты түсіндірме

«Отбасы» сөзі орыс тіліндегі «семья» ұғымымен де түсіндіріледі: «семь» — жеті, «я» — мен. Яғни «мен жетеумін» деген мағынаға келеді. Қазіргі заманда жеті адамнан тұратын отбасы сирек болғандықтан, әр сыныптан 4 оқушы көмекші ретінде алынды.

Сергіту кезеңі: жедел сұрақтар

Ереже

Әр командаға кезекпен сұрақ қойылады. Жауапты мүмкіндігінше тез беру керек.

Ұпай

Дұрыс жауапқа — 1 ұпай.

Көмек

Егер команда жауап бере алмаса, жанкүйерлер көмектеседі. Бұл жағдайда 0,5 ұпай беріледі.

Сұрақтар мен есептер

Жауаптары жақша ішінде берілген

  1. 5 жыл бұрын ағасы мен қарындасы екеуі қосылып 8 жаста болды. Тағы 5 жылдан кейін екеуі қосылып қанша жаста болады? (18)

  2. Әкесі 30 жаста, баласы 5 жаста. Неше жылдан кейін әкесі баласынан 27 жас үлкен болады? (ешқашан)

  3. Ағасы 12 жасқа толғанда қарындасы неше жаста болады, егер ағасы қазір 8-де, ал қарындасы 3 жас кіші болса? (9)

  4. Бір адамнан: «Қанша балаң бар?» — деп сұрағанда, ол мысқылдап: «Қанша қызым болса, сонша ұлым бар. Әр ұлымда 3 қарындасы бар», — дейді. Бұл отбасында неше бала бар? (6)

  5. Перроның «Мальчик-с-пальчик» ертегісінде бір отыншының отбасында 7 ұл және әр ұлдың 7 қарындасы бар делік. Сонда бұл отбасында неше бала болған? (14)

  6. Бір отбасында 2 әке және 2 ұл бар. Отбасында неше адам бар? (3: ата, әке, немере)

  7. Әйел сыныптағы балалардың біріне: «Мен сенің анаңмын, бірақ сен маған ұл емессің», — дейді. Ол не айтқысы келді? (қызымсың)

  8. Бір азаматтың әкесі — Николай Петрович, ал оның ұлы — Алексей Владимирович. Ол азаматтың аты-жөні кім? (Владимир Николаевич)

  9. «Өмір бойы мен жалғыз өстім — бұл шындық, басынан аяғына дейін. Бірақ суреттегі адамның ұлы — менің әкемнің ұлы». Суретте кім бейнеленген? (менің әкем)

  10. Күйеуі мен әйелі және ағасы мен қарындасы 3 алма алып, тең бөліп алды. Әрқайсысы неше алмадан алды? (1)

    Түсіндірме: күйеуі мен әйелі — екі адам; ағасы мен қарындасы — екі адам емес, бір адам (әйелі — әлдекімнің қарындасы).

  11. Таяқтың екі басы бар. Егер оның бір жағын кессе, таяқтың неше басы қалады? (2)

  12. 20 метр матаны 10 бөлікке (әр бөлігі 2 метрден) бөлу үшін, неше рет кесу керек? (9)

  13. Әкесі мен ұлы ағашты 12 рет кесті. Қанша бөрене шықты? (13)

  14. Ойыншылар шахматты 4 сағат ойнады. Әрқайсысы неше сағат ойнады? (4)

  15. Ұлы, әкесі, атасы дойбы ойнады. Барлығы 3 партия ойналды. Әрқайсысы неше партиядан ойнады? (2)