Қазақша рефераттар

1725 жылдар Ақтабан шұбырынды

Тәуелсіздік — ұлттың ең қымбат қазынасы

Алтайдан Алатауға дейін созылған ұлан-ғайыр даланы мекендеген ата-бабамыз ғасырлар бойы азаттықты аңсады. Кең байтақ жерді найзаның ұшымен, білектің күшімен қорғап, ұрпаққа аманат етіп қалдырды. Сол аманаттың өтеуі жолында талай боздақ жанын қиды, талай жүрек жараланды.

Тәуелсіздік — бір күннің олжасы емес. Ол — талай ғасырлық күрес пен үміттің, шыдам мен намыстың жемісі. Бүгінгі бейбіт өміріміз сол жолда құрбан болған ерлер мен өрімдей жастардың қайсарлығымен келді.

Негізгі мақсат

Біз алдымызға анық мақсат қойдық: жақсы өмір сүру, еркіндікке ұмтылу, ең алдымен балаларымыз бен немерелеріміздің лайықты болашағын қамтамасыз ету. Осы мұрат жолында қоғам болып еңбек еттік. Еңбегіміз еш кеткен жоқ — бүгін Қазақстан әлемге танылған тәуелсіз мемлекетке айналды.

Тәрбие сағатының бағыты

Білімділік

Оқушыларды мемлекеттік рәміздермен таныстыру; әрбір нышанның мәніне үңілу; халқымыздың өткені мен бүгінін қысқаша шолу арқылы түсіндіру. Егемендікке жету жолында жазықсыз құрбан болған боздақтардың ерлігін терең ұғындыру.

Дамытушылық

Мемлекеттік белгілердің маңызын сезіндіру; оларды құрметтеуге, мақтан етуге баулу; ой-өрісті кеңейтіп, елжандылық пен ұлттық дәстүрді қадірлеу сезімін дамыту.

Тәрбиелік

Отанды сүюге, адамгершілікке, әдептілікке тәрбиелеу; ел мен жердің қадір-қасиетін ұғындырып, туған жерге адал қызмет ету жауапкершілігін қалыптастыру.

Ерлік — елдіктің өлшемі

Ел қорғау — ұрпақтан ұрпаққа жалғасқан қасиетті ұран. Қаракерей Қабанбай, Қанжығалы Бөгенбай сынды баһадүрлерден бастап, Исатай мен Досан, Шотан батырлар, беріректе Бауыржан Момышұлы, Мәншүк Мәметова, Әлия Молдағұлова — барлығы да ұлт намысын ту етіп көтерген тұлғалар.

Ал 1986 жылғы Желтоқсан оқиғасы — ұлт рухын әлемге танытқан тарихи белес. Сол күндері Қайрат Рысқұлбеков, Ләззат Асанова, Ербол Сыпатаев сияқты қыршын жастардың қайсарлығы тәуелсіздікке бастаған жолды жақындатты. Олардың есімі — ел жадында.

Тағзым

Желтоқсан құрбандарының рухына құрмет — біздің азаматтық парызымыз. Тәуелсіздік үшін жанын қиған әрбір ердің есімі ұмытылмайды.

Тарих — азаттыққа бастар жол

Азаттық үшін күрес жолы ұзақ әрі ауыр болды. Бұл күрес бір мезетке ғана созылған жоқ — талай ғасырлық арпалыстың шежіресі тарих беттерінде қатталды.

Маңызды тарихи кезеңдер

Халық жадында сақталған ауыр сындар мен бетбұрысты оқиғалар

  • 1723–1725 «Ақтабан шұбырынды, Алқакөл сұлама»
  • 1836–1838 Ішкі Бөкей ордасындағы көтеріліс
  • 1837–1847 Кенесары Қасымұлы бастаған ұлт-азаттық қозғалыс
  • 1916 Амангелді Иманов бастаған ұлт-азаттық көтеріліс
  • 1932–1933 Ашаршылық
  • 1936–1938 Саяси қуғын-сүргін
  • 1941–1945 Ұлы Отан соғысы
  • 1986 Желтоқсан оқиғасы

Тәуелсіздік жылдарындағы белестер

Тәуелсіздік жарияланғаннан кейін қысқа уақыт ішінде ел өмірінде жаңа дәуір басталды. Мемлекеттік институттар қалыптасты, халықаралық байланыстар нығайды, ұлттық нышандар бекіді, елдің келбеті мен мүмкіндігі кеңейді.

Мемлекеттілік негіздері

  • 1991, 16 желтоқсан: Қазақстан тәуелсіз мемлекет болып жарияланды.
  • 1992: БҰҰ-ға мүше болды; 4 маусымда мемлекеттік рәміздер қабылданды.
  • 1993: Тұңғыш Конституция қабылданды; ұлттық валюта — теңге енгізілді.
  • 1995, 30 тамыз: Жаңа Конституция қабылданды.
  • 1996: Екі палаталы Парламент өз жұмысын бастады.
  • 1997: Астана елорда мәртебесіне ие болды; «Қазақстан–2030» стратегиясы жарияланды.

Әлемге ашылған Қазақстан

  • 1991: Семей ядролық полигоны жабылды.
  • 1991, 2 қазан: Тоқтар Әубәкіров ғарышқа ұшты.
  • 2006: Жаңа Әнұран қабылданды.
  • 2010: Қазақстанда халықаралық саммит өтіп, ел беделі артты.
  • 2012–2014: Олимпиададағы жеңістер; EXPO-2017 өткізу құқығы жеңіп алынды.
  • 2015: Қазақ хандығының 550 жылдығы; ДСҰ-ға мүшелік; Айдын Айымбетовтің ғарышқа ұшуы.

Түйін

Аз уақыттың ішінде Қазақстанның еңсесі көтерілді: көк байрағымыз желбіреді, Әнұранымыз асқақтады, Елтаңбамыз шаңырақтай ұйыстырды. Елордамыз жаңарып, ел келбеті әлемді мойындатты.

Тәуелсіздік — жауапкершілік

Туған жерге адалдық

  • Туған жерді сүю — парыз.
  • Сүю үшін білу — парыз.
  • Қасиетін ұғу — парыз.
  • Күзетіне тұру — парыз.

Тілегіміз

Тәуелсіздік мерекесі құтты болсын! Еліміздің керегесі берік, жұртымыз тату, жеріміз тыныш болсын. Ұлан-байтақ Отанымызды ешбір жау аттамай, әр шаңыраққа береке мен бейбітшілік орнасын.