Өзін - өзі тану пәні сабақ жоспары 8 сыныпТақырып

Өзін-өзі тану пәні: 8-сынып сабақ жоспары

Тақырып

Ар-ұждан – адамдық өлшемі

Құндылық

Қиянат жасамау

Қасиеттер

Әділеттілік
Оймен, сөзбен немесе іспен тірі жанға зиян келтірмеу
Жақсы азамат болу

Сабақтың мақсаты

Оқушыларға ар-ұждан, ұят, абырой ұғымдары туралы дұрыс әрі жағымды көзқарас қалыптастыру. Осы арқылы «қиянат жасамау» құндылығының мәнін ашу.

Сабақтың міндеттері

Адам өміріндегі ар мен ұжданның мәнін ашып, олардың адам өмірін реттеуші, адами әділеттілік қасиеттердің өлшемі екенін таныту.
Оймен, сөзбен немесе іспен тірі жанға зиян келтірмеу үшін өз әрекетіне, мінез-құлқына талдау жасап, өзіндік бағдарын анықтай алу мүмкіндігін дамыту.
Ар тазалығына жету жолында өз әрекетін талдап, кемшілігін танып, жан сұлулығын сақтай отырып, әділеттілікке, қиянат жасамауға және жақсы азамат болуға тәрбиелеу.

Сабақ барысы

Төмендегі кезеңдер сабақтың мазмұнын бірізді түрде ұйымдастыруға көмектеседі: тыныштық сәті, талдау, үй тапсырмасын тексеру, дәйексөз және әңгіме арқылы ой қозғау.

1) Ұйымдастыру кезеңі

Тыныштық сәті: «Орманға ойша серуен»

Арқаңызды тік ұстап, ыңғайланып отырыңыз. Көзіңізді жұмып, терең тыныс алыңыз. Әр тыныс алған сайын бойыңыздың босаңсып, сабырлануына мүмкіндік беріңіз.

Енді орманға серуенге шығамыз деп елестетіңіз. Сынып есігіне жақындап, есікті ашып дәлізбен өтіп, далаға шыққаныңызды көз алдыңызға келтіріңіз. Таза ауаны жұтыңыз. Шашыңызды жел тербегенін, бетіңізге күн сәулесі жылы тиіп тұрғанын сезініңіз.

Орманға қарай жүре бастаңыз. Аяғыңызды абайлап басыңыз: жәндіктерді басып кетпеңіз. Бір сәтке тоқтап, айналаға көз салыңыз. Табиғаттың әсемдігі мен балғындығын сезініңіз.

Ескерту

Жаттығуды баяу әуенмен орындауға болады.

Талдау сұрақтары

1 Тыныштық сәті кезінде қандай көңіл күйде болдыңыз?
2 Қандай сезім пайда болды?
3 Нені елестете алдыңыз?

Үй тапсырмасын тексеру

Оқушылар құрастырған ар-ожданды бейнелейтін бейнебаяндар жинағын қарап, қысқаша пікір алмасу.

2) Дәйексөз

«Ар-ождан алдындағы адалдық өз қадір-қасиетіңе, ізгі іс-әрекетіңе байланысты.»

Әбу Нәсір әл-Фараби

Қайталау тәртібі

Мұғалім 1 рет оқиды.
Ұлдар 1 рет қайталайды.
Қыздар 1 рет қайталайды.
Барлығы бірге 1 рет қайталайды.

3) Мұғалімнің сыйы: «Бозорамал» (П. Джон)

Автобус аялдамасында ешкімді елеместен, мұңға батып жалғыз жігіт отыр. Жолаушылардың кейбірі оған қарап өтсе, енді біреулері мүлде назар аудармайды. Жігіттің олармен тілдесуге мұршасы жоқ: ол терең ойға батқан.

Ол өткен өмірін қайта-қайта есіне алды. Жиырма жылдай бұрын көрші көшедегі қызыл кірпіш үйде дүниеге келіп, бақытты балалық шағын өткізген еді. Ол үй қазір орнында жоқ та шығар, бірақ ауласындағы қызыл-жасыл гүлдер қалуы мүмкін. Сол гүлдер жігіттің есінен бір сәт те шықпайтын.

Үйдің жанында әкесі өз қолымен жасап берген әткеншек, өзі алғаш велосипед тебуді үйренген бақтағы жалғыз аяқ жол — бәрі-бәрі есінде. Ата-анасы сол велосипедті бірнеше ай бойы еңбекақыларын жинап жүріп алып берген еді.

Араға оншақты жыл салып, велосипедін мопедке ауыстырды. Жасөспірім шақта ол ата-анасына сирек көрінетін болды: өзі ақша таба бастады, достары көбейді. Бірте-бірте ата-анасы оған «өмірден қалып қойғандай» көрініп, достарымен сауық кештерде уақыт өткізу әлдеқайда қызығырақ сезілді.

Ой түю

Әңгіме адамның ішкі ар-ұжданымен бетпе-бет келетін сәттерді еске салып, таңдаудың жауапкершілігін көрсетеді.

Негізгі сұрақ

Ар-ұждан адамды қандай жағдайда тоқтата алады, ал қандай кезде әрекетке жетелейді?

Құндылықпен байланыс

Қиянат жасамау — ойда, сөзде және істе зиян келтірмеуді таңдау арқылы ар тазалығын сақтаудың жолы.

Мәлімет

Мектеп: №2 Қазанбасы орта мектебі
Мұғалім: Абузара Г. С.