Бүгінгі Білім кілті - кітапта атты тәрбие сағатына қош келдіңіздер
Сабақтың тақырыбы: «Білім көзі – кітапта»
Бұл тәрбие сағаты кітаптың білім мен тәрбиенің басты кілті екенін ұғындыруға арналған. Оқушылардың кітапқа қызығушылығын арттыру, оны ұқыпты әрі таза ұстауға баулу көзделеді.
Мақсаты
Білімнің кілті кітап арқылы берілетінін түсіндіру; кітаптың адам өміріндегі маңызын ашу; оқу мәдениетін қалыптастыру.
Көрнекілігі
- Кітап суреті
- Қанатты сөздер жазылған плакат
- «Біздің кітапхана» атты кітап көрмесі
Сабақтың кезеңдері
- 1. Ұйымдастыру
- 2. Негізгі бөлім
- 3. Әнұран орындау
- 4. Кіріспе: тақырып пен мақсатты таныстыру
Кіріспе сөз
Құрметті қонақтар мен оқушылар! 3 «Д» сыныбындағы «Кітап — біздің досымыз» атты тәрбие сағатына қош келдіңіздер!
Кітап — білімімізді молайтатын, өнеге мен тәрбие беретін рухани қазына. Оны оқыған сайын адамның ішкі жан дүниесі байып, ой-өрісі кеңейеді. Кітап бізді өмірмен, табиғатпен, адам еңбегімен, құрбы-құрдастармен таныстырады. Жақсылыққа жетелейтін, ізгі іске құлшындыратын ең сенімді құрал — кітап.
«Білім кілті — кітапта» тақырыбындағы тәрбие сағатын Ахмет Байтұрсынұлының кітап туралы өлең жолдарымен бастайық.
Балалар, бұл жол басы — даналыққа,
Келіңдер, оқып, байқап қаралық та.
Бұл жолмен бара жатқан өзіңдей көп,
Соларды көре тұра қалалық па?
Даналық — өшпес жарық, кетпес байлық,
Жүріңдер, іздеп тауып алалық та!
Тәрбие сағатының барысы
1-жүргізуші
Армысыздар, құрметті қонақтар мен оқушылар! Бүгінгі «Білім кілті — кітапта» атты тәрбие сағатына қош келдіңіздер!
Мұзафар атамыз: «Кітап та алма ағашы — жемісін біздер теретін», — деп жырлағандай, әдеби кітаптар мен оқулықтар — білімнің қайнар көзі, рухани қазынамыз.
2-жүргізуші
Балалар, онда ортамызға қымбатты досымыз — кітапты шақырайық.
Кітап
Бәрекелді, мың рақмет, балалар! Сәл кешігіп қалдым, кешіріңіздер. Мен сіздерге үлкен қуанышпен келдім және сендермен дос болып қайтамын деп сенемін.
Қош келдіңіз, қымбатты досымыз! Жоғары шығыңыз.
Көп әңгімем, көп өлеңім,
Күнде ақыл беремін.
Жақсы көрсе мені кім,
Мен де оны жақсы көремін.
Бұл не, балалар?
Жауабы: Кітап.
«Кітап» сөзінің төркіні мен мәні
Ендеше, әңгімеміздің өзегі — кітап. Кім біледі: «кітап» сөзі қайдан шыққан, қандай мағына береді?
1-оқушы
«Кітап» — араб сөзі, «жазба» деген мағынаны білдіреді, ал түрік тілінде «дәптер» ұғымына жақын. Кітап — рухани қазына, байлық, өмір айнасы, заман сыры, тарих шежіресі, оқу мен тәрбиенің құралы. Ертеде кітап жазу құпиясын тек дінбасылар мен монахтар ғана білген.
2-оқушы
Сондықтан дүние жүзіндегі тұңғыш кітаптардың қатарына Еврей еліндегі «Таурат», Қытайдағы «Конфуций» еңбектері, парсы тіліндегі «Авеста», араб тіліндегі «Құран» жатады.
Кітаптың қадірі және халықаралық күндер
Кітап — атадан қалған асыл мұра, көненің көзі, ескінің сөзі. Ол — мәңгілікке сапар шеккен құнды ескерткіш. Мұхтар Әуезовтің сөзімен айтқанда, кітап — әр адамның өмірлік досы.
ЮНЕСКО шешімімен 1972 жыл халықаралық кітап жылы деп жарияланды. Ал 1995 жылдан бастап 23 сәуір — Дүниежүзілік кітап күні ретінде аталып өтеді. Бұл күн Ресей, Германия, Америка сияқты елдерде кең көлемде ұйымдастырылады.
Кітап қалай жасалады?
3-оқушы
Кітап жасау үшін көп еңбек қажет. Алдымен орманнан ағаш кесіледі, ол фабрикаға жеткізіледі. Фабрикада ағаш қағазға айналады. Содан кейін авторлар мәтін жазады, суретшілер иллюстрация салады. Баспаханада жазулар мен суреттер кітап болып басылып шығады.
4-оқушы
Кітап жасқа да, кәріге де қажет. Ол дүниетанымды кеңейтеді, рухани әлемді оятады. Ертегі мен әңгіме сыр шертетін, әрдайым бағыт беретін ақылшы — кітап.
Қазақ кітап баспасының қалыптасуы
5-оқушы
Қазақ кітап баспасы Ресей құрамына енгеннен кейін жүйелі түрде қалыптаса бастады. Тұңғыш кітаптар 1800 жылдан бастап жарық көрді.
6-оқушы
Алғашқы кезде кітап шығару ісі қолмен атқарылды. Кейін әріп теретін және кітап басатын машиналар ойлап табылды. Қазіргі уақытта кітап басу үдерісі толықтай механикаландырылған.