Қазақша рефераттар

Қыс мезгілінің суреттері

Сабақ туралы қысқаша мәлімет

Білім беру салалары
Қатынас, Таным, Шығармашылық
Оқу іс-әрекеті
Көркем әдебиет
Тақырып
Қыс
Мақсаты
Қыс мезгілінің ерекшеліктерін балаларға түсіндіру, қысқа деген қызығушылығын арттыру, табиғатты бақылауға және қорғауға тәрбиелеу.
Сөздік жұмыс
жасқанбаймын, шаттана
Көрнекіліктер
Қыс мезгілін бейнелейтін суреттер

Оқу іс-әрекетінің барысы

1) Ұйымдастыру кезеңі

Балалар шаттық шеңберіне тұрып, өлең шумақтарын бірге айтады:

Біз қандаймыз, қандаймыз,

Шұғылалы таңдаймыз.

Жарқыраған күн дейміз,

Ренжісуді білмейміз.

Тәрбиеші балаларды мадақтап, орындарына жайғасуын сұрайды.

2) Өткен тақырыпты еске түсіру және сұрақ-жауап

Тәрбиеші өткен оқу іс-әрекетін еске түсіріп, балалардың жауаптарын тыңдайды. Одан кейін төмендегі сұрақтар қойылады:

  • Қазір жылдың қай мезгілі?
  • Қыс мезгілі неше айдан тұрады?
  • Қыста қар неге жауады?
  • Қардан не жасауға болады?

Балалар бүгінгі ауа райын бақылап, табиғат күнтізбесіне қарайды. Тәрбиеші жауаптарды тыңдап, толықтырады.

3) Дәптермен жұмыс: өлең жаттау

Ә. Табылдының «Қыс» өлеңін жаттау ұсынылады:

Жас ұланмын шыныққан,

Жасқанбаймын суықтан.

Қардан жасап аққала,

Сырғанаймыз шаттана.

Назар аударатын сөздер

жасқанбаймын — қорықпаймын, тайсалмаймын; шаттана — қуана, мәз болып.

4) Сергіту сәті: «Аққала жасап көрейік»

Тәрбиеші балаларға сұрақ қояды: «Сендерге аққала соққан ұнай ма? Аққаланы неден соғамыз?» Содан кейін қимыл-қозғалыс арқылы аққала жасау кезеңдері орындалады:

  1. 1 Қарды жинаймыз.
  2. 2 Домалақтап, тағы бір қар кесегін жасаймыз.
  3. 3 Дайын домалақтарды бірінің үстіне бірін қоямыз.
  4. 4 Қолын, көзін, мұрнын, аузын жасаймыз.
  5. 5 Аққаламыз дайын!

5) Қимылды ойын: «Қар жинау»

Ойын шарты

Балалар екі топқа бөлінеді. Ортаға екі топқа да тең мөлшерде «қар» үйіледі. Белгі берілгенде әр топ өз шелегін қармен толтыруы керек.

Ойын соңында жеңімпаз топ мадақталады.

6) Дәптермен жұмыс: жұмбақ

Жұмбақтың шешуін табайық:

Шанамен зырлап желетін,

Шаңғы, коньки тебетін,

Аққала жасап ойнайтын,

Қай мезгіл деп ойлайсың?

Жауабы

Қыс мезгілі

7) Дидактикалық ойын: «Аққаланы құрастыру»

Ойын шарты

Алдын ала қиылып дайындалған аққаланың бөліктерін тақтаға апарып, ретімен орналастыру керек. Балалардың көздері байланады. Ойын осылайша жалғасады.

Қорытынды

Сабақ соңында тәрбиеші балалармен бірге қыс мезгілі туралы қорытынды әңгіме жүргізеді. Төмендегі сұрақтар арқылы білімдері бекітіледі:

  • Қыс мезгілінің қандай ерекшеліктері бар?
  • Қыс айларында қандай мерекелер болады?
  • Қыс мезгілі сендерге несімен ұнайды?
  • Қардан тағы не жасауға болады?

Балалардың жауаптары тыңдалып, жақсы жауап берген балалар мадақталып, бағаланады.