Итті күшігім десең, Аузыңды жалар

Итті күшігінде үйрет.

Иесін сыйлағанның итіне сүйек сал.

Сыпайының итіне кет дегенің — өзіне кет дегенің.

Итті қонақ жараспас.

Қатын көп болса, шөмішті ит жалайды.

Ауыл итінің құйрығы қайқы.

Жаман иттің атын бөрібасар қояды.

Ауылы жақын ит қасқырдан қорықпас.

Иесі үйге қайтса, иті де оралады.

Хасанның иті
Асанның үйінен ас ішіп,
Бошанның үйін қориды.

Кәрі ит шоқиып отырмаса, үре алмайды.

Итпен ойнасаң — үрерсің,
Баламен ойнасаң — күлерсің.

Боранды күні бала құтырар,
Желді күні ит құтырар.

Қызды ауылдың иті жатпас.

Сөйлей білмеген кісіден,
Үре білген ит артық.

Ит — жеті қазынаның бірі.

Есіктен ергенек кетсе,
Иттен иба кетеді.

Жеңген ит желкесінен талайды.

Аш иттің құйрығын
Сұқ ит жалайды.

Иттің құны — бір күшік.

Иттің басын алтын табаққа салсаң
Шоршып түсер.

Қазаннан қақпақ кетсе,
Иттен ұят кетеді.

Иттің ұлығанын бөрі есітпес.

Ит те киімге қарап үреді.

Ит аузы тигенмен
Дария суы арам болмас.

Итін жамандасаң,
Иесіне тиеді.

Ит үрген жерде ауыл бар.

Итке темір не керек?

Көп жортқан ит
Күшәлаға кездеседі.

Ит баласы жүре азар.

Ысқырған жылан шақпайды,
Үреген ит қаппайды.

Қырсыққанның иті қырын жүгіреді.

Жақсы ит өлігін көрсетпейді.

Сүйекпен ұрған ит қыңсыламайды.

Қойға қасқыр шапса,
Ит семіреді.

Итті иесімен қина.

Ит ұяласынан қорықпас.

Итті күшігім десең,
Аузыңды жалар.

Алжыған төбет айға қарап үреді.

Ит итті жұмсайды,
Ит құйрығын жұмсайды.

Түлкі алған итте сын болмас.

Табаны қышыған ит керуенге өреді.

Ақ ит, қара ит, бәрі бір ит.

Иттің жатқан жері — төсегі.

Иттің ішіне сарымай жақпайды.

Итті тепсең — ырысыңды тебесің.

Ит әлі жеткенін талар.

Ит қорыған жерге өш.

Жаман күшіктің атын
Бөрібасар қояр.

Итке үкі жараспайды.

Ит арық болса
Ауылдың намысы.

Балықта бата жоқ,
Итте ата жоқ.

Қажып жүрген адамға,
Қарсы алдынан шыққан ит,
Қасқыр болып көрінер.

Жұрттың жүргені басылмай
Иттің үргені басылмас.

Ит десең ашуланып, күшік десең күледі.

Көп жорытқан ит, күшәлаға жолығады.

Жарамсақтанған ит жатқанша таяқ жейді.

Қарақұрт жеп қой семіреді,
Қансоқта жеп ит семіреді,
Пара жеп би семіреді.

Жаужұмыр жақсы болса,
Итке тастар ма еді.

Ит дегенге ашуланып,
Күшік десең күледі.
Жақсы ат жанға серік,
Жақсы ит малға серік.

Қостың кішісі болғанша,
Иттің күшігі бол.

Итті тепкен, ырысты тебеді.

Ит құтырса — иесін қабады.

Өлі бөріден ит аттамас.

Ауыл иті ала болса да,
Бөрі келгенде бірігеді.

Ел қонбай, ит тынбас.

Ит бір сүрінсе, қырық сүрінеді.

Жақсы ит иесінің көз - құлағы.

Ит атасын танымас.

Оңбағанның иті ұры кеткен соң үреді.

Жоны қашқан итке өлексе жоламас.

Ит жеңгенін талайды.

Байлаулы ит үреген,
Байлаусыз өгіз сүзеген.

Бір ит көріп үреді,
Екі ит еріп үреді.

Бұралқы ит үріп жағынады.
Жақсы ит өлімтігін көрсетпес.

Ит иттігін қылмай қоймас.

Итке ит жерошақтың басында ұшырасады.

Ит жемес асынан дәметеді.

Қазаныңнан қақпақ кетсе,
Иттен қанағат кетер.