Сандар құрамын айту

Тақырыбы: 5 саны мен цифры

Мақсаты

Оқушыларды 5 саны және 5 цифрымен таныстыру, өткен сабақты толықтыру.

Дамытушылық

Тура және кері санау дағдыларын, есептеу мен есте сақтау қабілеттерін дамыту.

Тәрбиелік

Оқушыларды жылдамдыққа, тапқырлыққа, достыққа және өзара көмек көрсете білуге тәрбиелеу.

Көрнекіліктер

Сандар қатары
Санау материалдары
Геометриялық фигуралар
Ойынға қатысты суреттер

Сабақ түрі

Ойын-сабақ.

Сабақ барысы төмендегі кезеңдер арқылы ұйымдастырылады: ұйымдастыру, үй жұмысын тексеру, сергіту сәті, жаңа материал, дәптермен жұмыс, ойын, қорытындылау, үй тапсырмасы.

Сабақ барысы

I. Ұйымдастыру

1) Жылулық шеңбері

Балалар бір-біріне жылулық сыйлап, шеңбер бойымен жүріп, тақпақты хормен айтады:

Шашы – алтын, көзі – от,

Шыға ғой, Күн, тезірек.

Шуақ берші, жылу бер,

Маған да, оған да, досыма,

Тағы, тағы, тағы да!

II. Үй жұмысын тексеру

1) Ауызша санау

1-ден 10-ға дейін тура және кері санау:

Тура санау

1, 2, 3, 4, 5, 6, 7, 8, 9, 10

Кері санау

10, 9, 8, 7, 6, 5, 4, 3, 2, 1

2) «Кім тапқыр?» ойыны

Оқушылар өздеріне таныс цифрлар мен арифметикалық таңбаларды атап көрсетеді:

1 2 3 4 + − = < >

3) «Өз орныңды тап!» ойыны

Тура және кері сандар қатарын көрсету:

Тура

1, 2, 3, 4

Кері

4, 3, 2, 1

4) «Көршісін тап!» ойыны

Берілген санның көршілерін (бір кем және бір артық) табу арқылы бекіту жұмысы жүргізіледі.

Мысал: 4 санының көршілері — 3 және 5.

5) «Сан ойла, тез ойла!» ойыны

Сандардың құрамын айту, бос орынға тиісті санды қою:

2 = 1 + __

3 = 2 + __

4 = 3 + __

4 = __ + 3

3 = 1 + __

4 = __ + 2

III. Сергіту сәті

Шаршағанда ырғалып,

Гүлге ұқсап демалам.

Қанатымды бір қағып,

Гүлдей болып жайқалам.

IV. Жаңа материал: 5 саны мен 5 цифры

Өрнек құрастыру (әңгіме)

Аулада 4 балапан жайылып жүр еді. Оларға тағы 1 балапан келіп қосылды. Аулада неше балапан болды? (5)

Өрнек:

4 + 1 = 5

5 цифрымен таныстыру

5 санының қалай шыққанын түсіндіру
Өрнекті жазу және оқу: 4 + 1 = 5
5 цифрының жазылу үлгісін көрсету

М. Қуанышбеков — «Бес саусақ»

Ал, санайық, саналық,

Саусақтарға қарап-ақ.

Қане, қане, саналық,

Санын біліп алайық:

Біреу, екеу, үшеу, төртеу, бесеу,

Қолымдағы саусағым нешеу? (5)

5 саусақтың атаулары

Бас бармақ Балаң үйрек Ортан терек Шылдыр шүмек Кішкене бөбек

V. Әліппе-дәптермен жұмыс

1) 5 цифрын үлгіге қарап саусақпен бастыру, кейін ауада жазып үйрену.
2) 5 цифрын дәптерге жазу.
3) Геометриялық пішіндерді сәйкес санына байланысты бояу.

VI. Сергіту сәті

Біз жаздық, біз жаздық,

Саусақтарды қозғадық.

Бір, екі, үш,

Демаламыз жинап күш.

VII. Ойын: «Қарлығашқа көмектесейік»

Қораптарға түймелерді пішіндеріне қарай сұрыптап жинастырамыз. Тапсырма орындау барысында оқушылардың мұқияттылығы мен жылдамдығы дамытылады.

VIII. Қорытынды (сұрақ-жауап)

Сабақ сұрақ-жауап арқылы қорытындыланады: «Біз бүгін не білдік?»

5 саны мен 5 цифрының жазылуы
Тура және кері санау
5 санының құрамы және қарапайым өрнек: 4 + 1 = 5

IX. Үй тапсырмасы

5 саны мен 5 цифрын қайталау: жазу үлгісін пысықтау, тура және кері санауды жаттықтыру.