Ұзынына кім жетер

Дүниеде бір дария, беті қайтқан,
Бетінде бетегесі шығып жатқан.
Қарасаң, сол құдыққа көз жетпейді,
Құр қалмас сол құдықтың дәмін татқан.

Жауабы: Оқу, білім

Сай бойында сары алтын.

Жауабы: Білім

Ауыр-ақ, бірақ түсер салмағы жоқ,
Артқанның арып, кейін қалғаны жоқ.
Арқалап бірін қоймай көтергеннің
Аяғы ешқашан талғаны жоқ.

Жауабы: Білім

Теңіздей түбі терең,
Сүңгіген жетер әрең.

Жауабы: Білім

Ақыл-ойдың шырағы,
Зәулім көктей шынары.
Биігіне бойлаған,
Қанбайды адам құмары.

Жауабы: Білім

Ұзын-ұзын ұсқауын,
Ұзынына кім жетер?
Шұбар ала күйкентай,
Шұбарына кім жетер?

Жауабы: Кітап

Бір қобди дүниежүзін бағалаған,
Әсемдеп, талай адам қамалаған.
Қобдидың ашылмайтын кілті өзінде,
Ашылса, табылар еді не қалаған.

Жауабы: Білім, кітап

Жапанда бір нәрсе бар, аузы жабық,
Ашылар мезгілінде бауыры жазып.
Ішінде толып жатқан қазынасы бар,
Қорек қып пайдаланар тамам халық.

Жауабы: Кітап, оқу

Қабат-қабат қатталған,
Асыл сөзбен апталған.
Парағы бар сөйлейтін,
Ол — қазына өлмейтін.

Жауабы: Кітап

Бар білімнің бастауы,
Бар ғылымның бастауы.
Жас балаға нұр шашқан,
Қандай кітап тіл ашқан?

Жауабы: Әліппе

Білімнен мол сый-асы,
Балғындардың ұясы.

Жауабы: Мектеп

Білімнің жолбасшысы,
Шәкірттің қолбасшысы.

Жауабы: Мұғалім

Шәкіртке жанашыр, мейірман кім, жаны асыл?

Жауабы: Ұстаз

Білімнің дәнін тереді,
Балаға тәлім береді.

Жауабы: Ұстаз

Сағат сайын қағылады,
Тек мектептен табылады.

Жауабы: Қоңырау

Күміс алмұрт тілі бар,
Сыңғырлаған үні бар.
Шақырады білімге,
Сағаты бар, күні бар.

Жауабы: Қоңырау

Ұшымен қазық,
Торкөзді жазық.
Үстіне өттім,
Асыл сөз жазып.

Жауабы: Дәптер

Кішкене құдықтан
Найза ұшты шыбығым,
Су ішіп құныққан.

Жауабы: Сиясауыт

Қабы сояу,
Діні — бояу.

Жауабы: Қарындаш

Қысқа таяқ діңі бар,
Шиырлаған ізінде
Сайрап тұрар тілі бар.

Жауабы: Қарындаш

Тіл жоқ өзінде,
Сөзі бар ізінде.

Жауабы: Қаламсап

Бар ойыңды жинаймын,
Ақ қағазға құямын.

Жауабы: Сия

Бөлінгенді табыстырып,
Біріктірсе қабыстырып.
Жымдастырған жігітті,
Байқамайсың түгін де.

Жауабы: Желім

Жұқа тақтай бөлшегі,
Ұзындықтың өлшемі.

Жауабы: Сызғыш

Көкқұтанша ақ айдында,
Бір аяқпен тұрады.
Тұмсығымен ол мұнда,
Шыр айналып шығады.

Жауабы: Циркуль

Оқу — білім аспабы,
Қоймасының бас қабы.
Бөлмесі де бірнешеу,
Тиегі бар ашпалы.

Жауабы: Сөмке

Үстінде есігі,
Өзі орындық әрі үстел,
Оқушылар бесігі.

Жауабы: Парта

Ілулі тұр кең алаң,
Керегімді мен одан.
Жазып алам көшіріп,
Сүртем сосын өшіріп.

Жауабы: Тақта

Доп сынды келбеті,
Онда бар түп-түгел
Әлемнің әлпеті.

Жауабы: Глобус

Елдері мен қаласы,
Ойпаты мен даласы.
Теп-тегіс тақтай-ды,
Өзені де ақпайды.
Тоғайы мен тауы бар —
Бұл не, өзің тауып ал.

Жауабы: Карта

Қаласы бар, елі жоқ,
Даласы бар, шөбі жоқ.
Мұхиты бар, суы жоқ,
Орманы бар, нуы жоқ.
Шыңдары да теп-тегіс,
Кең жазықтан әр түсті.
Шығыс пенен батысты —
Бар әлемді табасың,
Өзің таң боп қаласың!

Жауабы: Географиялық карта

Бірін-бірі қоштаған,
Бір үйден көрдім
Қырық екі дос-жаран.

Жауабы: 42 әріп

Қырық екі жауынгер,
Сапын түзеп тұрады.
Бұлбұлшындай қауымды ел,
Сырын терең ұғады.

Жауабы: Әліпби

Білім менен тәлім
Парақты ашқанда,
Беттерінен мәлім.

Жауабы: Күнделік

Оқушыға күнде еріп жүретін не?

Жауабы: Күнделік

Оқуыма төреші,
Тоқуыма төреші.
Парақтасам байқалар —
Білімімнің өрісі.
Онда және жазылған,
Кестем де бар келесі.

Жауабы: Күнделік

Шәкірт кездегі,
Білімнің безбені.

Жауабы: Баға

Мектептің алтын орағы,
Зейінділер одағы.
Жақсы көрер бар бала,
Зерекке дос ол-дағы.

Жауабы: Бестік