Қазақша рефераттар

Тәрбие сағатының кезеңдерін хабарлау

Маңғыстау облысы, Бейнеу ауданы, Ы. Алтынсарин атындағы орта мектептің бастауыш сынып мұғалімі — Абенова Агиба

Бұл тәрбие сағатының өзегі — отбасы құндылықтарын дәріптеу, бала тәрбиесіндегі ата-ананың, үлкеннің өнегесінің, шаңырақ бірлігінің маңызын терең түсіндіру.

Мақсат Көрнекілік Әдіс Кезеңдер

Бала тәрбиесіндегі басты мектеп — отбасы

Отбасының басты қазығы, алтын тіреу діңгегі — бала. Баланың тәрбиелі болып өсуіне берекелі отбасының ықпалы орасан. Адамның жеке тұлға ретінде қалыптасуы ең алдымен отбасынан басталады: алғашқы әдеп, алғашқы мейірім, алғашқы жауапкершілік — бәрі де туған үйдің жылуымен бірге бала жүрегіне орнығады. Сол жылу адамның көкірегінде ұзақ жылдар сақталып, өмірлік бағдарына айналады.

Мақсаты

  • Отбасындағы сыйластыққа, адамгершілікке, инабаттылыққа тәрбиелеу.
  • Үлкенді үлгі тұтып, кішіні қадірлеуге, отбасының бірлігін сақтауға баулу.
  • Ата-ана алдындағы парызды түсіндіріп, елінің жақсы азаматы болып өсуіне бағыт беру.
  • Жанұяның мақтаны болуға ынталандыру.

Көрнекіліктер

Шарлар, жалаушалар, гүлдер, нақыл сөздер мен мақал-мәтелдер, суреттер, слайдтар.

Әдістер

Диалог, топтық жұмыс, сайыс элементтері.

Сабақ барысы

I. Ұйымдастыру кезеңі

  1. 1 Оқушыларды 3 топқа бөлу.
  2. 2 Бағалау түрлерін түсіндіру.
  3. 3 Тәрбие сағатының кезеңдерін хабарлау.

II. Негізгі бөлім

Мұғалімнің кіріспе сөзі

Отбасы — тәрбиенің бастауы. Баланың ер жетуі, мінезінің қалыптасуы, адамгершілік ұстанымдарының орнығуы — бәрі де отбасындағы қарым-қатынас пен үлгіге байланысты. Сондықтан әрбір үйдің жылуы балаға өмір бойы жол көрсететін рухани тірек болады.

1-кезең: Ой қозғау

Топтық жұмыс

Оқушылар «отбасы» ұғымын қалай түсінетінін постерге түсіріп, топпен қорғайды. Әрқайсысы өз отбасы туралы қысқаша әңгімелейді. Топтар бірін-бірі смайликтер арқылы бағалайды.

Қорытынды

Туыстық жүйенің өзегі — отбасы. Барлық алыс-жақын туыстық осы шаңырақтан тарайды. Қазақ отбасы көбіне үш ұрпақтан тұрады: ата, әке, бала.

Ән

«Анашым, қартаймашы, жалынамын»

Жұмбақ

Маған да, саған да
Жақын туыс — бес адам.
Үш әріптен тұратын,
Оңға оқы, солға оқы — өзгермейді еш одан.
Бәрі де өз жұртың.
Айтшы, кім атын?

Жауабы: ата, ана, апа, аға, іні.

2-кезең: Туыстық атауларды білесің бе?

Түсіндіру

Әр топ өзіне берілген туыстық атаулар бойынша түсінігін айтып, мысал келтіреді.

  • 1-топ: қарындас, сіңлі
  • 2-топ: нағашы, бөле
  • 3-топ: жиен, шөбере

Қорытынды

Қазақ тіліндегі туыстық атаулардың басым бөлігі — ертеден келе жатқан төл сөздер. Тілімізде 90-нан астам туыстық атау бар.

Ән

«Әкешім — анашым»

3-кезең: Жақсыдан үйрен, жаманнан жирен

Дәстүр

Бұл кезең ұлттық салт-дәстүр негізінде тәрбиелеуге бағытталады. Топтар өз бағыттары бойынша мазмұнды мысалдар келтіреді.

1-топ: Ырымдар

Ырым — халықтың ізгі ниетінен туған. Ырым түрлері көп: отаншыл болсын деп баланы туған жерге аунату; батыр, ақындарға ұқсасын деп есім беру. Мысалы: Абай, Нұрсұлтан.

2-топ: Тыйымдар

Тыйым сөздер — отбасылық тәрбиенің әсерлі құралы. Олар баланы жаман әдеттен, орынсыз қылықтан, теріс мінезден сақтандырып отырған. Мысалы: «Қолыңды төбеңе қойма — жалғыз қаласың».

3-топ: Отбасы туралы мақал-мәтелдер

Мақал-мәтел — ауыз әдебиетінің тәрбиелік мәні зор, қысқа да нұсқа түрі. Ойда тез сақталады және өмірлік ұстанымға айналады. Мысалы: «Әке көрген оқ жонар, шеше көрген тон пішер».

Қазақ отбасында балаға ата кәсіпті үйрету, өнерді мирас ету дәстүрі кең тараған. Билік, батырлық, әншілік, серілік, мергендік, аңшылық, зергерлік секілді ата-баба өнерін ұрпақтан ұрпаққа жалғаған әулеттер бүгін де бар.

Ән

«Ата-әжемді жақсы көрем» (Айзере, Қарақат)

III. Қорытындылау

Кері байланыс

  • Нені білдім?
  • Нені үйрендім?
  • Нені түсіндім?

Бағалау және марапаттау

Смайликтер арқылы жиналған ұпайлар есептеліп, жеңімпаз топ анықталады және марапатталады.