Қазақша рефераттар

Ойынның ережесін түсініп, мұғалімнің нұсқауы бойынша қабілетін дамыту

Алматы қаласы • Әуезов ауданы • №72 жалпы білім беретін мектеп

Педагог-психолог: Жолдасова Жадыра Мұратқызы

2-сынып оқушыларының қарым-қатынастағы қиындықтарын ойын арқылы түзету

Бұл жұмыс оқушылардың өзара қарым-қатынас мәдениетін нығайтуға, сынып ішіндегі жылылық пен ынтымақтастықты арттыруға бағытталған. Ойындар арқылы балалардың ашық сөйлесуі, бірін-бірі тыңдауы, әділдік пен достық құндылықтарын ұстануы қалыптасады.

Негізгі мақсат

Оқушылардың бір-бірімен қарым-қатынасын жақсарту; адалдыққа, достыққа, шыншылдыққа және тәрбиелікке баулу; ұсақ қол моторикасын дамыту.

Түзету мақсаты

Танымдық үдерістерді дамыту: есте сақтау, логикалық ойлау, жалпы және ұсақ моториканы қалыптастыру; ойын ережесін түсініп, мұғалім нұсқауы бойынша әрекет ету дағдысын бекіту.

Қажетті құралдар

  • АКТ
  • A4 форматтағы қағаздар
  • Қалам
  • Түрлі түсті макарондар

Сабақ барысы

Топ ережелері

  • Құпиялылық: әр қатысушының айтқаны топ ішінде қалады.
  • Тыңдаймыз: бір-бірімізді тыңдаймыз, сөзді бөлмейміз.
  • Белсенділік: тапсырмаларға ықыласпен қатысамыз.
  • Құрмет: бір-бірімізге ренжімейміз, «қазір және осында» қағидасын ұстанамыз.

I. «Менің есімімді ата» жаттығуы

Танысу • Жылы байланыс

Мақсаты: топқа қатысты жағымды сезімді дамыту.

Нұсқау: кішкентай доп шеңбер бойынша беріледі. Допты ұстаған оқушы өз есімін айтады. Доп барлығына тигеннен кейін, екінші айналым жасалады: әр қатысушы тренинг барысында қолданатын есімін айтып, таратылған парақшаға жазып қояды.

II. «Мен — күнмін» тренингі

Өзін-өзі бағалау

Мақсаты: оқушының өзіне сенімділігін арттыру; сыныптың ынтымағын бақылау; ұлдар мен қыздар арасындағы достық пен өзара сыйластықты байқау.

Нұсқау: оқушы күннің суретін салып, ортасына өз есімін жазады. Әр сәулеге өзі жақсы көретін қасиеттерін (мейірімді, көмектескіш, батыл, т.б.) жазады.

III. «Шатасқан жылан» жаттығуы

Командалық жұмыс

Мақсаты: топтың бірігуіне ықпал ету.

Нұсқау: қатысушылар қатар тұрып, бір-бірінің қолынан ұстайды. Қатар «жылан» деп аталады: шеткі екі оқушы — «басы» мен «құйрығы».

Бір оқушы уақытша дәлізге шығады. Қалғандары қолды жібермей, бір-бірінің астынан және үстінен өтіп, «жыланды» шатастырады (оралымдар, ілмектер құрайды).

Соңында «бас» пен «құйрық» бос қолдарын жасырады, бірақ бір-бірімен қол ұстаспайды. Дәліздегі оқушы келіп, жыланды тарқатуға тырысады.

IV. «Жүретін орындықтар» жаттығуы

Кеңістікте бағдарлау

Мақсаты: кеңістікте бағдарлау икемділіктері мен дағдыларын дамыту.

Нұсқау: ойынға 3–4 оқушы қатысады. Үлкен бөлмеде қатар қойылған орындықтардың екі жағынан ұстап, музыка басталғанда алға қарай жылжиды. Бір-біріне кедергі жасамай, итермей, музыка ырғағына сай бірде баяу, бірде жылдам қозғалып, белгіленген межеге жетуі керек.

V. «Төрт өлең» сергіту сәті

Зейін • Қимыл үйлесімі

Мақсаты: есту талдағышымен байланысты қимыл-қозғалыс талдағыштарын дамыту.

Сөз

Жер

Қолды төмен түсіреді.

Сөз

Су

Қолды алға көтереді.

Сөз

Ауа

Қолды жоғары көтереді.

Сөз

От

Саусақ буындарын айналдырады.

Барысы: оқушылар шеңбер бойымен отырады. Жетекші сөздерді айтады, ал қатысушылар сәйкес қимылды тез әрі дәл орындайды.

VI. Коллаж: «Менің бойтұмарым»

Ұсақ моторика • Нақтылық

Барысы: түрлі түсті макарондарды жіпке тізіп отырып, ішімізден жақсы тілек тілейміз. Әр оқушы өз бойтұмарын құрастырады.

VII. «Айна» жаттығуы

Эмпатия • Сенім

Мақсаты: өзара жақындасуға ықпал ету, сыныптастардың бірін-бірі бағалауына жағымды әсер ету.

Нұсқау: ортаға екі оқушы шығады. Бірі — «айна», екіншісі — «айнаға қараушы». «Айна» қарсысындағы оқушының қимылын, мимикасын мүмкіндігінше дәл қайталайды.

Қорытынды

Сабақ соңында психолог оқушылармен бірге құм терапиясын жүргізеді. «Құмнан — менің әлемім» тақырыбында жұмыс жасай отырып, әр бала өз ішкі сезімін қауіпсіз ортада бейнелеуге мүмкіндік алады.