Ата - анамның бал тілі

Ана тілі — адам жаратылғалы бері жан дүниесінің айнасы, өсіп-өніп, түрлене беретін, мәңгі құламайтын бәйтерегі. Ана тілі жүректің терең сырларын, халық тарихының барлық кезеңдерін, жанның барлық толқындарын ұрпақтан ұрпаққа сақтап отыратын қазына.

Қазақ тілі — аса бай әрі икемді тіл. Орамын тауып, қисынын келтіріп пайдалансаң, бұл тілмен сурет салғандай, ою ойғандай нәзік те дәл өрнектеуге болады. «Бұл тілден май тамады» деу де бекер емес: халықтың тілі мен жырына құлақ салсаң, алуа-шекердей тәтті нәріне, әріне еш тоймайсың. Ғашықпын қазақ тіліне! Осындай майса, сұлу тілді қалай өгейсітуге болады?

Тіл — адаммен бірге пайда болып, қатар жасасып келе жатқан қоғамдық құбылыс. Тіл арқылы адамдар пікір алмасады, өзара түсініседі, оны қатынас құралы ретінде қолданады. Әр адам өз ойын тіл арқылы жеткізеді, өзгенің ойын да тіл арқылы ұғынады.

Тіл — халықтың жаны, сәні, тұтастай кескін-келбеті мен болмысы. Халықтың тарихта қалуы да тіліне, тілінің сақталуына байланысты.

Еліміз тәуелсіздікке қол жеткізгеннен кейін мемлекеттік тіліміз — қазақ тілі болып бекітілді. Қазақстан Республикасының «Тіл туралы» Заңы күшіне енді. Болашағымызды баянды етер басты қаруымыз — тіліміз.

Кез келген мемлекеттің ең негізгі рәмізі де, ұраны да, тірегі де — сол елдің ана тілі. Біздің ана тіліміз — қазақ тілі. Біздің Отанымыз — Қазақстан. Қазақстан Республикасының өз Елтаңбасы, Әнұраны, Туы бар. Сонымен қатар өз тілі бар.

Тіл — халық тарихы. Тіл — ұлттық қазына. Тіл — намысымыз, арымыз, байлығымыз, барымыз.

Ендеше туған еліміздің тілін ардақтап, сол тілде сауатты жазып, ойымызды анық жеткізе білсек — нұр үстіне нұр.

Бүгін тіл мерекесіне орай 4-сыныптар арасында мәнерлеп оқу сайысы өткізіледі. Ендігі кезекті оқушыларға берейік — тіл мерекесіне арнайы дайындаған тақпақтарын тамашалайық.