Бой сергіту

С. М. Умирзакова №47 ЖОББМ, педагог-психолог (Орал қаласы)

Жас мамандарға арналған психологиялық тренинг

Тренинг мақсаты

Өз ісін жаңа қырынан бастаған жас мамандарға қолдау көрсете отырып, ұжымда психологиялық жағымды ахуал қалыптастыру.

Кіріспе сөз

Психолог: Сәлеметсіздер ме, құрметті тренинг қатысушылары! Ұстаздың өз қызметін алаңсыз әрі нәтижелі атқаруы үшін ұшқыр ой, алғыр зейін, ашық көз, ояу көкірек қажет екені даусыз.

Бүгінгі мақсатымыз — айналамыздағы адамдармен қарым-қатынасымыз қандай, олар кімдер, біз кімбіз, өзімізді өзіміз тани аламыз ба деген сұрақтарға жауап іздеу. Осы арқылы тұлғаның адами көзқарасын айқындауға қадам жасаймыз.

Кездесулеріміз алдағы уақытта тұрақты жалғасады деп сенемін. Бүгін бір-бірімізбен жақынырақ танысамыз: ішкі кедергілерді азайтып, толқуды сабырға түсіріп, жағымды көңіл күй мен оң энергия алуға тырысамыз.

Мұғалімдік жолға жаңа қадам басқан жас ұстаздарға сәттілік тілей отырып, тренингімізді бастайық.

1-жаттығу: «Орын алмасамыз» (бой сергіту)

Қозғалыс

Бұл жаттығу денені сергітіп, күш жинауға және жұмысқа жаңа жігермен кірісуге көмектеседі. Бір-бірімізді жақсырақ тану үшін орта қалыптастырамыз.

Өткізу тәртібі

Қатысушылар шеңбер құрып, орындықтарға отырады.
Жүргізуші «Кәнеки, кімде-кімнің…» деп бастап, белгілі бір белгі немесе әдет айтады.
Айтылған белгі сәйкес келетіндер өзара орын ауыстырады.
Жүргізуші босаған орынға жылдам отырып үлгеруге тырысады.
Орынға отырып үлгермеген адам келесі жүргізуші болады.

Нұсқау үлгілері

Шашы ұзын қыз-келіншектер
Алмұртты жақсы көретіндер
Гитара тарта алатындар
Сағат тағып жүргендер
Қазіргі уақытта жаңа бағдарламамен жұмыс істейтіндер

Қосымша нұсқалар

Өз жұмысын «нағыз мамандық» деп санайтындар
10 жылдан астам педагог болып еңбек етіп жүргендер
Бала кезден мұғалім болуды армандағандар
Тренингке алғаш рет қатысып отырғандар
Бір мекемеде ұзақ жылдар қызмет етіп келе жатқандар

Қорытынды сөз

Бәріңізге үлкен рақмет! Бой сергіту жаттығуын ойдағыдай орындадыңыздар. Енді орындарыңызға қайта отырыңыздар.

2-жаттығу: Таныстық тренингі (жұппен жұмыс)

Қарым-қатынас

Қатысушылар екі-екіден жұптасады да, аудитория ішінде жан-жаққа тарайды. Әр жұпқа 3–5 минут уақыт беріледі.

Осы уақытта әр қатысушы өзі туралы, әсіресе маңызды деп санайтын тұстарын айтып береді. Тұлғалық қасиеттердің жағымды жақтарын алдыңғы орынға шығарған дұрыс.

Жұптың міндеті

Бір қатысушы екеуіне ортақ 3 ұқсастықты атайды.
Екінші қатысушы 3 айырмашылықты айтады.
Содан кейін әркім өз жұбын топқа таныстырады.
Қатысушылар нақтылау сұрақтарын қоюына болады.

Рақмет! (Бір-біріңізді арқадан жеңіл қағып қолдауға болады.) Міне, осылайша біз танысып, бір-бірімізге қарай алғашқы қадамдарымызды жасадық.

3-жаттығу: Берілген сан бойынша саптан шығу

Командалық үйлесім

Мұғалімдер ұжымы — біртұтас команда. Әрқайсысының қызметі бір-біріне тәуелді болғандықтан, ұжымның бірін-бірі сезіне отырып әрекет етуі маңызды. Бұл жаттығу бірлесе қимылдауға және қарым-қатынасты жақсартуға көмектеседі.

Нұсқаулық

1 Барлығы бір қатарға сап түзеп тұрады.
2 Жүргізуші қатардағы адам санынан аспайтын бір санды атайды.
3 Қатардан бірден сол санға тең мөлшерде адам алға шығып үлгеруі керек.
4 Кеңесуге тыйым салынады. Жаттығу нәтижеге жеткенше қайталана береді.

Талқылауға арналған сұрақтар

Сізге қиын болды ма? Неліктен?
Бұл жаттығудан қандай әсер алдыңыз? Қандай сезім пайда болды?
Бір-бірімізді қолдау ретінде арқадан қағып қояйық. Жарайсыңдар!

Қорытынды: «Менің алған әсерім»

Психолог: Құрметті жас мамандар! Бүгінгі тренингтен қандай әсер алдыңыздар? Ойларыңызбен және сезімдеріңізбен бөліссеңіздер.

Жабу сөзі

Бәріңізге көп-көп рақмет! Сіздермен бірге жұмыс істеу біз үшін үлкен қуаныш. Кәсіби қызметтеріңізге табыс тілеймін. Кездескенше!