Оқушылардың логика методологиялық білімдерін жетілдіру

Егемен еліміздің жарқын болашағы — бүгінгі мектеп оқушысы. Жас ұрпақ тәрбиесі қай заманда да өзектілігін жоғалтқан емес. Алаштың ардақты ұлы А. Байтұрсынов: «Бала білімді, тәрбиені өз бетімен алуы керек. Ал мұғалімнің қызметі — балаға орындалатын жұмыстарды шағындап беру және қойылған мақсатқа жету үшін бағыт-бағдар көрсету», — деп жазды.

Бұл ойлардың түйіні — ұстаздың ізгіленген, үйлесімді, бағыттаушы рөлі. Бүгінгі күннің негізгі міндеттерінің бірі — оқушының жеке тұлғасын, рухани әлемін, ынтасын және логикалық ойлау қабілетін дамыту.

Математика пәнін оқытуда дидактикалық принциптерді қатаң сақтай отырып, әр оқушының жеке ерекшелігіне сай түрлі формадағы оқыту және тәрбиелеу жұмыстарын тиімді ұйымдастыру қажет.

Ғылым мен техниканың жедел дамуы, оқушылардың мәдени деңгейінің өсуі білім беру жүйесінде математиканың маңызын арттырады. Сондықтан оқушылардың математикаға дайындығын жан-жақты жетілдіру — орта мектептің аса маңызды міндеттерінің бірі.

Оқушылардың логикалық ой-өрісін арттыруда және оларды математикаға қызықтыруда логикалық есептер шығарудың ерекше маңызы бар. Логикалық есептерді жүйелі қолдану оқушының тыңдау қабілетін дамытып, ойлау дағдыларын қалыптастырады және математикалық сауаттылығын жетілдіреді.

Оқып-үйренуге арналған жұмыстар, әдетте, сыныпта орындалатын оқулықтағы тақырыптық жаттығуларды толықтыруға бағытталады. Ал шығармашылық тапсырмалар оқушының ойлауын тереңдетіп, дербес шешім қабылдауға үйретеді.

Қабілетті оқушылардың математикалық даму деңгейі есеп шығаруда анық байқалады. Кез келген есепті шешу оқушыдан үлкен еңбекті, табандылықты, төзімділікті және өзіне сенімділікті талап етеді.

Оқушыны шығармашылық іс-әрекетке бейімдейтін және ақыл-ойын дамытатын тиімді құралдар — қызықты логикалық есептер, қиындығы жоғары олимпиадалық тапсырмалар, әртүрлі сайыстар.

Өкінішке қарай, математика оқулықтарында логикалық есептер өте аз; олар көбіне «шығармашылық есептер» айдарымен ғана сирек кездеседі. Ал сыныптағы оқушылар бірдей емес: математикаға ынтасы жоғары балаларды бірсарынды, жеңіл жаттығулар жалықтыруы мүмкін. Сондықтан белгілі бір ережені меңгертетін тапсырмаларды орындау кезінде оларға күрделірек есептер беру орынды. Мұндай тапсырмалар қатарына логикалық есептер жатады, өйткені олар әр оқушының ойлау қабілетінің дамуына нақты мүмкіндік жасайды.