Далада қар жауып тұр, айнала аппақ қар
Сабақ туралы қысқаша мәлімет
Білім беру саласы
Шығармашылық
Бөлімі
Жапсыру
Тақырыбы
Аққала
Мақсаты
Балаларды шеңбер және сопақ пішіндерді алу үшін бұрыштарын дөңгелетіп қиюға, композиция құрастыруға үйретуді жалғастыру.
Әдіс-тәсілдер
- Түсіндіру
- Көрсету
- Сұрақ-жауап
- Сергіту сәті
- Қорытындылау
Көрнекілік және құралдар
- Қыс көрінісі бар суреттер
- Геометриялық дөңгелек пішіндер
- Үлгі
- Желім, қылқалам
- Қайшы
- Қара және қызыл бояулар
Сабақтың барысы
1) Ұйымдастыру және «Шаттық шеңбері»
Тәрбиеші балаларға бүгінгі күннің ерекше екенін айтады: топқа қонақтар келген. Балалар қонақтармен сәлемдесіп, шаттық шеңберін орындайды.
Күннің көзі ашылды,
Көкке шуақ шашылды.
Құтты қонақ келіпті,
Төрімізге еніпті.
Амандасу — үлкенге тәрбиенің басы ғой.
Ал қанекей бәріміз,
Сәлем дейік үлкенге.
2) Суретпен жұмыс: қысқы өзгерістер
Тәрбиеші балаларға қыс көрінісі бейнеленген суретті көрсетіп, сұрақ қояды: «Далада қандай өзгерістер бар?»
Балалардың жауабы: «Далада қар жауып тұр, айнала аппақ қар».
3) Жұмбақтар арқылы тақырыпқа шығу
Қыс тақырыбын бекіту үшін тәрбиеші жұмбақтар жасырады, балалар шешуін табады.
Қыста ғана болады, ұстасаң қолың тоңады.
Жауабы: Қар
Қырға сүйреп шығам, ойға мініп түсем.
Жауабы: Шана
Аяқтарым қалтырап, қос тай міндім жалтылдақ.
Шапса жауабын жазбайды, қолымда екі таяғым.
Жауабы: Коньки
Зырлаймын қардың үстімен, озамын атты кісіден.
Жауабы: Шаңғы
4) Балалардың тақпақтары
Дария
Далада қар борайды,
Ақ мамыққа орайды.
Мұз болады, қатады,
Жып-жылтыр боп жатады.
Тұрсынай
Аралайды бақшаны,
Үзілмейді жақсы әні.
Гүлденеді бақшалар,
Жауса, жаусын ақша қар.
Бекет
Аппақ ұлпа қары бар,
Қаңтардың өз сәні бар.
Әлішер
Бұрқыратқан ақ қарды
Көрдіңдер ме, ақ қарды?
Дауысы да тым өктем-ді,
Борандатып өткенде.
5) Ғажайып сәт: Аққаланың келуі
Топқа көңілді әуенмен Аққала кіреді. Ол балалармен амандасып, өз таныстыруын айтады.
Мен — Аққала, ақ бала,
Келіп қалдым бақшаға.
Екі көзім қап-қара,
Көргің келсе, сен қара.
Аққала
Сәлеметсіңдер ме, балалар!
Тәрбиеші
Сәлеметсіз бе, Аққала!
Аққала
Далаға қараңдаршы, қар жауып тұр. Балалар далада ойнап жүр. Сендер білесіңдер ме, қыста қандай ойындар болады?
Балалар
Шанамен сырғанайды, коньки тебеді, шаңғы тебеді, қардан аққала соғады.
Аққала (мұңайып)
Қазір балалар аққала соғып ойнамайды. Сендер далада аққала көрдіңдер ме?
Балалардың жауабы: «Жоқ.»
Тәрбиеші
Аққала, ренжіме. Біз саған балалармен бірге көп аққала жасап береміз. Дұрыс қой, балалар?
Балалардың жауабы: «Иә.»
6) Жапсыру жұмысы: «Аққала» композициясы
Үлгімен талдау
- Аққаланың денесі қандай геометриялық пішінге ұқсайды? Дөңгелек.
- Аққала неше дөңгелектен тұрады? 1, 2, 3.
- Ең үлкені — төменгі бөлігі, орташасы — кеудесі, кішісі — басы.
- Қосымша бөліктері: 2 қолы, 2 көзі, сәбізден мұрны.
Нұсқаулық
Тәрбиеші балаларға бұрыштарды дөңгелетіп қию арқылы шеңбер мен сопақ пішіндер жасау жолын көрсетеді, бөлшектерді ретімен орналастырып, желіммен ұқыпты жапсыруды түсіндіреді. Көзін қара бояумен, мұрнын қызыл бояумен (не қызғылт сары түске жақын) бояп толықтыру ұсынылады.
Сергіту сәті
Қайда екен қолымыз,
Оңымыз бен солымыз?
Білеміз бе оны біз?
Міне, оң мен солымыз,
Міне, алақай қолымыз,
Қол соғайық бәріміз.
Балалар өз орындарына жайғасып, алдарындағы пішіндерді, желім, қайшы, қылқалам, қара және қызыл бояуларды пайдаланып, жұмыстарын орындайды.
7) Аққалаға арналған тақпақтар
Құралай
Көше бойы омбы қар,
Жиналамыз топтала.
Демей бетім домбығар,
Соғамыз біз аққала.
Нұрсая
Марал, Зада мақтана,
«Соқтық» дейді аққала.
Мен қызықтап көріп ем,
Аққала емес — ақ бала.
Құралай (қайталайды)
Көше бойы омбы қар,
Жиналамыз топтала.
Демей бетім домбығар,
Соғамыз біз аққала.
Аққала
Ой, алақай! Балалар, рақмет сендерге. Мен енді жалғыз емеспін — достарым көбейді. Маған арнап айтқан тақпақтарың үшін де рақмет. Енді қайтайын, сау болыңдар!
Қорытынды және нәтижелер
Көрме
Балалардың жұмыстарынан шағын көрме ұйымдастырылады.
Мадақтау
Ұқыпты әрі шығармашылықпен орындаған балалар мақталып, мадақталады.
Сұрақ-жауап
Оқу іс-әрекеті қысқаша сұрақ-жауап арқылы қорытындыланады.
Бекітуге арналған сұрақтар
- Бүгінгі сабақтың тақырыбы қандай болды?
- Аққала қандай пішіндерден құралады?
- Аққала неше дөңгелектен тұрады?
- Жапсыру кезінде нені ұқыпты орындау керек?