Тәуелсіздік алған еліміздің келешек ұрпақты ұлттық, халықтық және этностық - мәдени тұрғыда тәрбиелеу бүгінгі күннің өзекті мәселесі
Балабақшада ұлттық ойындарды дамыту
Елбасымыз Н. Ә. Назарбаев ұсынған стратегияда негізгі бағыттардың бірі — халықтың ұлттық моделін, салт-дәстүрлерін ескере отырып, білімі мен білігі жағынан өркениетті елдермен тең дәрежеде қатар тұра алатын, ұлттық болмысы мен отаншылдық рухы берік қазақстандықтардың жаңа ұрпағын тәрбиелеу қажеттігін ерекше атап өту.
Тәуелсіздік алған еліміз үшін келешек ұрпақты ұлттық, халықтық және этностық-мәдени тұрғыда тәрбиелеу — бүгінгі күннің өзекті мәселесі. Бұл мәселенің шешімін табу мақсатында үздіксіз білім беру жүйесі қайта қаралып, оны жетілдіру жолдары іздестірілуде.
Ұлттық даму стратегиясы және мектепке дейінгі білім
Алға қойылған негізгі талап — Қазақстанның білім беру жүйесінің әлемдік білім беру кеңістігіне толық енуіне бағытталған ұлттық даму стратегиясын әзірлеп, тиісті моделін құру. Бұл талаптарды іске асырудағы жұмысты үздіксіз білім берудің алғашқы сатысы — мектепке дейінгі ұйымдардан бастау аса маңызды.
Негізгі басымдық
- Баланың білімге деген құштарлығын арттыру.
- Ұлтқа тән қасиеттерді бойына сіңірген тәрбиелі тұлға қалыптастыру.
- Ұлттық құндылықтарды жүйелі түрде білім мазмұнымен ұштастыру.
XXI ғасыр талабы: жан-жақты дамыған ұрпақ
XXI ғасыр — білімділер ғасыры. Сондықтан бүгінгі таңда заман талабына сай зерделі, ой-өрісі жоғары, жан-жақты дамыған ұрпақ қалыптастыру — мемлекетіміздің алға қойған аса маңызды міндеттерінің бірі.
Тәрбие мен білімнің алғашқы дәні мектепке дейінгі тәрбие ошағында себіледі. Бала денсаулығының мықты болуы, қозғалыс дағдыларының қалыптасуы және дене бітімінің дұрыс жетілуі ең алдымен мектепке дейінгі кезеңде орнығады.