Балалардың табиғатқа деген сүйіспеншілігін арттыру
Оқу іс-әрекетінің мақсаты
Балалардың теңізге саяхатқа шығудағы мақсатты түсінуіне ықпал ету: судың қасиеттері, теңіздегі балықтар, теңіз астындағы тіршілік пен заттар, теңіздің адамға берер пайдасы және теңізден алынатын байлықтар туралы түсінік қалыптастыру. Табиғатқа деген сүйіспеншілікті арттыру.
Тәрбиелік
Мәдениеттілікке, жауапкершілікке, тазалыққа баулу.
Білімдік
Жеке бас тазалығы ережелерін сақтауда судың орнын түсіндіру, салауатты өмір салтын дәріптеу, су адам өмірінде маңызды рөл атқаратынын ұғындыру.
Көрнекіліктер
Аквариум, балық суреттері, су асты өсімдіктері, глобус, дүрбі, лабиринт суреттері, кеме макеті, жұмбақтар.
Ұйымдастыру кезеңі: кіріспе әңгіме
Сұрақ-жауап
- Балалар, біз бүгін кемемен саяхатқа шығамыз.
- Кемемен қайда жүруге болады? — Суда, өзенде, мұхитта, теңізде.
- Глобусқа қарап көрейік: Жер шарының үштен екі бөлігін су алып жатыр.
Жер бетіндегі адамдардың тіршілігі теңіздермен және мұхиттармен тығыз байланысты. Теңіздер мен мұхиттардың бетінен көтерілген бу жауын-шашын болып жерге түседі. Біздің тыныстайтын оттегіміздің де елеулі бөлігі су әлемімен байланысты.
Теңіздің адамға пайдасы
- Тағам: балық, краб, омар, теңіз ұлуы, теңіз қырыққабаты.
- Байлық: теңіз түбінен мұнай өндіріледі.
- Тұрмыс: теңіз суынан ас тұзы алынады.
«Көк теңіздің өрісі — балықшының егісі».
Теңіз тіршілігіне мысалдар
Теңізде кездесетін жануарлар
Камбала, акула, губан, кит, дельфин және т.б.
Теңіз астындағы тіршілік
Моллюскілер, устрица, янтарь түсті ұлу, кальмар, меруертті ұлу, сегізаяқ, мидиялар.
Саяхатқа дайындық
Тазалық құралдары
Су, сабын, сүлгі, тіс щеткасы мен пастасы.
Азық-түлік
Тағам, ауызсу.
Теңізге кемемен барамыз (кеме макеті қолданылып, балалар өз орындарын алады).
Маңызды түсінік: теңіз суы
Теңіздің суы тұзды болғандықтан, оны ішуге болмайды. Дегенмен тұзды су денсаулыққа пайдалы: кейбір емдік мақсатта қолданылады, ал біз тамағымыз ауырмасын деп тұзды сумен шайып тұрамыз.
Сергіту сәті
Қимылмен орындау
Көзімізді жұмамыз,
Балық болып жүземіз.
Ұстап алып біреуін,
Қазанға әкеп саламыз.
Су туралы тақпақтар
Біз келеміз кемеде,
Су бетінде тербеліп.
Соқса егер салқын жел,
Дем аламыз тыныстап.
Сылдырлайды мөлдір су,
Мөлдір суға қолың жу.
Жуынсаң сен әрдайым,
Аппақ болар маңдайың.
Тазалықтың досы —
Су дегенің осы.
Теңіздегі құбылыстар: толқын қалай пайда болады?
Теңіз — шексіз үлкен айдын. Кейде жағалау көрінбейді: қайда қарасаң да су. Су бетінде толқындар пайда болады. Толқынды жел көтереді: жел соғып, суды қозғалысқа келтіреді де, су бетінде толқын пайда болады.
Бақылау
Дүрбімен көкжиекке қараймыз.
Кездесу: Дельфиннің тапсырмалары
Диалог
Балалар: Бізге қарай бір балық жүзіп келеді! Ол қандай балық?
Балалар: Дельфин!
Дельфин: Қош келдіңдер, балалар! Менің мекеніме әркез келіңдер. Мен сендерге тапсырмалар алып келдім.
1) Жұмбақтар
-
Жылға қуып ағады,
Ағып көлге барады.
Ішсең шөлің қонады,
Шешуін кім табады?
Жауабы: бұлақ
-
Құйрығы жерге тимейді,
Жотасы күнге күймейді.
Жауабы: балық
-
Күннің көзін жабады,
Айдың бетін жабады.
Жаңбыр болып жауады,
Шешуін кім табады?
Жауабы: бұлт
2) Сандық тапсырма
Екі бала тақтаға шығып, сандарды өсу ретімен тез қосады. Соңында қандай сурет шығатынын көреміз. Кім бірінші аяқтаса — жеңімпаз.
Шешуі
Қайық.
3) Ойын
«Тез дайын бол» ойыны.
Қоштасу
Дельфин: «Сендермен бірге болған маған өте ұнады, бірақ мен қайтуым керек. Мен сендерге құр алақан келген жоқпын — теңіз балығының майын әкелдім. Ол денсаулыққа өте пайдалы. Келесі кездескенше, сау болыңдар!»
Сурет бойынша әңгіме
Балалар суретке мұқият қарайды да, көргенін әңгіме етіп құрастырады.
Үлгі әңгіме
Теңіз шексіз үлкен. Шағалалар ұшып жүр. Балықшылар кемеден балықтарды түсіріп жатыр.
Мақал-мәтелдер
- Судың да сұрауы бар.
- Бұлақ көрсең, көзін аш.
- Сусыз өмір жоқ.
- Су ішкен құдығыңа түкірме.
Қорытынды
Бүгінгі теңізге саяхатымыз аяқталды. Біз теңіз патшалығымен танысып, судың қасиеттерін, теңіз суының тұзды болатынын және күнделікті өмірде таза суды дұрыс қолданудың маңызын білдік.
Бірге айтылатын тілек
Тазалық бер бәріне,
Тазалық бер тәніме.
Тазалық бер еліме,
Тазалық бер көркейген кең жеріме.
Оқу іс-әрекеті қорытындыланып, балалар мадақталады.