Қазақша рефераттар

Отбасының мектепке дейінгі мекемеге қосатын үлесі

Бала тәрбиесінің бастауы: отбасы мен балабақшаның бірлігі

Бала тәрбиесі ана сүтінен басталып, өмір бойы жалғасатын күрделі үдеріс. Тәрбиенің ең алғашқы іргетасы отбасында қаланып, балабақшамен тығыз байланыс арқылы әрі қарай жүйелі түрде дамиды. Педагог-ғалымдардың тұжырымы бойынша, тұлғаның қалыптасу нәтижелілігі ең алдымен отбасындағы өнегеге байланысты.

Бала көбіне отбасыдағы ересектердің мінез-құлқына, әдебіне, іс-әрекетіне қарап өседі. Сол себепті баланың бойындағы әдеттер мен құндылықтарды оның отбасылық ортасынан аңғаруға болады.

Отбасы мен мектепке дейінгі ұйымның өзара ықпалдастығы

Мектепке дейінгі ұйым мен отбасының өзара ықпалдастығы бірнеше негізгі бағытқа сүйенеді. Бұл бағыттарды жүйелі іске асыру үшін екі тараптың тұрақты, сенімді байланысы қажет. Тәрбие жұмысы сабақтасып, ұштаса жүргізілгенде ғана көзделген мақсатқа қол жеткізуге болады.

Негізгі бағыттар

  • 1

    Ата-аналардың педагогикалық және психологиялық сауаттылығын арттыру.

  • 2

    Іс-әрекеттің әртүрлі формаларына қатыстыру (ұйымдастырылған оқу іс-әрекеттері, мерекелік шаралар және т.б.).

  • 3

    Балалардың шығармашылық әрекетін дамытуға қолдау көрсету.

  • 4

    Қалыптасу мен даму мәселелері бойынша тәжірибе алмасу.

  • 5

    Әлеуметтік-дамытушы ортаны қалыптастыруға көмектесу.

Отбасы — баланың «алтын ұясы»

Отбасы — баланың өмір сүру ортасы, қамқорлықтың тұрақты көзі. Бұл — тәрбиелеу, қарапайым біліммен қаруландыру, шешім қабылдай білуге үйрету секілді дағдыларды ең жақын адамдардың мейірімі арқылы меңгертетін орта. Сондықтан баланың білім нәрімен сусындайтын «алтын ұясының» орны айрықша.

Бала уақытының көп бөлігін балабақшада өткізеді, тәрбиешілерінен және ұстаздарынан үйренеді. Осыған қарап-ақ отбасы мен балабақша арасындағы қарым-қатынастың маңызы айқындалады.

Ата-аналарды балабақша өміріне тарту тәжірибесі

Балабақша ұжымы ата-аналарды ұйымдастырып, олардың балабақшадағы тәрбие жұмысына белсене қатысуына жағдай жасайтын іс-шараларды жүйелі өткізеді. Олардың қатарына сауықтыру кештері, ертеңгіліктер, тренингтер, сауалнамалар кіреді.

Мұндай кездесулер ата-аналардың бір-бірімен жақынырақ танысуына, ортақ мәселелерді бірлесіп талқылап, шешім табуына мүмкіндік береді. Нәтижесінде ата-ананың қоғам алдындағы жауапкершілігі артып, балабақша мен отбасы, ата-ана мен бала арасындағы достық әрі бауырмал қарым-қатынас нығаяды.

Спорттық жарыстардың тәрбиелік мәні

Мектепке дейінгі мекемеде өткізілетін спорттық жарыстар салауатты өмір салтын ұстануға тәрбиелеумен қатар, ата-ана мен бала арасындағы сүйіспеншілікті, ынтымақтастықты күшейтеді.

Егіз ұғым: отбасы мен балабақша

Отбасы мен балабақшаны бір-бірінен бөлек қарастыруға болмайды. Бұл — саналы ұрпақ тәрбиелеуге жетелейтін берік одақ. Екі тарап бірлесе әрекет еткенде ғана күрделі мәселелердің түйіні тарқайды.

Бірлескен жұмыстың нақты қадамдары

Балабақшада ата-аналармен және балалармен ынтымақтаса жұмыс істеудің нәтижелілігін бағалау үшін диагностикалық зерттеу жүргізіліп, ата-аналардың балабақшаға деген көзқарасын қалыптастыруға бағытталған жұмыстар жүзеге асырылды.

Ашық іс-әрекеттер

Ашық ұйымдастырылған оқу іс-әрекеттеріне ата-аналарды қатыстыру арқылы әдіс-тәсілдер түсіндіріліп, жаңа технологиялардың мүмкіндіктері көрсетілді.

Отбасылық іс-шаралар

«Әкем, шешем және мен», «Отбасы — алтын діңгек» секілді шаралар ата-ананың қатысуын арттырып, бірлікті нығайтты.

Жеке жұмыс және «отбасы бұрышы»

Отбасылармен жеке-жеке жұмыс жүргізу, «отбасы бұрышын» ұйымдастыру тұрақты кері байланыс орнатып, нақты нәтижеге жетуге ықпал етеді.

«Жұмыла көтерген жүк жеңіл» дегендей, бала тәрбиесіндегі негізгі міндеттерді іске асырушы — балабақша мен отбасы. Тәлім-тәрбие жұмысы екі арнада да сабақтасып, бір бағытта жүргізілгенде ғана нәтиже орнықты болады.

Ата-аналарға педагогикалық білім берудің қажеттілігі

Отбасында ата-аналарға педагогикалық білім беру өте маңызды. Себебі ата-ана бала тәрбиесінің мақсат-міндеттерін айқын түсінбей, тәрбиенің жолдары мен амалдарын толыққанды жүзеге асыра алмайды. Осыған байланысты балабақша ата-аналарды оқу-тәрбие үдерісінің мазмұны мен әдістемесімен таныстырып, педагогикалық-психологиялық ағарту жұмысын ұйымдастыру және бірлескен әрекетке тарту арқылы өзара байланыс міндеттерін жүзеге асырады.

Негізгі міндеттер

Белсенді педагогикалық ұстаным қалыптастыру

Ата-ананың тәрбиелік үдеріске саналы қатысуын күшейту.

Білім, білік және дағдымен қаруландыру

Тәрбие әдістерін дұрыс таңдап, күнделікті өмірде қолдануға үйрету.

Бала тәрбиесіне ата-ананы белсенді тарту

Үй мен балабақшадағы талаптардың бірізділігін қамтамасыз ету.

Күтілетін нәтижелер

  1. 1

    Ата-аналар тарапынан белсенділік пен қызығушылықтың артуы.

  2. 2

    Жауапкершілік пен өздік жұмыстың күшеюі.

  3. 3

    Мақсатқа жету деңгейінің, тиімділік пен қанағаттанудың жоғарылауы.

  4. 4

    Отбасының мектепке дейінгі мекемеге қосатын үлесінің артуы.

  5. 5

    Алынған білімді тәжірибеде қолдану және бала тәрбиесіне қатысты тиімді технологияларды енгізу.

Қорытынды мақсат

Біз — тәрбиешілер, ата-аналар және қоғамдық ұйымдар — бала тәрбиесіне және оның келешегіне зор жауапкершілікпен қарап, тәрбие жұмысының тиімді әдіс-тәсілдерін бірлесе жүзеге асырсақ, еліміздің болашағын бүгінгі балабақша ұландарына сеніммен тапсыруға болады.

Басты мақсат — заман талабына сай жаңашыл, шығармашыл, мәдениетті, жан-жақты сауатты тұлға тәрбиелеу.

Хамитова Анаргүл Сахановна

Қарағанды облысы, Қарқаралы қаласы

«Еркетай» бөбекжай-бақшасының тәрбиешісі