БҰЛАҚ КӨРСЕҢ КӨЗІН АШ АЙДАРЫНДА 3 - сынып оқушылары шығармашылығыКүзгі табиғат

Жаз мезгілі аяқталып, күз келді. Күн салқындап, түн ұзарды да, күн қысқарды.

Аспанды қалың қара бұлт торлап, майда жаңбыр сіркіреп тұр. Ағаш жапырақтары сарғайып, қалықтай жерге түсіп, айналаны түрлі түсті кілемдей құлпыртады.

Алыстан керуен түзеген тырналардың қиқуы естіледі. Көк жүзінде өрнек сызған өзге құстар да жылы жаққа бет алып, күздің келгенін қайта-қайта еске салғандай.

Мұны аңғарған диқандар егінін жинап, мол өнімге қуанып жүр. Күз — береке, күз — мереке. Байлығы мен шашуын ала келетін күзгі табиғат өте әдемі. Сондықтан маған күз мезгілі ерекше ұнайды.

Біздің мектепте «Алтын күз» мерекесі қызықты әрі мазмұнды өтті. Мереке барысында әртүрлі сайыстар ұйымдастырылды. Бұл сайыстарға бастауыш сынып оқушылары да белсенді қатысты.

Шарт бойынша әр сыныптың ханшайымдары әдемі көйлек киіп, өз өнерлерін көрсетті. Біздің сыныптың оқушылары да мерекеден қалыс қалмай, әрқайсысы өз қабілетіне сай үлес қосты: бірі өлең оқыса, бірі тақпақ айтты. Кейбірі күзгі салат дайындады, ал тағы бір топ сынып болып жасаған «Күз кереметі» атты гүлшоғын қазылар алқасына өлең жолдарымен таныстырды.

Біздің сыныптың ханшайымы Жанетта болды. Ол сахнаға шығып, күз туралы өлеңді мәнерлеп оқыды.

Ежелден дана халқымыз: «Әдепті бала — арлы бала, әдепсіз бала — сорлы бала» деп, ұрпағын әдепті, ізетті, инабатты болып, үлкенді сыйлауға, қайырымды әрі мейірімді болуға үндеген.

Әдептілік — халық санасына сіңген асыл қасиет. Менің түсінігімде, әдепті болу — ең алдымен өзіңді және өзгені құрметтеу. Егер адам әр қадамын ойлап, өз ісіне есеп беріп жүрсе, айналасындағы адамдар да оған әдеппен қарайтыны сөзсіз.

Әр адамның бойына сіңген әдептілік — жарқын болашаққа бастайтын жол. Әдептілік тәрбиесі отбасынан басталып, адамды қоршаған ортамен жарасымды байланыстырды.