Әліппені бітірдім, Жаза аламын атымды
Әліппемен қоштасу
Бұл мерекенің мақсаты — оқушылардың сауат ашу пәнінен алған білімдерін тиянақтау, өз өнерлерін ата-аналарға көрсету, эстетикалық талғамын тереңдету, өзін-өзі басқаруын дамыту және ана тілін сүйіп, қастерлеуге тәрбиелеу.
Негізгі құндылықтар
- Сауатты оқу және жазуға сенім
- Өнер көрсету мәдениеті
- Үлкенге құрмет, кішіге қамқорлық
- Ана тіліне сүйіспеншілік
Кештің өзегі
Балалар сүйікті кітап — Әліппемен қоштасып, жаңа белеске қадам басады: оқуды да, жазуды да меңгергенін сахнада дәлелдейді.
Осы сәтте ата-ана мен ұстаздың еңбегі бір арнаға тоғысып, ортақ қуанышқа айналады.
Кіріспе өлең жолдары
Тақ, тақ, тақ —
Бәрің бері қара.
Бүгін бізде
Болмақ қандай шара?
Тағзым етем, тақсырым,
Айтайын мен жан сырым.
Естідім ұзынқұлақтан —
1 «В» сыныбынан.
Келеді бүгін ертекке,
Ән салып, би билеуге.
Қоштасқалы отыр екен
Сүйікті кітап — Әліппемен.
Мұғалімнің құттықтауы
Құрметті ата-аналар, ұстаздар, оқушылар! Бүгін біздің қуанышымызға шек жоқ. Сіздер 1-сынып оқушыларының «Әліппемен қоштасу» ертеңгілігіне келіп отырсыздар.
Әліппені бітірді балаларым,
Әліппеден нәр алған даналарым.
Өзі оқып, жазатын хәлге жетті,
Құтты болсын білімі балалардың!
Ендігі кезекті оқушыларға берейік.
Қонақтарды қарсы алу
Қош келіпсіз, ақ жаулықты аналар,
Жүздеріңнен мейірім мен нұр тамар.
Алдарыңда қызғалдақтай құлпырған —
Біз, алаңсыз балғын шақты балалар.
Көз салып қараңызшы бойымызға,
Ортақ боп бүгінгі өскен ойымызға.
Хош келіпсіз, ұстаздар, ата-аналар,
Әліппемен қоштасу тойымызға!
Ән:
«Біз өмірдің гүліміз» (қыздар)
Сұрақ-жауап
Мұғалім балалардың мерекелік көңіл күйін арттыра отырып, сұрақ қояды:
Сұрақ
Іші толы әріпке,
Білімдегі жарық не?
Хор жауабы
Болашаққа жол ашқан —
Ол сүйікті Әліппе!
Олай болса, бәрімізге ең қымбат Әліппені ортаға шақырайық.
Әліппенің сөзі
Менің атым — Әліппе,
Мені анаңдай дәріпте.
Мені оқып ер жеткен
Ағаң менен әпкең де.
Армысыңдар, жас достар!
Армысыңдар, ата-ана!
Болашаққа жол бастар —
Әліппең келді ортаға.
Сұрақ:
— Осы сендер қандайсыңдар?
- Талабы биік таудаймыз.
- Мың бұралған бишіміз.
- Шеберміз.
- Ақылдымыз.
- Үлкенге ізеттіміз, кішіге қамқормыз.
- Көп оқимыз.
Бәрі бірге: Біз — қазақ елінің болашағымыз.
Ән:
«Әліппе»
Әріптер әлеміне саяхат
Оқушылар алфавитті жаттап, қазақ тілінде 42 әріп бар екенін айтады. Әріптер әлеміне саяхат басталып, балалар өз есімдері арқылы әріптерді таныстырады.
А әрпі
«А дегенің — Асия. Асия деген мен бала.»
«А әрпінен есімім: Аружан боламын, айдай өсіп толамын.»
Ә әрпі
«Әбілмансұрды білесіз, көңілге мені түйесіз. Ә әрпі де атымда — оқып-біліп жүресіз.»
Д әрпі
«Дөңгелене доп келеді, оны теуіп Данияр келеді. Мәз боламын шаттана, ойым мүлде басқада.»
Ж әрпі
«Ж дегенің — Жанбота. Жақсы оқысам сабақты, одан артық жоқ шара.»
З әрпі
«Азат деген есімді білдіңіздер кесімді. З әрпі бар ішінде — тыңдасаңыз шешімді.»
Н, С, Т, Х
Н — Надия, С — Сая, Т — Төлеген, Х — Әлихан: әріптерді есіммен байланыстырып, мағынасын ашады.
Енді біз жаза аламыз,
Әріпті қосып әріпке.
Риза боп саған жүреміз,
Сүйікті біздің Әліппе.
Қыздар: Балаларға ақ тілек,
Ұлдар: Болашаққа бақ тілеп.
Хор: Біздерге білім үйреткен, Әліппе, саған рахмет!
Пәндер және санамақ
Әліппе балалардың тек әріппен емес, басқа да негізгі пәндермен танысқанын еске салады. Оқушылар: математика, дүниетану, ән сабағы, бейнелеу өнері, еңбекке баулу пәндерін атайды.
Санамақ (1–10)
1 — бесік, шықтың содан өсіп.
2 — елім, далам, тауым, көгім.
3 — үміт, үміт артар жігіт.
4 — төзім, төзе білем өзім.
5 — бақыт, бағалайтын бақыт.
6 — ақыл, тыңдағаның мақұл.
7 — жалау, жүректегі алау.
8 — сөзің, серт беретін кезің.
9 — тоқтау, елдің жоғын жоқтау.
10 — Отан, қорға соны, ботам.
Өнер бөлімдері
Жиналған қауым таң қалсын,
Ән-бимен шашу шашылсын.
Мың бұралған бишілер —
Бименен кешті жалғасын.
Би: Қыздардың орындауында «Кукарела».
Сергіту сәті
Математика сабағында үйренген сергіту сәтін айтып, көрсету.
Қоштасу сөздері
Әліппені бітірдім,
Жаза аламын атымды.
Әліппені бітіріп,
Бала болдым ақылды.
Қош бол, құтты Әліппем!
Көп нәрсені үйреттің.
Таныстырдың әріппен,
Тақылдатып сөйлеттің.
Әліппемен қош айтысып қаламыз,
Енді қолға «Ана тілі» аламыз.
Ата-ана, қуанышқа ортақ бол —
Сауатты боп шықты міне балаңыз!
Әліппе: Балалар, рахмет сендерге! Енді қолға «Ана тілі» оқулығын аламыз.
Ән: «Ертегілер»
Анаға арналған алғыс
Баланың да тірегі,
Дананың да тірегі.
Шаншылмасын ешқашан
Аналардың жүрегі.
Ақыл құйған санама,
Күннен де артық расында.
Күн — алыста, ал анам
Үнемі менің қасымда.
Мұғалім ата-аналарға, ата-әжелерге қолдау көрсетіп, қуаныш пен жауапкершілікті бірге көтергені үшін шынайы алғыс айтады. Ендігі ән ата-аналарға арналады.
Ән: «Ана»
Көрініс: «Бауырсақ»
Әліппенің ақ тілекпен қоштасуы
Кір шалмасын беттерің,
Таза болсын оқулық пен дәптерің.
Оқығандарың есіңде болсын,
Күнделіктерің бестікке толсын!
Қыздар: Бәрімізді сүйіп өткен,
Ұлдар: Балаларға үйреткен.
Хор: Әліппе мен ұстазға бас иеміз құрметпен.
Ән: «Қош бол, құтты Әліппе!»
Рәсімдік бөлім
- Мектеп басшыларына сөз беріледі.
- Мұғалім ата-аналарды жылы тілек айтуға шақырады.
- Ертеңгіліктің соңында аналар ақ тілекпен шашу шашады.
Уақыттарыңызды бөліп, қуанышымызға ортақтасып келгендеріңізге көп рақмет! Қош сау болыңыздар!
Қорытынды ән мәтіні
Қош бол, құтты Әліппем!
Көп нәрсені үйреттің.
Таныстырдың әріппен,
Тақылдатып сөйлеттің.
А, Ә, Б, В… а, ә, б, в…
Өзім оқып кітапты,
Жалынбадым ағама.
Қуанды анам оқуымнан,
Алған бестік бағама.
А, Ә, Б, В… а, ә, б, в…
Қош бол, құтты Әліппем!
Тіл тұсауын кестің сен.
Аяулы апам болып сен,
Айыбымды кештің сен.
А, Ә, Б, В… а, ә, б, в…