Уайымға салынудан алшақ бол

Жігіттің екі сөйлегені — өлгені. Уәде бермеуге тырыс. Ал уәде берсең, міндетті түрде орында.

Қысқа да нұсқа сөйле. Дауысың анық болсын.

Көп тыңда, аз сөйле. Айтқан сөзіңнің артынан ісіңмен үлгеруге бар күшіңді сал.

Өсек айтылатын жерде болма. Кездейсоқ тап болсаң, қосылма; тоқтатуға тырыс.

Таспен атқанды аспен ат — жеңісің. Содан кейін алшақ жүр.

Ренжітпе. Жүйелі қарғыс иесін табады.

Ешқашан мақтанба. Сені жұрт мақтасын.

Өзіңді сыйла — өзгелер де сыйласын.

Күн сайын өзіңе есеп бер. Өзіңді тәрбиелеуді тоқтатпа.

Құмар ойын — әлсіздің әлегі. Мықтының рухы биік, денесі шымыр.

Үйретері мол мықтылардан ұстаз таңда. Бірақ ешкімді пір тұтпа.

Сыйлағанның құлы бол. Кішірею — төмендеу емес.

Ең алдымен өзіңе өзіңнің көңілің толатындай өмір сүр.

Қайтарымынан үміт етсең, жақсылық жасама.

Жүйкең саған әлі талай қажет болады. Болмашыға тоздырма; шешуші сәттерге бапта.

Уайымға берілме. Арба да сынбайтын, өгіз де өлмейтін шешім ізде. Батыл қадам жаса: тәуекел түбі — жел қайық, жүзесің де өтесің; уайым түбі — тұңғиық, батасың да кетесің.

Сырыңды ешкімге алдыртпа. Екі елі аузыңа сыймаған сөз өзгенің отыз екі тісінің арасына тіпті де сыймайды.

Өкпелеме, өш алма. Санасына жеткіз. Аллаға тапсыр.

Қыран құстай қырағы бол. Өзгелерді өзіңдей көрме.

Пенденің пендеден айырмасы — адамгершілігі мен білімінде. Таны, оқы.

Өнер үйрен. Мамандығыңда мықты бол.

Өміріңнің сапасына тек өзің жауаптысың.

Ұрпақ тәрбиесінің елу пайызы сенің мойныңда. Ұлың өзіңнен озсын. Қызың саған қарап серігін тауып, бақытты болсын.

Кім қанша төмен түссе де, сен өз биігіңде қал.