Қазақша рефераттар

Айба апай

Балалардың денсаулығы — ұлт саулығы

Бұл спорттық ойын-сауықтың негізгі идеясы — балаларды қозғалысқа баулу, ұйымшылдықты нығайту және салауатты өмір салтын күнделікті дағдыға айналдыру. Қатысушылар күш-қуатты, ептілікті, секіргіштікті дамытып, шымырлық пен сымбаттылыққа тәрбиеленеді.

Мақсаты

  • Ортақ мақсатқа жұмыла бірігуге, ұйымшылдыққа баулу.
  • Қимыл-әрекет дағдыларын жетілдіру, спортқа қызығушылық ояту.
  • Салауатты өмір салтын насихаттау және тұрақты жаттығуға шақыру.
  • Ептілік, күш-қуат, секіргіштік пен шымырлықты дамыту.

Әдіс-тәсілдер

көрсету түсіндіру сұрақ-жауап Монтессори дәстүрден тыс тәсілдер

Сабақ форматы ойын арқылы ұйымдастырылып, әр кезеңде қауіпсіздік ережелері ескертіледі және дұрыс орындау үлгісі көрсетіледі.

Көрнекіліктер

Интерактивті тақта, кішкентай доптар, шелектер, күректер, әуе шарлары, кубиктер, таяқшалар, шығыршықтар, орамалдар, жіптер, гүлдер, көбелектер, қыстырғыштар, кедергілер, кеглилер.

Іс-шараның жүру барысы

Құрметті ата-аналар, әріптестер және бүлдіршіндер! Бүгінгі «Балалардың денсаулығы — ұлт саулығы» атты спорттық ойын-сауыққа қош келдіңіздер. Сайыс басталар алдында әділқазы алқасымен танысып өтейік:

Әділқазы алқасы

  1. 1Балабақша меңгерушісі — Гүлнар апай.
  2. 2Балабақша медбикесі — Нәсіп апай.
  3. 3Балабақша психологы — Айба апай.

Келесі кезекте сайысқа қатысушы «Күштілер» және «Шымырлар» топтарын ортаға шақырамыз. Балалар залға бірінің артынан бірі тізбектеле кіріп, қолдарына жалау ұстайды.

Сайыс кезеңдері

1) «Көңілді әуе шарлар»

Әуе шарын қолда ұстап, кеглилердің арасымен өтіп, межені айналып, кері қарай жүгіріп келу.

2) «Кім ұқыпты?»

Шығыршықтан секіріп өтіп, жерде жатқан көбелектерді жоғарыда тұрған гүлге оралған жіпке қыстырғышпен ілу. Бұл тапсырмада аяқтың ұшымен көтерілу және қолды созу талап етіледі.

3) «Түйілген орамал»

Шығыршықтың ортасынан өтіп, орындық үстіндегі түйілген орамалды алып, командаға жеткізу.

4) «Күлімде, Күн!»

Кубиктердің арасымен өтіп, шеңбер ішінде шашылып жатқан таяқшалардан күн бейнесін құрастыру.

5) «Шынығайық, шымыр болайық!»

Күрекке салынған допты жерге түсірмей, шапшаң түрде шелектің ішіне жеткізіп салу.

Жанды қолдау және қорытынды

Балалар, екі қарсылас топ бір-бірлеріңе сәлем жолдаңдар — сайысымызды бастаймыз! Әр кезең аяқталған сайын әділқазы алқасы бағасын беріп отырады.

Бүгінгі ойын-сауықта балалар өте белсенділік танытты: шапшаңдықтарын көрсетті, ұқыптылық пен ептілікті шыңдады, топпен жұмыс істеудің мәнін сезінді.

Ендігі сөз кезегін әділқазы алқасына береміз. Барлық қатысушыларды жеңістерімен құттықтаймыз!

Тілек

Әрқашан биіктерден көріне беріңдер. Денсаулықтарың мықты, көңілдерің көтеріңкі болсын. Басымыз аман, бауырымыз бүтін болсын!

«Балалардың денсаулығы — ұлт саулығы» атты спорттық ойын-сауық осымен тәмам. Келіп тамашалағандарыңызға рахмет!