Ата мен әжеге амандасу
Ұйымдастырылған оқу іс-әрекеті туралы
Білім саласы
Қатынас
Бөлімдері
Көркем әдебиет, тіл дамыту
Тақырыбы
Менің отбасым
Мақсаты
Отбасы туралы түсінік беру; әр баланы өз отбасын қадірлеуге және сыйлауға үйрету.
Міндеттері
- Білімділік: отбасы мүшелерін атау, сұрақ-жауап арқылы сұхбат құру; тақпақ, санамақ жаттау; «Кім жоқ?» ойыны арқылы атауларды бекіту.
- Дамытушылық: есте сақтау, көру, ойлау, сөйлеу және танымдық үдерістерді дамыту; қиялын, қызығушылығын арттыру; зейінді шоғырландыру.
- Тәрбиелік: үлкендерді құрметтеуге, сыйлауға және адамгершілікке тәрбиелеу.
Әдіс-тәсілдері мен көрнекілігі
Әдіс-тәсілдері:
түсіндіру, көрсету, сұрақ-жауап, әңгімелеу, суретпен жұмыс.
Көрнекілігі:
отбасы суреті, үй макеті, дидактикалық материалдар.
Сабақтың кезеңдері
Бұл жоспар балалардың сөйлеу дағдысын дамытып, отбасы құндылықтарын түсіндіруге бағытталған. Әр кезең қысқа диалог, ойын және жаттығулар арқылы бекітіледі.
1) Мотивациялық-қозғаушы кезең
Тәрбиеші балаларды қонақтармен сәлемдесуге шақырады: «Сәлемдесу — тәрбиенің басы».
Шаттық шеңбері (ленталарды ұстап тұрып айту):
- Бақыт — біздің сиқырлы шеңберіміз!
- Бақыт — біздің достарға сенгеніміз!
- Бақыт — біздің жарқын болашағымыз!
- Бақыт — біздің тату-тәтті отбасымыз!
- Бақыт — біздің балабақшаға келгеніміз!
2) Ұйымдастыру кезеңі
Сұрақ-жауап:
— Қазір қай мезгіл? — Қыс мезгілі.
— Қыс мезгілі қандай болады? — Салқын болады, қар жауады, адамдар жылы киінеді, аяз түседі, боран соғады. Біз шанамен де балабақшаға келеміз.
3) Ізденіс-ұйымдастыру кезеңі
Суреттермен жұмыс
Бүгін біз отбасы туралы әңгімелейміз. Отбасы — бір үйде тұратын ең жақын адамдар. Отбасы мүшелері: ата, әже, әке, ана, аға, апа, іні, қарындас.
Бізге үлкендердің көмегі мен сүйіспеншілігі қажет. Ата мен әже тыныштық пен демалысты жақсы көреді.
Ғажайып сәт
«Балалар, бізге көрші ауылдан ата мен әже келіпті! Қане, қарсы алайық!» Балалар ата мен әжемен амандасады:
- Ер балалар: «Ассалаумағалейкум, ата!»
- Барлығы: «Сәлеметсіз бе, әже?»
Ата мен әже: «Балалар, қандай өнерлерің бар? Көрейік». Балалар: «Біз сіздерге отбасы туралы тақпақ айтып береміз».
Мақал-мәтелдер (түсіндірумен)
- Балалы үй — базар, баласыз үй — мазар.
- Ата тілін алмаған ұлдан без, ана тілін алмаған қыздан без.
Балалар: «Рахмет, әже! Біз үлкендердің айтқанын тыңдап, ақылды бала болып өсеміз».
Сергіту сәті (саусақ жаттығуы)
- Бас бармағым — атам, үйдің данасы,
- Балан үйрек — әжем, ошақ анасы,
- Ортан терек — әкем, отау панасы,
- Шылдыр шүмек — шешем, шаңырақ ажары,
- Кішкентай бөбек — мен, бәрінің базары.
Фонетикалық жаттығулар
Хормен қайталау
- А-а-а — ата
- Ә-ә-ә — әже
- Ә-ә-ә — әке
- А-а-а — ана
Жеке жұмыс
Балалар отбасы суреттері бойынша қысқа әңгіме құрайды: «Мынау — менің атам. Мынау — менің әжем. Мынау — менің әкем. Мынау — менің анам. Мынау — мен. Менің атым — Хидаят».
Дидактикалық ойын: «Кім жоқ?»
Үйдің ішіне отбасы мүшелерінің суреттері ілінеді (ата, әже, әке, ана, аға, қарындас). Бір сурет алынып тасталады. Балалар қай мүшенің жоқ екенін айтады және суреттерді өздері қайта орналастырады.
4) Рефлексивті-коррекциялаушы кезең
Қорытынды сұрақтар
- — Бүгін кімдермен таныстық? — Отбасы мүшелерімен.
- — Отбасы мүшелеріне кімдер жатады? — Ата, әже, әке, ана, аға, апа, іні, қарындас.
- — Біз қандай отбасымыз? — Біз бақытты отбасымыз.
- — Біз қай елде тұрамыз? — Тәуелсіз Қазақстанда.
Негізгі ой
Отбасы — кіші Отан. Сол «Отанды» тату-тәтті ету үшін туыстармен, әсіресе бауырлармен бір-біріңе мейірімді болып, сыйластықта өмір сүру маңызды.
Қамқорлық тапсырмасы
Ата мен әже: «Балалар, бізге көмектесіңдерші. Екеуміздің құрал-жабдықтарымыз араласып кетіпті — ажыратып беріңдер». Балалар құралдарды бөліп, реттеп береді.
Ата мен әже: «Көп рақмет, балалар! Сендер тәрбиелі, ақылды, үлкенді сыйлай білетін азамат болып өсіңдер. Үлкендердің ақылын тыңдаңдар. Балабақша — сендердің екінші үйлерің».
Соңында ата мен әже балаларды мадақтап, сыйлықтарын таратады.