Отбасылық тәрбиенің озық үлгілерін насихаттау
Ата-ана жиналысы
Бағыт
Отбасылық тәрбие
Нысана
Мектеп–ата-ана ынтымақтастығы
Құндылық
Үлкенді сыйлау, әдеп
Мақсаты
- Отбасылық тәрбиенің озық үлгілерін насихаттау.
- Ата-аналардың мектеппен тұрақты қарым-қатынасын күшейту, белсенді педагогикалық ұстаным қалыптастыру.
- Үлкенді сыйлауға, ілтипатты болуға, ата-ана алдындағы парызды түсінуге тәрбиелеу.
Кіріспе сөз
Ой-санасы дамыған, адамгершілік және дене тұрғысынан салауатты, мәдениетті тұлғаны жан-жақты қалыптастыруды көздейтін тәрбие мәселелері мектепті де, ата-ананы да әрдайым толғандырады.
Тәрбие жұмысының табысты болуының басты кепілі — мектеп пен ата-аналар арасындағы ынтымақтастыққа негізделген қарым-қатынас. Өйткені балаға ең алғашқы бағыт-бағдар беретін, адамзат бесігін тербеткен бас ұстаз — ата-ана. Отбасында адам бойындағы асыл қасиеттер жарқырай көрініп, берік қалыптасады.
Отанға деген ыстық сезім жақындарыңа, туған-туысқандарыңа деген сүйіспеншіліктен басталады. Ел сөзіне сүйенсек, бала әкеден — ақыл, анадан — мейір алып өседі.
Әр ата-ана баласының тәрбиелі, білімді, мәдениетті болғанын қалайды. Ал адам өмірінің мәні мен сұлулығы — баланың ата-анасын ардақ тұтып, өзінің перзенттік парызын бір сәтке де ұмытпауында. Сондықтан бүгінгі жиналысты ата-ана туралы ұлағатты сөздерден бастау орынды.
Оқушылардың ұлағатты сөздері
«Ата-ананы ұмытқан жас — опасыздың опасызы, рақымсыздың рақымсызы».
«Ата-ана қадірін білмеген — халық қадірін білмес».
«Ата-бабасын сыйламау — азғындықтың белгісі».
«Баланың жақсысы — әке мен шешенің ары, ата-ананың абыройы; жаманы — қайғысы, азап-соры».
«Балаға берілетін алғашқы тәрбие — ата-анасын, туған-туысын, жолдасын сыйлауға үйретуден басталады. Себебі ата-анасын сыйламаған бала жолдасына да, қоғамға да пайда келтіре алмайды».
«Адамның қалыптасуы бала кезден басталады. Жақсылық та нақ сол кезде егіледі. Ол жылдар өте өнеді: жақсылық ұрығы көктеді ме, әлде жамандықтың арамшөптері басып кетті ме — сонда ғана белгілі болады».
«Ана жүрегін сезе біл: оның жанарынан шапағат пен тыныштықты, бақыт пен қуанышты, алаңдаушылық пен мазасыздықты, абыржу мен ренішті көре біл. Егер бала кезден анаңның көзінен жан дүниесін оқуды үйренбесең, адамгершілік жағынан өмір бойы тәрбиесіз болып қаласың».
«Кімнің үйінде қартайған әке-шешесі немесе атасы мен әжесі секілді қымбат қонағы болса, оны Құдайдың құрметті өкілі деп білгені жөн. Егер үй иесі оларға дұрыс қарап, қамқорлық жасаса, ата-анасы — отбасының құты».
«Тәртіп көрген адам бала күнінде, өнерімен қуандырар түбінде».
«Жақсы тәртіп әдетке айналса — ырыс, жаман тәртіп әдетке айналса — қырсық».
«Тәртіптің ең тамаша мектебі — отбасы».
Рақмет, балалар. Ата-ана алдындағы әдептілік — кішкентай кезден бойға сіңген асыл қасиет. Сол құндылықтарың өмір бойы серік болсын.
Қоғамдық міндет және бірлескен тәрбие
Бүгінгі қоғам алдындағы ортақ мақсат — өмірдің барлық саласында белсенді, шығармашылық іс-әрекетке қабілетті, еркін тұлға тәрбиелеу.
Бұл үшін бала тәрбиесіне жауапты отбасы, балабақша, мектеп, қоғам және жұртшылықтың тәрбие жұмысы өзара кіріктіріліп, бір бағытта жүзеге асуы қажет. Себебі отбасына мектеп тарапынан білікті қолдау маңызды. Педагогтер мен ата-аналардың өзара ықпалдастығы арқылы ғана оқушы тұлғасын дамыту міндеттері табысты шешіледі.
Талқылауға ұсыныс
Осы мақсатта қазақ тілі пәнінің маманы Садықова Ә. С.-қызының «Мектеп, оқушы, ата-ана» тақырыбындағы ой-пікірін тыңдауға шақырамыз.
Қорытынды мәлімет
- Білім беру ұйымы
- Ш. Башиков атындағы негізгі мектеп КММ
- Сынып жетекшісі
- 8-сынып: Үсенова Айым Үсенқызы