Машаның сүйікті тамағы
Сабақтың мақсаты мен бағыт-бағдары
- Балалардың қарапайым математикалық түсініктерін қалыптастыру.
- Саусақ моторикасын дамыту (сенсорикалық әрекеттер арқылы).
- Логикалық тапсырмалар арқылы ойлау мен есте сақтау қабілетін жетілдіру.
- Тапқырлыққа, қайырымдылыққа тәрбиелеу және өзара көмекке баулу.
Шаттық шеңбер
Жылы амандасу
Арайлап таң атты,
Алтын сәуле таратты.
Жадырайды даламыз,
Жарқырайды қаламыз.
Қайырлы таң, достарым!
Қайырлы таң, апайлар!
Қызықты сәт: Маша мен Аюдың оқиғасы
Залда «Маша мен Аю» әуені ойнап, көңілсіз Аю кіріп келеді:
Аю:
— Сәлеметсіңдер ме, балалар!
Балалар:
— Сәлеметсіз бе, Аю!
Аю:
— Балалар, сендер Машаны көрмедіңдер ме? Білмеймін, қайда кетіп қалды. Аулада тұрған зымыранымның қасында да жоқ. Әне бір тентек қыз қайда жүр екен?
Тәрбиеші:
— Аю, уайымдама. Біз бір амалын табамыз. Балалар көмектеседі, солай ма?
Балалар: — Иә, көмектесеміз!
Зымыран құрастыру (геометриялық пішіндермен)
Тәрбиеші балалардан зымыранның не екенін сұрап, суретін көрсетеді. Содан кейін балаларға ұсыныс жасайды:
Үшбұрыш
Ұшар басын құрастыруға.
Төртбұрыш
Негізгі бөлігін құрастыруға.
Дөңгелек
Терезе не бөлшек ретінде.
Дидактикалық ойын: «Зымыран құрау»
Балалар геометриялық пішіндерден сенсорикалық әдіспен зымыран құрастырады: ілгек, «замок», жапсырма сияқты бекітпелер арқылы бөлшектерді біріктіреді.
Тәрбиеші: — Көрдің бе, Аю? Балалар зымыран жасады. Енді аспан әлеміне барып, Машаны іздеуге көмектесеміз.
Аю: — Менің зымыраныма ұқсайды екен!
Аспан әлеміне сапар
Тәрбиеші балаларға аспан әлемінің үлкен, қызықты және әдемі екенін айтады. Ұшу үшін скафандр кию керектігін түсіндіреді, өйткені онда ауа жеткіліксіз.
Балалар көздерін жұмып, қиялмен «зымыранға мініп», аспан әлеміне «ұшады». Келген соң тәрбиеші ғарыш кеңістігімен және ғаламшарлармен таныстырады.
Аю: — Маша, қайда екен?
Тәрбиеші: — Мына ғаламшарлардың қай жерінде жүр екен? Мүмкін, бізге жұлдызшалар көмектесер. Жол көрсетер.
Жұлдызшалардың тапсырмалары
Машаны табу үшін балалар жұлдызшалар дайындаған тапсырмаларды орындайды. Әр тапсырма — ойлануға, санауға және жауапты дәл айтуға шақырады.
1-тапсырма: Сұрақтарға жауап бер
Ең әуелі жыл мезгілдерін атаңдар.
2-тапсырма: Есеп
Пісіп тұрған төрт алмұрт,
Қызығады көрген жұрт.
Екі алмұртты бұтақтан
Алып жеді Ердәулет.
Қанша қалды алмұрттан?
3-тапсырма: Салыстыр
Аспанда үлкен жұлдыз көп пе, әлде кішкентай жұлдыз көп пе?
4-тапсырма: Санамақ айт
Кезекпен санамақтар айтып беріңдер.
Аю: — Балалар, мен шаршадым. Маша табылатын емес. Енді не істейміз?
Тәрбиеші: — Сергіп алайық. Табылады, уайымдама!
Сергіту сәті
Ал, санайық: 1, 2,
Томпаңдап біз билейік.
Аяғымыз қайда екен?
Міне, аяқ — алақай!
1, 2 деп басайық,
Айналып біз алайық.
Тағы екі маңызды тапсырма
5-тапсырма: Есеп
Үйге келді Алдияр,
Оған қоса Мадияр,
Кейін келді Айдана.
Қанша болды бар бала?
6-тапсырма: Сұрақ
Машаның сүйікті тамағы қандай?
Аю: — Айтпақшы, мен ботқа пісіріп алып шыққан едім. Оның да қарны ашқан шығар.
Аю балаларға ботқаның суреті салынған карточкаларды таратады.
Тәрбиеші: — Аю, сенде де, Машада да ботқа жоқ. Балалар, Маша мен Аюға неше ботқа керек?
Балалар: — Екеу керек.
Сол сәтте Маша шығып:
— Қандай керемет иіс! Ботқаның иісі ғой. Қарным ашты, мен де жейін.
Тәрбиеші: — Маша, табылдың ба? Қайда кетіп қалдың?
Аю: — Неге сұранбай кетіп қалдың?
Маша: — Кешіріңдерші. Енді сұранбай ешқайда кетпеймін.
Қозғалыс ойыны: «Өз үйіңді тап»
Аю шаршағанын айтып, ұйықтағысы келеді. Тәрбиеші оны ұйықтатпай, балалармен бірге ойын ойнауды ұсынады. Содан кейін бәрі зымыранмен қайта оралады.
Ойынның барысы
- Балаларға үшбұрыш, төртбұрыш және дөңгелек суреттері таратылады.
- Балалар Аюды оятып, тақпақпен шақырады.
- Аю қуғанда әр бала өзіне сәйкес пішінге барып тығылады.
- Ойын бірнеше рет қайталанады.
Аю, аю, тұршы,
Ұйқыдан ояншы.
Ұйқыңды ашшы,
Жан-жағыңа қарашы.
Енді бізді қушы.
Жылы тілектер: «Күннің жылуын сыйлау»
Машаны тапқан соң, тәрбиеші балаларға бір-біріне күннің жылуын сыйлауды ұсынады.
Шеңбер болып тұрайық,
Алақанды ашайық.
Күннің нұрын салайық,
Жиналған жылы шуақты
Қонақтарға шашайық.
Қорытындылау сұрақтары
Рефлексия
- Бүгінгі сабақ ұнады ма?
- Біз қайда бардық? (Аспан әлеміне.)
- Аспан әлеміне немен бардық? (Зымыранмен.)
- Зымыранды қайдан алдық? (Өзіміз жасап алдық.)
- Ол қандай пішіндерден жасалды? (Үшбұрыш, төртбұрыш, дөңгелек.)
- Тапсырмадағы есептер оңай болды ма?
Соңында балалар «зымыранға мініп», өз тобына қайта оралады.