Балама сұрақ
Таңғажайып алаң (шоу)
Жүргізуші: Аралбаева Рита
Тақырыбы: Тәуелсіздік — қазақтың сан ғасырлық арманы
Мақсаты
- Балабақша мен ата-ана арасындағы тығыз байланысты қалыптастыру.
- Балалардың ойлау қабілетін дамыту, сөйлеу мәдениетінің дұрыс қалыптасуына жүйелі қолдау көрсету.
- Тәуелсіздікті қадірлейтін, білімді, жан-жақты дамыған, батыл әрі намысты ұрпақ — шынайы патриоттарды тәрбиелеу.
Түрі мен әдісі
Түрі: ойын-шоу
Әдісі: сұрақ–жауап
Көрнекіліктер
- Интерактивті тақта
- Музыкалық үнтаспа
- Музыкалық аспаптар
Ұйымдастыру және кіріспе сөз
Армысыздар, қадірменді қонақтар, әріптестер, ата-аналар және аяулы бүлдіршіндер! Биыл еліміз үшін үлкен мереке — Қазақстан Республикасы Тәуелсіздігінің 25 жылдығы. Айтулы мереке қарсаңында республикамыздың түкпір-түкпірінде қызу дайындық жұмыстары жүретіні белгілі.
Осы орайда «Балапан» балабақшасында өтетін «Тәуелсіздік — қазақтың сан ғасырлық арманы» атты мерекелік шоуымызға қош келдіңіздер! Бүгінгі «Таңғажайып алаң» ойынына бүлдіршіндеріміздің ардақты ата-аналары мен ақ жаулықты әжелері қатысады.
Рәсім
I. Қазақстан Республикасының Мемлекеттік Әнұраны орындалады.
Міне, біз де кешіктірмей, көпшілікті күттірмей «Таңғажайып алаң» шоуын бастаймыз.
Ойыншыларды ортаға шақырамыз.
1-кезең: Алғашқы үштікпен танысу
1-ойыншы
Аманжол Әсемайдың анасы, Әсемайға ақыл айтатын данасы, қорған болар панасы — Шүкірәлі Айғара.
2-ойыншы
Есекеева Таңуыздың ақжаулықты әжесі, сый-құрметтің иесі — Айшагүл апай.
3-ойыншы
Қонақбай Ақмаржанның анасы, бөбегіне қорған болған сұлу да сымбатты жан — Бисебаева Айдана.
Ойын шарты
I. Сұрақ және жасырылған сөз
- Сұрақ беріледі, жауабы ұяшықтарда жасырылған.
- Егер сөзді бірден тапсаңыз — бірден жауап беруге болады.
- Қиын болса, бір әріп айтуға рұқсат етіледі: әріп ұяшықта болса ашылады, болмаса кезек келесі ойыншыға өтеді.
II. Барабандағы шартты белгілер
Ойыншы өз қалаған әрпін ашуға мүмкіндік алады.
Ойыншының ұпайлары сақталады, ал ойын келесі қатысушыға өтеді.
Сұрақ
Қазақстан Президенті Нұрсұлтан Әбішұлы Назарбаев: «Бұл — өлшеусіз еңбегіміздің ширек ғасырлық белесін қорытындылайтын мерейлі сәт. Оны баянды ету — оған қол жеткізуден де қиын», — деген болатын. Елбасы бұл сөзімен нені меңзеді?
Балама сұрақ
Елбасымыз: «Әрбір елдің жылнамасында оның жаңа тарихының бастауы болған тағдыр шешті таңдар болады. Біз үшін жаңа дәуірдің арайлы таңы атты», — деген. 16 желтоқсан қазақ тарихында қандай күн?
Дұрыс жауап берген ойыншы ақтық мәреге жолдама алады. Құттықтаймыз!
Алғашқы үштікке арналған сыйлықтар «Таңғажайып алаңға» әкелінсін.
2-кезең: Келесі үштік
1-ойыншы
Қаржаубай Ақжүректің анасы, жылы сөзі жанға шипа болатын ақ халатты абзал жан — Шамшатова Гүлмира.
2-ойыншы
Мұзбалақ ақын Мұқағали Мақатаевтың аттасы Серікқали Мұқағалидың анасы, дизайн өнерінің хас шебері — Алматова Гүлзат.
3-ойыншы
Телағыс Бағдәулеттің анасы, қамқоршысы әрі санасына сәуле құйған данасы — Мұратова Алтынкүл.
Сұрақ
Қазақстан Республикасының Тәуелсіздігін ең алғаш ресми түрде мойындаған қай мемлекет? «Тәуелсіздігімізді ең алғаш болып бауырлас Түркия мемлекеті мойындады» деген пікірдің толық ақиқат еместігін де ескерген жөн: Түркия Қазақстанда өз елшілігін алғашқылардың бірі болып ашқанымен, тәуелсіздігімізді мойындаған мемлекеттердің ішінде он жетінші болды.
Балама сұрақ
Мұхиттың арғы жағында орналасқан алпауыт мемлекет.
Ойын шарты бойынша жеңімпаз — біреу. Дұрыс жауап берген ойыншы ақтық мәреге жолдама алады. Құттықтаймыз!
Екінші үштікке арналған сыйлықтар «Таңғажайып алаңға» әкелінсін.