Нұрға толы бүкіл әлем сіздің жүрегіңізде. Сабақтың барысы

Ұйымдастыру кезеңі

Сабақты бастамас бұрын «5Т» ережесін еске түсірейік. Сыныптағы тәртіпті сақтап, оқуға ынтамен кірісіп, тыныштық орнатып, тазалыққа мән беріп, бүгінгі күнімізді татулықпен өткізейік.

Тәртіп

Сабақта жинақылық пен жауапкершілік.

Талап

Өзімізден жоғары нәтиже күту.

Тыныштық

Назарды бір жерге шоғырландыру.

Тазалық

Ортаны да, ойды да таза ұстау.

Татулық

Құрмет пен бірлікке негізделген қарым-қатынас.

Тыныштық сәті: «Нұрға бөлену»

Ыңғайланып отырыңыздар, денелеріңізді түзу ұстаңыздар. Аяқ-қолыңызды айқастырмай, қолыңызды тізеге немесе үстелге қойыңыздар. Көздеріңізді жұмуды өтінемін.

5–7 минут

Жаттығудың барысы

Күн сәулесі төбеңізден өтіп, кеудеңізге қарай жылжып бара жатқанын елестетіңіз.
Кеудеңіздің ортасында гүл түйнегі бар. Ол нұрдан баяу ашылып келеді.
Нұр сіздің ойыңызды, сезіміңізді, эмоцияңызды тазалап, жүрегіңізді аша түседі.
Нұрды қолыңызға түсіріңіз: қолдарыңыз тек жақсы, ізгі істерге қызмет етеді.
Нұр аяқтарыңызға тарасын: аяқтарыңыз сізді жақсылыққа бастайтын жолдарға апарады.
Нұр тіліңізге жетсін: тіліңіз тек шындықты және ізгі сөзді айтады.
Нұр құлағыңызға бағытталсын: құлағыңыз тек жақсы сөз бен әсем әуенді естиді.
Нұр көзіңізге жетсін: көзіңіз әр нәрседен жақсылықты көреді.
Басыңыз түгелдей нұрға толсын: санаңызға сәулелі ойлар келсін.

Нұрды кеңейту және бекіту

Нұр бірте-бірте күшейіп, бүкіл денеңізден сыртқа тарай бастағанын сезініңіз. Енді осы нұрды туыстарыңызға, мұғалімдеріңізге, достарыңызға, таныстарыңызға бағыттаңыз.

Уақытша түсініспей, ренжісіп жүрген адамдарға да нұр бағыттаңыз. Олардың да жүрегі нұрға толсын.

Нұр бүкіл әлемге — адамдарға, жан-жануарларға, өсімдіктерге, тірі жандардың бәріне таралсын. Ғаламның түкпір-түкпіріне сәуле жолдаңыз.

Ойша қайталау

«Мен нұрлымын… Нұр менің ішімде… Мен — Нұрмын».

Осы Нұр, Махаббат және Тыныштық күйінде аз ғана отырыңыз. Енді нұрды жүрегіңізге орналастырыңыз: нұрға толы бүкіл әлем сіздің жүрегіңізде. Осы әсем күйді сақтап, жаймен көзіңізді ашыңыз. Рахмет!

Үй тапсырмасын тексеру

№2-сабақ

«Бар ғылымның түп атасы — таза ақыл мен ойлану» деген ойды көзқарас – себеп – мысал – қорытынды әдісімен талқылаңыздар.

Келесі сабаққа дайындық (№3)

«Неге арналсаң, соны істе» мәтінін оқып келу.

Автордың «Неге арналсаң, соны істе» дегенін қалай түсінесің? Өмірден нақты мысал келтір.
«Өз орнындағы адамның жұмысы да өнімді, берекелі болмақ» деген тұжырыммен келісесің бе? Неліктен?
Өз мүмкіндігі мен қабілетінің арқасында биік нәтижеге жеткен адамдарды білесің бе?
Өзің өмір жолыңда нені басшылыққа аласың?

Дәйексөз және талқылау

Халық даналығы

Еңбек түбі — қуаныш.

Сұрақтар

Еңбек адамға не үшін қажет деп ойлайсыңдар?
Еңбекқор деп қандай адамды айтамыз?
Өздерің қандай еңбекпен айналысқанды ұнатасыңдар?
Дәйексөзден қандай ой түйдіңдер?

Қорытынды ой

Еңбек еткен адамның еңбегі елеусіз қалмайды. Еңбек тәрбиелейді, күш береді, қуантады, бақытқа жетелейді, өмір сүруге үйретеді, үнемшілдікке баулиды, жігерлендіреді, шынықтырады.

Абай атамыз: «Еңбек — қуаныш, жалқаулық — айырмас азап» деген.

Біздің ең алғашқы еңбегіміз — білім. Көп оқып, тәртіпті болып, сабақты жақсы меңгерсек, болашақта жақсы оқу орындарына түсіп, еңбегіміздің жемісін көреміз. Сондықтан денсаулығымызды күтіп, мақсатымызға жетуге ұмтылайық.

Оқиға айту (Мұғалім сыйы)

«Миллионыншы талпыныс»

1942 жыл, Венесуэла

1942 жылы Венесуэлада үш адам бірнеше ай бойы алмас іздеп жүреді. Олар ұзақ жол жүріп, талай тауды аралап, «алмас па екен» деп қаншама жай тас жинайды. Бірақ құр тастан басқа ештеңе таппайды.

Үшеудің бірі, Рафаэль Солано, бір көлшіктің жағасына келгенде достарына: «Мен шаршадым. Әрі қарай жүрудің мағынасы жоқ. Мына тасқа қараңыздаршы: мен 999 999 тас терген шығармын, бірақ олардың ішінде бірде-бір алмас жоқ. Тағы бір тас алсам, миллионыншы тасыма толады. Бірақ несіне босқа әуре болайын? Алмас іздеуден бас тартамын», — дейді.

Бір досы қалжыңдап: «Ендеше, бір тас теріп, миллионыңды толтырсаңшы», — дейді. Солано да әзілге әзілмен: «Жарайды, дәл солай болсын. Бас тартпас бұрын соңғы тасымды теріп алайын», — деп жауап береді.

Ол шаршаған көзін жұмып, қасындағы үйіндіден жұмыртқадай бір тасты таңдап алып: «Міне, соңғы тасымды да алдым. Миллион тас терген болдым. Соңғы тасым осы!» — дейді. Бірақ бұл тас әдеттегі тастан едәуір ауыр болып шығады. Солано қайта өлшеп көріп: «Бұл алмас қой! Бұл расында да үлкен алмас!» — деп қуанады.

Кейін Нью-Йорктегі зергер оның тасы үшін жүз мыңдаған доллар төлеп сатып алады. «The Liberator» («Азаткер») деп аталған бұл алмас әлемдегі ең таза әрі ірі алмастардың бірі екені анықталады.

Талқылау сұрақтары

Венесуэлада үш адам не іздеді?
Рафаэль Солано не деді?
Досы оған қалай жауап берді?
Солано миллионыншы тасын қалай алды?
Соңғы алған тасы қандай болып шықты?
Адамдардың кейде арманына жете алмауының себебі неде?
Адам мүмкіндігінің шексіз екенін тағы немен дәлелдер едің?

Ой түйін

Кейде ең үлкен нәтиже — дәл соңғы қадамның ар жағында тұрады. Табандылық — мүмкіндіктің кілті.

Шығармашылық жұмыс, топпен жұмыс

Топтарға бөлініп, әр топқа бір қасиет беріледі. Тапсырма: «Еңбек етсең ерінбей, тояды қарның тіленбей» тақырыбына сурет салу.

1-топ

Білуге құштарлық

2-топ

Еңбекқорлық

3-топ

Қабілеттілік

4-топ

Дарындылық

5-топ

Табандылық

Топпен ән айту

«Асыл арман»

Сөзі: Б. Тәжібаев • Әні: Е. Хасанғалиев

Арманым, ақ сәулелі күнімбісің,
Әлдебір алаулаған гүлімбісің.
Әлдебір желпіп өткен самал ма едің,
Арманым, айтарым көп саған менің.

Асыл арман, асыл арман,
Көгімде шалқып ұшқан құсым ба едің?
Асыл арман, аспанымда жарқылдаған
Құсым ба едің?
Мен сенің құдіретіңе түсінбедім.

Арманым, құздан құлар бұлақпысың,
Әлдебір күлімдеген шырақпысың.
Әлдебір албыраған ай ма екенсің,
Арманым, айтшы маған, қайда екенсің?

Қайырмасы қайталанады.

Үй тапсырмасы

№3-сабақ

«Адамның мүмкіндіктері шексіз» тақырыбына эссе жазу.

Келесі сабаққа

№4: «Мәдениет пен билік салмағы» мәтінін оқып келу.

Сабақтың қорытынды сәті

Тыныс алуға зейін қоямыз. Баяу музыка қосылады. Аяқ-қолыңызды айқастырмай, түзу отырыңыз. Тыныс алуға назар аударған кезде ақылымыз да дем алады: ауаны ішке жұтқанда тыныштық пен қуанышты қабылдаймыз, ал сыртқа шығарғанда мазасыздықты шығарамыз.

Нұсқаулық

Көзді жұмамыз.
Арқаны тік ұстаймыз.
Қолды тізеге қоюға болады.
Баяу тыныс аламыз да, жаймен шығарамыз (9–10 рет).

Бүгінгі сабақта меңгерген жақсы қасиеттерді еске түсіріп, жүрегімізге сақтайық.

Материал оқу үдерісіне бейімделіп, тілдік тұрғыдан өңделді.