Сендер қандай ойын ойнағанды қалайсыңдар
Ойнай білу де — өнер
Мақсаты
Оқушылардың достық пен сыйластық құндылықтары туралы түсінігін кеңейту.
Міндеттері
- Шыдамдылық, сабырлылық, ақылдылық сияқты адами қасиеттердің өмірдегі маңызын түсіндіру.
- Жағымды қарым-қатынас жасау дағдыларын дамыту.
- Көпшілдікке, әділдікке, кешірімділікке тәрбиелеу.
Сабақтың барысы
1) Ұйымдастыру кезеңі: тыныштық сәті
Ыңғайланып отырыңыз. Денеңізді түзу ұстаңыз, аяқ-қолыңызды айқастырмаңыз. Қолыңызды тізеңізге немесе үстелге қойыңыз. Көзіңізді жұмып, тынысыңызды бірқалыпты реттеңіз.
Елестетіңіз: күн нұры төбеңізден өтіп, кеудеңізге қарай баяу тарайды. Кеудеңіздің орта тұсында гүл түйнегі бар. Нұр әсерінен түйнек біртіндеп ашылып, балғын да таза гүлге айналады. Ол әр ойыңызды, сезіміңізді, эмоцияңыз бен ниетіңізді тазалап, жүрегіңізді кеңейтеді.
Нұр бүкіл бойыңызға жайылып, біртіндеп күшейеді. Оны ойша қолыңызға бағыттаңыз: қолыңыз нұрға бөленіп, тек жақсы, ізгі істер жасауға және көмектесуге дайын болады. Нұр аяқтарыңызға да тарайды: олар сізді тек игі жерлерге апарады.
Нұр аузыңызға, тіліңізге жетеді: тіліңіз тек шындықты және ізгі сөздерді айтады. Нұр құлақтарыңызға тарайды: құлағыңыз жақсы сөзді, әсем әуенді естиді. Нұр көзіңізге де жетеді: көзіңіз жақсылықты көріп, әр нәрседен игілікті байқайды.
Басыңыз түгел нұрға толып, ойыңызға жарық әрі ізгі ниет келеді. Нұр денеңізден асып, жан-жағыңызға сәуле шашады. Осы нұрды жақындарыңызға, мұғалімдеріңізге, достарыңызға бағыттаңыз. Түсініспей жүрген адамдарға да бағыттаңыз: олардың жүрегі нұрға толсын.
Нұр бүкіл әлемге — адамдарға, жануарларға, өсімдіктерге, барлық тіршілікке таралсын. Іштей айтыңыз: «Мен нұрлымын. Нұр менің ішімде. Мен — Нұрмын.» Осы күйді сақтап, нұрды жүрегіңізге орналастырыңыз. Жаймен көзіңізді ашыңыз. Рақмет.
2) Үй тапсырмасын тексеру: сұрақтар
- 1 Назым мен Шынар неге ренжісіп қалды?
- 2 Ойын кезінде достар өзін қалай ұстауы керек деп ойлайсыңдар?
- 3 Апасы Назымға қандай ақыл айтты?
- 4 Сендердің өмірлеріңде осындай жағдай болды ма? Естеріңе түсіріп, айтып беріңдер.
3) Дәйексөз
«Бәрінен күшті адам — өзіне-өзі ие бола алатын адам».
4) Әңгімелеу (сұхбат)
Сұрақ: Сендер қандай ойын ойнағанды ұнатасыңдар?
Сұрақ: Ойын кезіндегі ең басты нәрсе не деп санайсыңдар?
Мұғалімнің сыйы: «Ойын» атты жаттығу. Бір-біріміздің жақсы қасиеттерімізді атап, жылы лебіз білдіреміз.
Шығармашылық жұмыс және топтық талқылау
1) «Аяқталмаған ойын» (оқиға)
Ауылдың шетінде қарлы төбешікке су құйылып, сырғанақ жасалған. Бірнеше бала сырғанап жүр. Олардың ішінде Ахметовтердің ағайынды балалары — Ақан мен Асан да бар.
Екеуі бір шанаға отырып алып, төмен қарай зымырайды. Беттері қызарып, ойыннан жалығар емес. Таудың басына қайта шыққанда, әдетте шананың алдына Асан отыратын. Бірақ ол абайсызда шанадан айырылып қалды. Бос шана төмен сырғанап кетіп, алыста барып әрең тоқтады.
— Ақан, барып шананы алып кел, — деді Асан.
— Мен бармаймын. Шанаға ие болмаған өзің, өзің бар, — деді Ақан.
— Жоқ, сен барасың. Сен менен кішісің, — деді Асан.
— Бармаймын. Үлкенмін деп жұмсай бересің. Шананы да үнемі мен сүйреймін, — деді Ақан.
— Бармасаң, сырғанақ тепкізбеймін! — деді Асан.
Сөзі өтпеген Асан ашуланып төменге түсті. Шананы жетектеген бойы тауға емес, үйіне қарай бет алды. Ақан не істерін білмей, тау басында аңырап тұрып қалды. Осылайша тіл табыса алмаған екі бауырдың ойыны аяқталмай қалды.
Тапсырма: Сендердің ойларыңша бұл ойынды қалай аяқтауға болады? Екі бауыр қандай сөз айтса, қандай әрекет жасаса, ойын жалғасар еді?
Ән айту, үй тапсырмасы және қорытынды тыныштық
6) Топпен өлең айту: «Айгөлек»
Көлдей шалқып жас өмір Тасып жатқан шағында, Кемерінен шалықтап, Асып жатқан шағында. Ойын ойнап, ән салмай, Өсер бала болар ма? Күміс күлкі көрмей ол, Кемеліне толар ма? Айгөлек-ау, Айгөлек, Айдың жүзі дөңгелек. Айгөлек деп ән шырқап, Ел бөбегі, кел, бөбек.
7) Үй тапсырмасы
«Кімнің жұмысы» атты әңгімені оқып келу.
8) Қорытынды тыныштық сәті
«Тыныштық — бар жерде, тыныштық — бүкіл әлемде». Көзіңізді жұмып, баяу әуен ырғағымен дұрыс әрекет пен мейірімділікті жүрегіңізден өткізіңіз.
Енді көзіңізді ашыңыз. Жұмыстарыңыз үшін рақмет! Сабақ аяқталды.