Қала мен ауыл мәтінін оқу
Сабақтың мақсаты мен күтілетін нәтижелер
Білімдік
- Қала мен ауыл туралы түсінік қалыптастыру.
- Елді мекендердің ұқсастығы мен айырмашылығын анықтату.
- Қалада және ауылда адамдардың қандай қызмет түрлерімен айналысатынын таныту.
- Ауыл шаруашылықтары туралы бастапқы ұғым беру.
- Ауылдың негізгі байлығы — жер екенін түсіндіру.
Дамытушылық және тәрбиелік
- Сөйлеу тілін, ойлау мен есте сақтау қабілетін дамыту.
- Сөздік қорын молайту, пікірін дәлелдеп айтуға үйрету.
- Еңбексүйгіштікке, тиянақтылыққа тәрбиелеу.
Қолданылатын әдіс-тәсілдер
Сабақ барысы
I. Ұйымдастыру кезеңі
Ынтымақтастық атмосферасын қалыптастыру: оқушылардың бір-біріне жылы лебіз айтуы, сыныптағы өзара қолдауды күшейту.
II. Үй тапсырмасын тексеру
- Өткен сабақтың мазмұны бойынша сұрақ-жауап.
- Оқушылардың жазған жұмыстарын оқыту және қысқаша пікір білдіру.
III. Жаңа сабақ
Қызығушылықты ояту
- Қала мен ауылдың ортақ белгілерін анықтау.
- Алдын ала дайындалған сөздер жазылған парақшалар арқылы сызба құрастыру (оқушылар таңдап, тақтаға іледі).
- Талқылау сұрағы: «Ауыл іші — өнер кеніші» дегенді қалай түсінесіңдер?
Мағынаны тану
- Қала мен ауыл адамдарының еңбегі қалай ерекшеленеді?
- Қай еңбек түрі ауылға, қайсысы қалаға тән?
- Қандай өнімдер өндіріледі?
- Қала мен ауылдағы құрылымдардың айырмашылығы неде?
Тақырыптық түсіндіру
Ауылдағы негізгі байлық — Жер-ана. Құнарлы топыраққа не ексең де өнім береді. «Жер де сенің бір анаң» деген сөз осыдан шыққан: жерді күтіп-баптау — берекенің бастауы.
Сергіту сәті
Ұзын құлақ, сұр қоян,
Естіп қалып сыбдырды.
Ойлы-қырлы жерлермен,
Ытқып-ытқып жүгірді.
Оқулық бойынша жұмыс
- Мәтіннің 1-бөлімін оқу. Қала өмірі туралы қандай жаңа ақпарат алдыңдар? (Оқулыққа сүйенуге болады.)
- Мәтіннің 2-бөлімін оқу. Ауыл өмірі туралы не білдіңдер?
- Ойын: «Не ортақ?» Қалада да, ауылда да кездесетін заттарды суреттер жинағынан табу.
- К. Нығметованың әңгімесін оқу. Мәтін бойынша пікір алмасу.
Шығармашылық ойлану
- Болашақта өз ауылыңның көркеюіне қандай үлес қосар едің?
- Өзің қандай шаруашылық түрін ұйымдастырар едің?
- Оны іске асыру үшін не қажет?
Оқушылар өз ойларын жүйелі түрде әңгімелейді, бір-бірінің пікірін толықтырады.
Сабақты қорытындылау
Сұрақтар
- Қаланың келбеті қандай?
- Ауылдың келбеті қандай?
- Олардың бір-бірінен қандай айырмашылығы бар?
Салыстыру
Венн диаграммасы арқылы қала мен ауылдың ұқсастықтары және айырмашылықтары анықталады.
Топтық тапсырма
1-топ
«Ауыл» сөзіне бес жолды өлең құрастыру.
2-топ
«Қала» сөзіне бес жолды өлең құрастыру.
Бағалау
Оқушылардың сабаққа қатысу белсенділігі, жауаптарының толықтығы, топтық жұмысқа қосқан үлесі және шығармашылық тапсырмаларды орындауы бағаланады.
Үй тапсырмасы
Оқу және жазу
- «Қала мен ауыл» мәтінін түсініп оқу.
- «Мен тұратын қала (ауыл)» тақырыбына әңгіме жазу.
- «Менің ауылым» тақырыбына эссе жазу және келесі сабақта оқып беру.
Мәнерлеп оқу және сурет
- «Ауыл» тақырыбын мәнерлеп, түсініп оқу.
- Ауыл көрінісіне сурет салу.