Ана жақсылығын, Ауырсаң білерсің

Ананың көңілі балада,
Баланың көңілі далада.

Жалғыз баласы атқа шапса,
Атасы ауылда тұрып
Тақымын қысады.

Ата - ана балаға сөйлеуді үйретеді, бала ата - анаға аузын жабуды үйретеді.

Ана жақсылығын,
Ауырсаң білерсің.
Қайын жақсылығын,
Қыдырсаң білерсің.

Баланың өзі болғандай,
Келіннің өзі келгендей.

Баланың бас ұстазы — ата - ана.

Ата - ананың сөзі —
Айдын жолдың өзі.
Ақылдының сөзі —
Ақ дарияның өзі.

Бала жетесіз болса,
Ата - анасын жерге қаратады.
Бала жетелі болса,
Ата - анасын елге қаратады.

Қала — халқының салтанаты,
Бала — ата - ананың қолқанаты.

Ата - ананың қадірін
Балалы болғанда білерсің;
Ағайынның қадірін
Жалалы болғанда білерсің.

Мейірімі мол ананың —
Жүрегі жылы, қолы кең.
Кең пейілді атаның
Жүзі жылы, жолы кең.

Ғашық жардың белгісі - ата - анадан бездірер,
Қыран құстың белгісі - таудан тасқа кездірер.

Бала өсірген ата - ана
Бала болып ойнайды.
Бала оқытқан ұстаздар
Бала болып ойлайды.

Ата - анам бар болсын,
Ауыз - мұрны тар болсын.

Әдепті бала ата - анасын мақтатар,
Әдепсіз бала ата - анасын қақсатар.

Ата – анадан жар жақын.

Ата - ананың қадірін балалы болғанда білерсің.