Қазақша рефераттар

Бөлігі бойынша санды табу

Сабақ тақырыбы: Бөлігі бойынша санды табу

Мақсаты

  • Оқушылардың өз бетінше жұмысы арқылы «бөлігі бойынша санды табу» тақырыбы бойынша жүйеленген теориялық ұғым қалыптастыру және есеп шығаруда білімін толықтыру.
  • Есеп шығару әрекеті арқылы теориялық ойлауын және сөйлеу дағдысын дамыту.
  • Ұйымшылдыққа, шапшаңдыққа, әдептілікке тәрбиелеу.

Көрнекілігі

  • Тапсырма мазмұнына қатысты суреттер
  • Тірек-сызба
  • Кеспе қағаздар

Әдістері

Қызығушылығын ояту Сұрақ-жауап Ойын Талдау Өз бетінше жұмыс

Сабақтың барысы

Сабақ үш кезең бойынша ұйымдастырылады: бағдарлау-мотивациялық, операциялық-орындаушылық, рефлексиялық-бағалау.

I. Бағдарлау-мотивациялық кезең

Қызығушылықты оятуға арналған логикалық тапсырма.

Кенгуру тапсырмасы

Дина бір парақ қағазды 10 бөлікке кесті. Содан кейін сол бөліктердің біреуін алып, оны тағы 10 бөлікке бөлді. Алынған бөліктердің тағы екеуін де дәл осылай 10 бөлікке кесті. Динада барлығы неше қағаз бөлігі болды?

A) 27
B) 30
C) 37
D) 40
E) 47

Өз бетінше жұмыс • №1

Қапта 50 кг қант бар. Оны әр дорбаға 2 кг-нан өлшеп салу керек. Осындай неше дорба шығады?

Күтілетін нәтиже

Барлық қант массасын бір дорбаға салынатын қант массасына бөлеміз: 50 : 2 = 25. Демек, 25 дорба.

Өз бетінше жұмыс • №2

Жәшікте 30 кг кәмпит бар. Оны әр дорбаға 3/4 кг-нан бөліп салу керек. Осындай неше дорба шығады?

Күтілетін нәтиже

Бөлу амалын орындаймыз: 30 : 3/4 = (30 × 4) : 3 = 40. Жауабы: 40 дорба.

Мұғалімнің жетекшілігімен • №3

Сыныпта 18 қыз бала бар. Бұл барлық оқушы санының 3/5 бөлігін құрайды. Сыныпта барлығы неше оқушы бар?

Күтілетін нәтиже

18 ÷ (3/5) = (18 × 5) ÷ 3 = 30. Демек, сыныпта 30 оқушы бар.

Негізгі қорытынды (ереже)

Соңғы мысалда біз бөлігі бойынша санның өзін таптық. Жалпы алғанда, бөлігі бойынша санды табу үшін бөлікке сәйкес берілген санды сол бөлшекке бөлу керек: a ÷ (m/n) = a × (n/m).

II. Операциялық-орындаушылық кезең

Оқулық және қосымша тапсырмалар арқылы дағдыны бекіту.

Оқулық тапсырмалары

№880(1), №881, №883, №885.

Оқулықтан тыс тапсырма

Тіктөртбұрышты бақшаның ауданы 30 м². Бақша 3 бөлікке бөлінген. Гүл өсіп тұрған бөліктің ауданы 10 м², ал оның бір қабырғасының ұзындығы 2 м. Құлпынай отырғызылған бөліктің бір қабырғасының ұзындығы 3 м. Көкөніс отырғызылған бөліктің ауданы қандай?

A) 4 м²
B) 6 м²
C) 8 м²
D) 10 м²
E) 12 м²

III. Рефлексиялық-бағалау кезеңі

Білімді бекіту және өзін-өзі тексеруге арналған тапсырмалар.

Тапсырма 1

Марат барлық ақшасының 5/7 бөлігіне кітап сатып алды. Сонда оның 50 тг ақшасы қалды. Бастапқыда Маратта қанша ақша болды?

A) 180 тг
B) 175 тг
C) 178 тг
D) 165 тг

Тапсырма 2

3/5 бөлігі 60-қа тең болатын санды тап.

A) 15
B) 36
C) 100
D) 25

Тапсырма 3

Бөлігі бойынша санды табыңдар:

  • 3/4 бөлігі 60-қа тең.
  • 1/4 бөлігі 80-ге тең.
  • 3/7 бөлігі 30-ға тең.

Жауаптары

80; 320; 70

Үй тапсырмасы

№882, №884.