Жылжымайтын мүлік рыногындағы ахуалды тұрақтандыру жөніндегі бағдарламаның негізгі параметрлері

1-тармақ

“Самұрық – Қазына” қоры екінші деңгейдегі банктерде жеңілдікті ставкамен 15 жылға бірқатар несиелік желілер ашады. Банктер өз кезегінде қарыз алушылардың әртүрлі топтарына ипотекалық кредиттерді 10,5%–12,5% мөлшерлемемен, 15 жылға дейін және мерзімінен бұрын өтеу құқығымен береді.

2-тармақ

Қаражаттың бір бөлігі жаңа қарыз алушылар үшін түпкілікті мөлшерлемені 10,5% деңгейінде ұстайтын және 2009 жыл бойы іске асырылатын жаңа ипотекалық бағдарламаға бағытталады. Бұл халыққа жеңілдікті ставкалармен және қолжетімді бағамен тұрғын үй алуға мүмкіндік береді.

Сонымен қатар банктер құрылыс аяқталмаған нысандардан пәтер сатып алуға ипотекалық қарыз беру арқылы құрылыс компанияларымен жағдайды түзетуге және кредиттік портфель сапасын едәуір жақсартуға мүмкіндік алады.

3-тармақ

Банктер кредит желісінің бір бөлігін бұрын алаңы 120 м²-ден аспайтын тұрғын үйге ипотека алған және өз міндеттемелерін адал орындаған қарыз алушылар үшін пайыздық мөлшерлемені 10,5%–12,5% деңгейіне дейін төмендетуге бағыттайды.

4-тармақ

Мемлекет ұлттық компаниялар мен мемлекет қатысатын акционерлік қоғамдар атынан Астана және Алматы қалалары нарығынан әділ бағамен жаңа тұрғын үйлерді сатып алады. Үкімет тұрғын үйдің қолжетімділігін қамтамасыз ету бойынша қосымша шаралар қабылдайды.

Осы мақсатта қолданыстағы тұрғын үй құрылысын дамыту бағдарламасына өзгерістер енгізілді: әкімдіктерге жеке құрылыс салушылардан құрылыс аяқталған немесе дайындығы жоғары нысандардан пәтерлерді белгіленген баға бойынша сатып алу құқығы беріледі. Бұл бағдарламаны іске асыруды жеделдетеді.