Жабайы аңдар. Сабақтың тақырыбы
Көркем әдебиет сабағы: «Жабайы аңдар»
Саяхат сабақ · Жаңа ұғымды меңгерту
Сабақтың мақсаты мен міндеттері
Мақсаты
Балаларға жабайы аңдар туралы мағлұмат беру.
Міндеттері
- Балаларды жабайы аңдармен таныстыру, олардың мекені туралы әңгімелеу.
- Балалардың ой-өрісін дамыту, әр баланың ерекшелігін ескере отырып жеке жұмыс жүргізу.
- Бүлдіршіндерді ұғымталдыққа, бірлесіп жұмыс істей білуге тәрбиелеу.
Көрнекіліктер
- Көркем суреттер
- Орман көрінісі
- Жабайы аңдардың суреттері
Сабақтың барысы
I. Ұйымдастыру кезеңі
- Балалардың сабаққа дайындығын тексеру.
- Психологиялық сәлемдесу:
Біз сіздермен бірге болғанымызға қуаныштымыз.
Біз сіздерге сәттілік тілейміз.
II. Өткен сабақты пысықтау
Балалар үй тапсырмасы бойынша көктем мезгіліне сипаттама береді.
III. Жаңа сабақ: орманға саяхат
Мұғалім: «Балалар, бүгін бізге қонақ келді. Қонақтың кім екенін білу үшін сұраққа жауап берейік: Жұма сайын аналарымыз бен апаларымыз не пісіріп таратады?»
Балалар: «Бауырсақ».
Мұғалім: «Дұрыс! Бауырсақ алыс жолдан келіпті: ата-әжесінен адасып қалып, бізден көмек сұрайды. Ендеше, бауырсақпен бірге орманға барайық».
Кездесу 1: Қоян
Тапсырма: қоян туралы өлең
Қоян: «Бауырсақ, бауырсақ, мен сені жеймін!»
Бауырсақ: «Жемеші мені!»
Қоян: «Онда менің тапсырмамды орындаңдар: мен туралы өлең айтыңдар».
Балалардың өлеңі:
Ұзын құлақ сұр қоян, Естіп қалып сыбдырды. Ойлы-қырлы жерлермен Ытқып-ытқып жүгірді. Қарап еді артына, Қиығын сап көзінің, Келе жатқан томпаңдап, Көжегі екен өзінің.
Қоян: «Рақмет! Бара ғойыңдар».
Кездесу 2: Қасқыр
Тапсырма: сұрақтарға жауап, қала туралы өлең
Қасқыр: «Бауырсақ, бауырсақ, мен сені жеймін!»
Бауырсақ: «Жемеші мені, қасқыр!»
Қасқыр: «Онда менің сұрақтарыма жауап беріңдер».
- Сендер қай мемлекетте тұрасыңдар?
- Қай қаланың 10 жылдығы тойланғалы жатыр?
- Сол қала туралы кім өлең біледі?
Балалар: «Қазақстан Республикасы. Астана қаласы».
Өлең:
Отанымның төрінде, Сарыарқаның өрінде, Ту ұстаған Астанам — Әсем қалам, бас қалам.
Қасқыр: «Жарайсыңдар, бара ғойыңдар».
Кездесу 3: Аю
Тапсырма: сергіту жаттығуы
Аю: «Бауырсақ, бауырсақ, мен сені жеймін!»
Бауырсақ: «Жемеші мені, аю!»
Аю: «Онда мен туралы сергіту жаттығуын жасап беріңдер».
Сергіту жаттығуы:
Ормандағы аюдың Құлпынайы көп екен. Теріп, теріп алайық, Қалтамызға салайық.
Аю: «Рақмет, балалар!»
Кездесу 4: Түлкі
Тапсырма: жұмбақ шешу
Түлкі: «Ах, бауырсақ, бауырсақ, мен сені жеймін!»
Бауырсақ: «Жемеші мені!»
Түлкі: «Онда жұмбағымды шешіңдер».
Жұмбақ:
Тауықтар қашып жасқанған, Қулығы артық басқа аңнан.
Жауабы: Түлкі.
Түлкі: «Мен туралы жұмбақ білетіндерің мені қатты қуантты. Рақмет, бара ғойыңдар!»
Қорытынды көрініс: Бауырсақ үйіне оралады
Бауырсақ жүріп отырып ата-әжесін тауып алады. Ата мен әже бауырсақтан қалай келгенін сұрайды. Мұғалім балаларға сұрақ қояды: «Бауырсақ жолда кімдерге кездесті?»
Балалар: «Қоян, қасқыр, аю, түлкі».
Кейін мұғалім бұл жануарлардың жабайы аңдар екенін, олардың орманда мекендейтінін түсіндіреді.
Кейіпкерлерге мінездеме
Балалар жануарлардың сыртқы бейнесі мен мінез-құлқын сипаттайды.
| Аң | Сипаттама |
|---|---|
| Қоян | Жылдам, сақ, ұзын құлақты. |
| Қасқыр | Қырағы, қайсар, жыртқыш аң. |
| Аю | Күшті, ірі, орманда тіршілік етеді. |
| Түлкі | Айлакер, қу, епті. |
Көңіл күйді көрсету
Балалар бауырсақтың көңіл күйін қимылмен көрсетеді: жылаған, қорыққан, қуаныштанған.
Жылаған
Көмек сұрау, мұң
Қорыққан
Қауіп сезімі
Қуанған
Үйіне оралу
Сабақты бекіту: «Кубизм» стратегиясы
Балалардың білімін бекіту үшін төмендегі сұрақтар талқыланады:
- Қандай аңдарды білесіңдер?
- Қоян қандай аң?
- Аңдар қайда мекендейді?
- Түлкі қандай аң?
- Қоянның түсі қыста қандай болады?
- Қыс бойы аю қайда болады?
- Қасқырды аңшылар тағы қалай атайды?
Бағалау және қорытынды
Сабақ соңында балалардың белсенділігі бағаланып, бірлік пен мейірімге үндейтін қорытынды өлең айтылады:
Біздің топта ұл-қыздар Тату-тәтті ойнаймыз. Әлемдегі бар адамға Тек жақсылық ойлаймыз.