Мемлекет және құқық теориясының функциялары

Бүгінде экономика мен өз мемлекеттілігіміздің берік іргетасын нығайта отырып, біз қағидаттық тұрғыдан жаңа кезеңге сенімді қадам бастық. Бұл Қазақстанның одан әрі дамуын орнықты, заманауи және болашағы зор экономикалық, әлеуметтік, саяси және әкімшілік негізге қоюға мүмкіндік береді [1].

Мемлекет және құқық теориясы — нақты заң ғылымдары мен құқық салаларына қатысты маңызды жалпытеориялық және әдістемелік қызметтер атқаратын базалық құқықтық ғылымдардың бірі. Бұл пән құқық ғылымдарының ешқайсысы айналып өте алмайтын ұғымдар мен категорияларға сүйенеді. Сонымен қатар мемлекет және құқық теориясында жасалатын қорытындылар мен тұжырымдар нақты салалық заң ғылымдары үшін өз пәнін ғылыми тұрғыдан игеруде бағыт-бағдар береді.

Мемлекет және құқық теориясы жоғары кәсіби білімі бар заңгерді даярлаудың жалпы жүйесінде айрықша орын алады. Біріншіден, ол құқықтану мен мемлекеттанудың бастапқы ұғымдарын, негізгі ережелері мен категорияларын таныстырады. Екіншіден, бұл — әдістемелік ғылым: онда құқық ғылымдарындағы арнайы мәселелерді шешуге іргелі негіз болатын маңызды теориялық қағидалар қалыптасады. Үшіншіден, ол құқықтануда салалық ғылымдардың мәселелерін байланыстырып, біріктіріп зерттейтін интегративті ғылым ретінде көрінеді.

Мемлекеттік-құқықтық білімдер жүйесіндегі базалық тұғырларды игеру арқылы мемлекет және құқық теориясы студенттерге мемлекеттің және құқықтың мәні мен қоғамдық тағайындалуын, олардың өзге әлеуметтік құбылыстармен байланысын, сондай-ақ мемлекет пен құқықтың пайда болуы мен дамуының заңдылықтарын түсіндіреді. Бұл пән салалық және басқа да заң пәндерін меңгеру үшін қажетті негізгі түсініктер мен категориялар бойынша бастапқы әрі берік негіз қалыптастырады.

Мемлекет пен құқықтың жалпы теориясын оқу студенттердің алған білімдері негізінде мемлекеттік-құқықтық құбылыстардың мәнін және әлеуметтік мақсатын дербес талдауға, қазіргі заманның мемлекеттік-құқықтық мәселелеріне шығармашылық тұрғыдан қарауға, қоғамдық өмірдегі күрделі саяси-құқықтық құбылыстарға дұрыс баға беруге үйретеді. Сондай-ақ ол құбылыстардың мәнін, негізгі үрдістерін, орнын, рөлін, функцияларын және қоғамдық өмірдің басқа құбылыстарымен байланысын ашуға, әрі әртүрлі өмірлік жағдайларда алынған білімді қолдануға бағыттайды.

Бұл ғылым жалпы құқықтық мәдениетті қалыптастырып, студенттерде құқықтық дүниетанымның ғылыми негізін орнықтырады. Мемлекет және құқық теориясын терең меңгермейінше салалық заң ғылымдарын және басқарушылық сипаттағы пәндерді нәтижелі игеру қиын.