Творчестволық шабыт жоқ жерде қарабайыр үлгі ғана жасалмақ

Қазіргі заманғы менеджердің имиджін қалыптастыру және оны дұрыс қолдану — ең өзекті әрі қызықты тақырыптардың бірі. Бүгінде имиджді дамытуға арналған әдістер де, әртүрлі тренингтер де көп. Алайда іргелі білімсіз және жүйелі тәсілсіз тұрақты, сенімді имидж қалыптастыру мүмкін емес.

Заманауи менеджер — кәсіби басқарушы. Оның жауапкершілігі жоғары жұмысы компания табысының негізгі құрамдастарының бірі саналады. Соңғы жылдары экономиканың жекелеген секторлары дамыған сайын фирмалар мен кәсіпорындардағы менеджер рөлі де артып келеді.

Менеджерге жиі күрделі сұрақтарды шешуге тура келеді: олар кейде дағдарыстық жағдайлармен, кейде күтпеген мүмкіндіктермен байланысты болады. Бұл — тек жоспарлау мен бақылау ғана емес, белгісіздік жағдайында нақты шешім қабылдау қабілеті.

Менеджер жұмысының айрықша қыры — адамдармен үздіксіз байланыс орнату. Сондықтан психология, әлеуметтану және ұйымдық тәртіп принциптерін білу қажет. Қол астындағы қызметкерлердің құрметіне ие болғаннан кейін, менеджер олардың жұмысын ең тиімді жолмен ұйымдастырып, жүйелеуге тиіс.

Кәсіби табыс көбіне жеке қасиеттерге тәуелді: ұйымдастырушылық қабілет, іскерлік дағды, жауапкершілік және сенімді коммуникация. Басқарудың тиімділігі де менеджердің беделі мен авторитет деңгейіне тікелей байланысты.

Жаңа үлгіні өмірге әкелу оңай емес: көп ойлануға, қайта-қайта саралауға тура келеді. Шынайы шығармашылық шабыт жоқ жерде үстірт, қарабайыр үлгі ғана пайда болады. Сондықтан мен нағыз шығармашылықпен жұмыс істейтін сән үлгілеушілерді жинауға ұмтылдым.

Дүниеде, соның ішінде Қазақстанда, қайталанбайтын авторлық киімге ие болу — мен үшін үлкен қуаныш. Бірегей киім адамды дараландырып, оның ішкі болмысын айқындай түседі. Қоғам авторлық киімнің бағасын — оның артындағы ізденіс, тәжірибе, кейде ауыр еңбек пен толғаныс құрайтынын түсінгені жөн. Авторлық киім салонының өміршеңдігі үшін оны тек түсіну емес, қолдау да қажет.

«Болмасаң да ұқсап бақ» деген сөз бар. Мен де әлемге танылған Пьер Карден, Валентино, Нина Риччи секілді ірі брендтер сияқты болуға ұмтыламын. Алайда сән әлемінде өз үніңді айту — сырт көз ойлағандай жеңіл шаруа емес.

Қазіргі уақытта кез келген сәнді киім заңдастырылып, талапқа сай рәсімделуі керек. Алдымен үлгі қаралады, кейде арнайы кеңестердің отырыстары өтеді. Содан соң үлгінің толық конструкциясы жасалады: жағасы, жеңі, түймесі, тігісі — бәрі талдау мен таңдаудан өтеді.

Конструкциялық шешімнің бір ғана деталіне немесе шағын әшекейіне төмен баға берілсе, үлгінің бекітілуіне қауіп төнуі мүмкін. Осыдан кейін барлық шешім қағазға түсіріліп, түсінікті тілмен сипатталып жазылады.

Кейде матамен және материалмен өте шебер жұмыс істейтін үлгілеушілер өз туындысын қағазда сипаттап беруге қиналады. Мұны тамаша ән шығарса да, оның нотасын жаза алмайтын композиторлармен салыстыруға болады. Бірақ өндіріс талабы бойынша толық сипаттама міндетті. Көркемдік кеңестер көбіне дайын үлгіден бұрын оның қағаздағы сипаттамасын талдайды: толық жазылған мәтін арқылы киімнің қандай болатынын көз алдына елестете алады. Мен өзім де жиі дәл осылай жұмыс істеймін.

«Қазақ халқы не кигісі келеді?» — өте күрделі сұрақ. Оған жалпылама жауап беруге болмайды. Сондықтан мен үнемі адамдардың қалай киінгісі келетінін, қандай үлгідегі киімдерді іздейтінін зерттеп отырамын.

Мода ешқашан баяулықты көтермейді. Қазақта «таз тарағанша — той тарқап кетіпті» деген сөз бар: уақыттан кешіксең, сұраныс та өзгеріп кетеді. Қазіргі заманда жұрттың бірдей киінбейтінін ескеру қажет. Нарықтық қатынастар қоғамды әлеуметтік топтарға бөледі: қарттар мен жастарды бірдей киіндіру мүмкін емес. Жастарға ұнаған киімді үлкендер сынауы мүмкін, ал жастар үлкендердің киіміне күле қарауы да ғажап емес.

Сондықтан әрбір үлгінің нақты қай әлеуметтік топқа арналғанын айқындау маңызды. Әр маусым сайын сәннің «соңғы сөзін» айту үшін ұзындық-қысқалық, кеңдік-тарлық сияқты көптеген өлшемді алдын ала зерттеу керек. Бір маусымда ұзын киімдер сәнге енсе, көп өтпей қысқа, келте киімдер алға шығуы мүмкін.

Сән әлемі өмірден бөлек дамымайды. Керісінше, өмірдің өлшемдері мен өрнектері модадан көрініс табады. Қазақстандағы сән жетістіктерінің бастауы — қазақ халқының мыңдаған жылдық дәстүрі мен тұрмысында жатыр.

Менің міндетім — сол көне дәстүрлер мен бүгінгі талапты ұштастыру. Қазіргі киімнің ең сәнді үлгілерінде қазақтың ұлттық ерекшеліктері, ең болмаса сол ерекшеліктің жұқанасы сақталуын қамтамасыз ету маңызды.

Ұлттық қайнарлар сарқылмайтындай көрінеді: кез келген заманауи суретші-үлгілеуші ол жақтан қиялына қанат, ойына азық таба алады. Батыс елдерінің ұлттық бояуы қанық киімдерімізге қызығушылығын мен «Сымбат» модалар театрының түрлі елдердегі қойылымдары кезінде талай байқадым. Еуропаны таң-тамаша ету үшін ұлттық ерекшелігімізді көрсетіп қана қоймай, дәстүріміз бен салтымызды дамыта білу қажет.