Қазіргі Қазақ радиосы
Мазмұны
Бөлімдер
- Кіріспе
- Негізгі бөлім
- 1. Радиохабардың қоғамдық мәні
- 1.1 Қазақ радиожурналистикасының қалыптасу кезеңдері
Қазіргі радио кеңістігі
- 2. Радиохабар таратудың қазіргі жағдайы
- 2.1 «Алтын қор» бөлімі
- 2.2 Қазіргі Қазақ радиосы
- Қорытынды
- Пайдаланылған әдебиеттер тізімі
- Курстық жұмыс көлемі: 28 бет.
Кіріспе
Тақырыптың өзектілігі
Радио — өнер, ақпарат және шартараптан ең жедел хабар жеткізетін арна. Ол — бизнес көзі, мектеп, әрі өмірдің өшпес шежіресін сақтайтын тарих.
Радио үнінің ерекшелігі — сана сүзгісінен өтіп, мәнді хабарлар мен ән-саздың қорда сақталып, уақыт өте қайта жаңғырып отыруында.
Радио — өмірдің қиын сұрақтарына жауап беретін кеңесші және көмекші. Ол — мыңдаған адамдардың тағдырына ықпал ете алатын рухани күш-қуат.
Радиодан естіген дүниеміз ізгілік пен жақындық сезімін күшейтіп, сөйлесу мәдениетін қолдайды: көңіл көтереді, дем береді, оптимистік серпін сыйлайды.
Бүгінгі радиода кемшілік кездессе, ол — қоғамдағы ортақ олқылықтың да көрінісі. Сондықтан әуе толқыны арқылы еркін тарайтын ашық ақпарат ат төбеліндей азғантай топтың меншігі болмауы тиіс: ол қоғамдық сұранысқа жауап беріп, мәдени қатынастарды ілгерілетуге және жақсартуға міндетті.
Зерттелу деңгейі
Курстық жұмысты орындау барысында адамдар арасындағы қарым-қатынаста сөйлеу мен естудің маңызы ерекше екеніне қатысты мәліметтер жинақталды. Осы екі қабілетті біріктіріп, миллиондардың санасына бір мезетте ықпал ететін ақпарат арнасын қалыптастырған радионың негізі табиғаттан, жаратылыстан және қоршаған ортадан бастау алатыны айқындалды.
Табиғи дыбыстар
- Жапырақ сыбдыры
- Құстың сайрауы
- Су сылдыры мен шолпылы
Қала және техника
- Доңғалақ сықыры
- Қоңырау үні
- Мотор шуы
Адам және музыка
- Адам дауысы
- Музыка
- Ауадағы табиғи тербелістер
Дыбыс адамның өмір сүруін және қауіпсіздігін қамтамасыз етіп қана қоймайды. Ол көңіл-күй сыйлайды, рухани байытады, сана-сезімді өсіреді, жаңа межелерге жігерлендіреді, күш-қуат береді, жұбатады, демалдырады және бір күйден екіншісіне ауысуға көмектеседі.
Адам өмірі табиғи ырғақтармен (биоритммен) астасады: жүрек соғысы, тыныс алу, қабілет пен зейін де соған сай құбылып отырады. Осы тұрғыдан алғанда, бүгінгі радио адамның биологиялық және физиологиялық ерекшеліктерімен бірге оның жан дүниесін — психологиясын да ескеретін бұқаралық ақпарат құралдарының бірі, тіпті бірегейі.
Жұмыстың мақсаты мен міндеті
Бұл курстық жұмыстың негізгі мақсаты — радионың күнделікті өміріміздегі рөлінің ауқымды екенін көрсету. Жаһандану мен нарық жағдайында адамдар тұрмыста да, жұмыс орнында да күрделі мәселелермен бетпе-бет келеді, түрлі қайшылықтарды жедел шешуге мәжбүр болады, сонымен қатар стрестік жағдайларды жиі бастан кешіреді. Соның салдарынан адамның эмоционалдық күйі мен күш-қуаты да тұрақты болмайды.
Күнделікті қысым
Мысалы, жұмыстан шаршаған адам үйіне жеткенше көлік әурешілігін, жолдың нашарлығын, қаладағы кептелістерді, қызмет көрсету мәдениетінің төмендігін көреді делік. Үй жағдайы да әрдайым қолайлы бола бермеуі мүмкін.
Ақпараттық шаршау
Бір сәт көңіл бөлу үшін теледидар қосса, онда тосын оқиғалар, бітпейтін тауқімет, даулы айтыс-тартыс, жасандылыққа толы саясат, жүйкеге тиер жарнама, қатыгез көріністер мен созылмалы сериалдар көптеп кездеседі. Мұндайда жүйкеге салмақ түсіп, көңіл күй төмендеп, өмірге құштарлық бәсеңсиды.
Осындай сәтте көңіл ахуалын өзгертіп, эмоциялық тепе-теңдікке жеткізетін күштің бірі — радио. Радио табиғатынан агрессияға құрылған емес; керісінше жұмсақ, жағымды әрі жайлы орта қалыптастырады. Радиоақпарат көбіне оптимистік сипатқа ие болып, өмірлік жақсы тонус береді.
Әлеуметтік психологтар тосын қайғылы оқиға теледидармен салыстырғанда радиодан естілгенде санаға жұмсақтау жететінін атап көрсетеді. Себебі телеақпарат жүйкеге тікелей әсер етсе, радиодан жеткен жағымсыз хабар психологиялық қорғаныс тетіктерімен қабыса қабылданады. Бұл радионың өз табиғатын сақтай отырып, теледидар сияқты пәрменді құралдармен қатар өмір сүре алатынын дәлелдейді.
Жұмыстың құрылымы
Курстық жұмыс кіріспеден, негізгі бөлімнен, қорытындыдан және пайдаланылған әдебиеттер тізімінен тұрады. Жалпы көлемі — 28 бет.