Білімнің салтанат құруы
Рухани жаңғыру – адамның ішкі әлемінің жаңаруы, сана-сезімнің серпілісі, жаңа өзгерістерді қабылдай білу қабілеті. Бұл ұғымды біз өркениеттің өрге жүзумен, қоғамның кемелденуімен тікелей байланыстырамыз.
Тарих сахнасына көз жүгіртсек, өсіп-өркендеген ұлттың биіктеуі көбіне осындай рухани серпіліспен сабақтас екенін көреміз. Көне дәуірдегі көрікті қалаларымыз, сәулеті мен сән-салтанаты келіскен ескерткіштеріміз, мәдени мұраларымыз – соның бұлтартпас дәлелі.
Рухани жаңғырудың негізгі қағидалары
Елбасымыз рухани жаңғырудың бірнеше принципін ұсынды. Бұл қағидалар қоғамның қазіргі талапқа сай бейімделуін, ұлттық болмыстың сақталуын және тұрақты дамуды көздейді.
Бәсекеге қабілеттілік
Ғаламданудың жаһандық жүйесіне еніп, XXI ғасыр талаптарына бейімделу – сапалы табысқа бастайтын негізгі кілт. Бұл бағыт әлемдік өзгерістерге жауап беретін икемді әрі нәтижелі қоғам қалыптастыруға үндейді.
Прагматизм
Ұлан-ғайыр қазынамызды ұқыпты пайдалану, қорғау және мақсатты түрде нақты межеге ұмтылу – берекелі дамудың өзегі. Сонымен қатар бұл ұстаным түрлі саяси радикалды идеологияларға тосқауыл қоюдың да тиімді жолын көрсетеді.
Ұлттық бірегейлікті сақтау
Ұлттық код – халқымызға тән салт-дәстүр, рухани құндылық, асыл мәдениет. Осылар қоғам санасында үзілмей жаңғырып тұрса ғана, елдің алға басуы орнықты болады деген ой айқын айтылды.
Білімнің салтанат құруы
Бүгінгі таңда білім беру бағдарламалары ел дамуына нақты үлес қосып келеді. Табыс тізгіні – білімді, ойлы, еңбекқор жастардың қолында екені ерекше атап өтілді.
Революциялық емес, эволюциялық даму
XX ғасырдағы қасіреттерді ұмытпай, одан сабақ алу қажет. Дүрбелең мен тұрақсыздық экономикалық күйреуге әкелуі мүмкін екені қазіргі әлемдік толқыныстармен де дәлелденеді. Сондықтан жаңару – күрт төңкеріс арқылы емес, жүйелі эволюциялық жолмен жүзеге асуға тиіс.
Қорытынды ой
Қорыта айтқанда, бұл қағидаларды ел болашағына бағытталған ұтымды ұстанымдар, халыққа жасалған маңызды үндеу деп түсінемін. Ішкі руханиятымызды бекемдеп, сыртқы өзгерістерді дұрыс қабылдай білсек, жаңғырудың даңғыл жолына түсуге мүмкіндік мол.
Көшбасшымыз бізге бағыт-бағдар көрсетіп, сол жолдан қалай өту керегін айқындады. Ендеше, көкжиектен ауытқымай, өскелең ұрпаққа меңзеген дара бағытпен жүріп, биік шыңдарды бағындырайық.