Аман болсын аналар
Қызылорда облысы • Жаңақорған ауданы
№162 орта мектеп • МДТЖО
Жауапты мұғалім: Опашова Жанагүл Жалеловна
Жүргізушілер
- 1. Нұрлыбаев Дінмұхаммед — 11-сынып оқушысы
- 2. Асылтұрсынова Жазира — 11-сынып оқушысы
Наурыз — жаңару мен берекенің мерекесі
Наурыз келді! Бұл — күн мен түн теңеліп, жер бусанып, табиғат оянатын қасиетті кезең. Қазақ ұғымында Ұлыс күні қазан толса — сол жылы ақ мол болады; үлкен кісіден бата алса — жолы олжалы болады. Сондықтан Наурыз — мейірім, бірлік, молшылық пен игі тілек тоғысатын ортақ қуаныш.
Ақжарма тілектер
Ұлыс күндеріңіз құтты болсын!
Өмір жасыңыз ұзақ болсын!
Төрт түлік ақты болсын!
Пәле-жала жерге енсін!
Сахналық көрініс белгісі
Бәйшешек гүлдері ашылып, Жер-ана жайнап, көктем лебі сезіледі. Көрініс барысында балалар Жер-ананы айнала билеп, табиғаттың оянуын бейнелейді.
Ұлт ұстаздарының Наурыз туралы ойы
Ахмет Байтұрсынұлы
«Наурыз — қазақша жыл басы. Бұрынғы кезде әр елде Наурыз туғанда мейрам қылып, бас асып, қазан-қазан көже істеп, ауылдан ауылға, үйден үйге жүгіріп, кәрі-жас, бала-шаға бәрі мәз болушы еді».
Міржақып Дулатов
«Мұсылман жұртында жылына екі рет келетін Құрбан айт пен Ораза айтты есепке алмағанда, бізде жалғыз мейрам бар. Ол — Наурыз».
Құттықтау
Наурыз мерекелеріңіз құтты болсын!
Ұлтымыз Ұлыстың ұлы күнін ұлықтайды. Мерекенің ашылу сөзі мектеп директоры Дүйсебаев Серік Жаманқұлұлына беріледі.
Қарақазан, бірлік және наурыз көже
Қарақазанға тағзым
Қарақазан — халқымыздың берекесі мен ырысының нышаны. Бірлік әрқашан ортақ қазаннан басталады, ал оның қадірі ешқашан төмендемейді.
Наурыз көженің мәні
Наурыз тойының басты мақсаты — халыққа молшылық пен тоқшылық тілеу. Сол үшін әр үй қазан-қазан көже жасап, келген жұртқа дәм ұсынады.
Жеті дәм
Бидай, тары, қамыр, ет, тұз, сүт, су
Тілек
Ұлыс оң болсын, ақ мол болсын, ел тоқ болсын
Дәм тату
Береке шақыратын игі дәстүр
Мерекелік құттықтау
Құттықтау сөз ауыл әкімі Нәлібаев Молдахмет Әбшеұлына беріледі.
Қызыр баба және Ұлыстың ұлы таңы
Күн сәулесі Жер шарының шығыс бөлігінен таңғы сағат 6:00-де себездеп атқанда, біздің өңірде бұл мезет түнгі 3:00-ке сәйкес келеді. Сол себепті қазақ халқы жаңа жылды 22 наурыз күні таңғы 3:00-де қарсы алған. Дәл осы сәттен бастап даланы, ауылдарды, қалаларды Қызыр баба аралайды деген сенім бар. «Самарқанның көк тасы еріген» дейтін ұлағатты сөз де осы күнмен байланысты айтылады.
Сахналық көрініс: Қызыр бабаның батасы
Қызыр баба (Ерлан):
Балаларым, балдарым, үндеріңнен айналдым. Бағаннан сендерді қырық рет айналдым. Көріп тұрып сендерді, көңілдендім, жайландым. Мені іздемей жатыр деп, өкпелеп те қалғанмын.
Өздеріңе батамды берем енді, балалар: Ұлыс күні барлығы нұрланар да жаңарар. Ұрпақтың бақыты үшін аман болсын аналар, өздеріңді жетелер аман болсын әкелер. Жақсылыққа құштарлар — аман болсын ұстаздар!
Ұлттық өнер мен ойын — тәрбиенің өзегі
Ұлттық ойындардың тәрбиелік мәні
Ұлттық ойындар — халық еңбегінің жемісі, ой-сана мәдениетінің көрінісі. Наурыз тойында ұлттық ойындар ойналып, жас ұрпақтың азамат болып қалыптасуына ықпал еткен. Қазақ баланың тәрбиесін басты мақсат санап, ұлттық ойынды тәлім-тәрбиенің тиімді құралы ретінде ұрпақтан-ұрпаққа дамытып отырған.
Айтыс — халық қазынасы
Айтыс — бағзы заманнан қалыптасқан поэтикалық мұра. Онда дәстүрлі тақырыптар мен нақыштар сақталып, әр дәуірдің талабына сай жаңарып отырады. Айтыстың өзегінде өткірлік, тапқырлық, деректілік, қоғамдағы кемшілікті мінеу және шынайы шындық жатады.
Көрініс: 5-сыныптың «Қыз бен жігіт айтысы»
Күй: «Келіншек» — Қуантаева Аягөз (5-сынып жетекшісі)
Салт-дәстүр сабақтастығы
Төрт түлік — ел байлығы
Наурыз — Ұлы жердің түлейтін шағы. Осы мерекеде төрт түлікке қатысты береке тілеп, ұлттық дүниетанымды сахналық көріністер арқылы дәріптеу — жас буынға тағылым.
Көрініс: 6-сынып — «Төрт түлігі елімнің — ел байлығы, жерімнің»
Тұсау кесер
Тұсау кесер — баланың қадамы құтты, жолы ашық болсын деген ниетпен жасалатын тәрбиелік дәстүр. Наурызда бұл рәсімнің орындалуы — жаңарудың, игі бастаманың белгісі.
Сахналық қойылым: 7-сынып оқушылары
Бесікке салу
Бесік — ұлттың ұясы, тәрбиенің бастауы. Бесікке салу дәстүрі арқылы отбасы құндылығы, ананың мейірімі, ұрпаққа деген жауапкершілік айқын көрінеді.
Көрініс: 8-сынып оқушылары
Шешендік сөз — рухани мұра
Шешендік өнер — ойдың тазалығы мен сөздің құдіретін танытатын асыл мұра. Оны мектеп сахнасында жаңғырту — ұлттық мінез бен мәдениетті сақтаудың маңызды жолы.
Көріністер: 9–10-сынып оқушылары
Тәуелсіз елдің мерекесі — ұлттық болмыстың айғағы
Еліміз егемендік алғаннан бері Наурызды тойлау қайта жаңғырып, тәуелсіз қазақ елінің ұлттық мерекесіне айналды. Бұл — ұлттық болмыстың жарқын көрінісі. Ендеше, салт-дәстүріміз бен көркімізді жоғалтпай, ұрпаққа аманат ету — баршамыздың ортақ парызымыз.
Жас ұрпаққа үндеу
Уа, жас ұрпақ! Жарқылдаңдар, күліңдер! Бақытты да баянды өмір сүріңдер! Бар жақсылық — бейбітшілікте, білімде. Ұлы Отанды ардақ тұтып жүріңдер!
Қорытынды
Осымен Наурыз мерекесіне арналған «Ұлтымыз Ұлыстың ұлы күнін ұлықтайды» атты шара мазмұны түйінделеді. Қош сау болыңыздар!
Іс-шара мазмұны мектеп сахнасына арналған мерекелік сценарий негізінде редакцияланды.
Наурыз құтты болсын!