Аталы сөздер айту
Тақырыбы: «Қариясы бар үйдің — қазынасы бар»
Бұл кездесу-тәрбие сағаты үлкенді құрметтеп, сыйлауға, ата дәстүрді сақтауға және ата-әжелеріміздің өнегелі істерін кейінгі ұрпаққа үлгі етуге бағытталған.
Мақсаты
Үлкенге құрмет, кішіге ізет мәдениетін қалыптастыру; ата дәстүрді қадірлеу; өнегелі сөз бен ізгі әрекетті өмірлік ұстанымға айналдыру.
Түрі
Ардагерлер кеңесінің төрағасы А. Түрікпенәлиевпен кездесу.
Әдісі
Сұрақ-жауап, пікірлесу, шығармашылық тапсырмалар.
Барысы
Уәждемелік кезең
1) «Мен — атамның жалғасымын» тақырыбында оқушылардың ойы тыңдалады.
2) «Аталар сөзі — ақылдың көзі»: аталы сөздер айтып, батаның мәні талқыланады.
Сәулелі сөз сөне ме,
Орны бөлек батаның.
Бізге тәлім-өнеге,
Ақ тілеуі атаның.
Ата-бабаң ардақты,
Жамандыққа бармапты.
Ардай тұтып үлкенді,
Ата жолын жалғапты.
Өз бетінше жұмыс: «Қай бидің сөзі екенін тап».
Алтын ұяң — Отан қымбат,
Құт-берекең — атаң қымбат.
Кіндік кескен жерің қымбат,
Ұят пенен ар қымбат.
— Қазыбек би
Баз бала әкесінен озып туады,
Баз бала әкесіне жетіп туады,
Баз бала кері кетіп туады.
— Төле би
Бай болсаң — халқыңа пайдаң тисін,
Батыр болсаң — жауыңа найзаң тисін.
— Әйтеке би
Шығармашылық жұмыс: тақтадағы өлеңді оқып, жатқа жазу.
Иә, туған соң адам боп,
Білімсізден жаман жоқ.
Ата сөзін білмесең,
Жұрт айтады надан деп.
Негізгі бөлім
- 1) Ауыл ардагері, ұстаздардың ұстазы, Абай ауылы ардагерлер кеңесінің төрағасы Түрікпенәлиев Алпамыс атамен пікірлесу.
- 2) «Алпамыс атаның бір күні» атты сюжетті көрсету.
- 3) Оқушылардың сұрақтары арқылы еркін сұхбат жүргізу.
Қорытынды кезең
Негізгі ой: «Үлкенге құрмет — кішіге міндет».
Осы мақалға сүйене отырып, ата-аналарға, қонақтарға және оқушыларға өз тілектері мен ой-пікірлерін айтуға сөз беріледі. Кездесу үлкенге деген ілтипаттың, ізеттіліктің және сабақтастықтың маңызын қорытындылаумен аяқталады.