Ана тілім әні
Ана тілі — жан дүниеміздің айнасы
Мұғалімнің кіріспе сөзі ана тілінің қадірін тереңнен танытады: ана тілі — адам баласы жаратылғалы бергі жан дүниесінің айнасы, өсіп-өніп, түрлене беретін, мәңгі құламайтын бәйтерек. Ол — жүректегі ең нәзік сырды, халық тарихының барлық кезеңдерін, жан толқындарын ұрпақтан-ұрпаққа жеткізетін қазына.
Қазақ тілінің байлығы мен икемі
Мейрамның толғанысы
Қазақ тілі аса бай, икемді тіл. Қалай исең, солай иіле береді. Орамын, бұрымын тауып, қисынын, орайын келтіріп пайдалансаң, бұл тілмен сурет салуға да, тас қашап, ағаш пен текемет оюға да болады. «Бұл тілден май тамады» десе де жарасады. Халықтың тілі мен жырына құлақ салсаң, алуа-шекер балдай тәтті нәріне, әріне әсте тоймайсың. Ғашықпын қазақ тіліне... Осындай майса, сұлу тілді қалай өгейсітуге болады?!
Рауан
Ана тілім — тірлігімнің айғағы. Тілім барда — айтылар сөз ойдағы. Тілім өссе — мен де бірге өсемін, тілім өшсе — мен де бірге өшемін.
Ана тілін білмеген — ақылы жоқ желікбас; ана тілін сүймеген — халқын сүйіп жарытпас.
Айбек
Туған тілім — бабам тілім — өз тілім. Туған тілім — анам тілім — өз тілім. Туған тілім — далам тілім — өз тілім. Туған тілім — адам тілім — өз тілім.
Райымбек
Туған тілде сыры терең жаным бар, туған тілде әнім менен сәнім бар. Туған тілім тіл болудан қалса егер, жүрегімді суырып-ақ алыңдар!
Әуен мен сөздің үйлесімі
Мұғалім
Құлақтан кіріп бойды алар, жақсы ән мен тәтті күй. Көңілге түрлі ой салар, әнді сүйсең — менше сүй. Ана тілім — әнім.
Орындау: хор.
Абайдан тағылым
Аманжанның үндеуі
Асыл сөзді іздесең — Абайды оқы, ерінбе. Адамдықты көздесең — жаттап тоқы көңілге.
Қысқаша көрініс
«Абай мен Әбіштің сырласуы» (Абай — Мейрам, Әбіш — Рауан)
Сұрақ-жауап: тіл туралы ой
Мұғалімнің сұрағы
Балалар, тіл туралы біз не білеміз? Ойларымызды ортаға салайық.
Рауан
Халық бар жерде тіл бар. Тіл бар жерде өнер бар. Өнер бар жерде жанкүйер бар. Әр халықтың ана тілі — оның бақыты, оның қуанышы.
Аманжан
Туған тіліңді мақтан ету, оны таза сақтау, оның өрлеп-өсуіне еңбек сіңіру — әрбір қазақ отбасының жүрегіндегі борыш.
Айбек
Халықтың қуаты — тілдің қуаты. Біз ана тілімізді ең айтқыш, ең білгір, ең бай тілдердің біріне айналдыруымыз керек.
Келесі сұрақ
Балалар, тіл туралы қандай мақал-мәтелдер білеміз?
Қорытынды үндеу
Мұғалімнің қорытынды сөзі
Қалың елім, қазағыңа қорған бол! Жеткіншегім, жайқала өсіп орман бол. Шет тілі мен компьютерді меңгеріп, елге тірек, нағыз ұлттық тұлға бол!
Осымен тіл мерекесіне арналған тәрбие сағатымыз аяқталды.