Патриотизм - Отанды сүю

Бұл құдіретті сөзді Қазақстан Республикасының әрбір азаматы асқақ сезіммен, мақтанышпен айта алады. Өйткені біз — жастар — асқақ арман жетегінде, отаншылдық рухты ту еткен ұлттық ұл-қыздар қасиетті қазақ топырағында өсіп-өніп, мекен етіп, достық қарым-қатынаста, береке мен бірлікте, тыныштық пен татулықта өмір сүріп келеміз.

Бауыржан Момышұлы: «Отан үшін отқа түс — күймейсің», — деген. Сол сөздің салмағын ойласақ, ата-бабаларымыздың азаттық жолында қан төгіп, жанын бергенін, талай ауыр кезеңді бастан кешкенін жүрекпен сезінеміз. Азаттық үшін құрбан болған, азап шеккен бабаларымыздың ерлігін ұмытпаймыз: ол — тарихта да, халық жадында да мәңгі.

Біз — бақытты ұрпақпыз. Бүгінгі жарасымды тіршілігіміз — елдің кемел ойлы ұстанымдарының, бірлікке негізделген азаматтық саясаттың нәтижесі. Адамгершілік, ар-ұят, абырой, патриотизм — жеңісті күндерді жақындатқан, қоғамды алға жетелеген рухани құндылықтар. Сол құндылықтардың ішінде қазіргі қоғамды біріктіретін ең қымбат дәнекер — патриотизм, яғни Отанды сүю.

Патриотизмнің маңызды элементтері — ұлттық рух пен ұлттық патриотизм. Ұлттық рухты қазақ халқының тарихын жан-жақты сараптап, терең түсіну арқылы кеңейтуге және дамытуға болады. Бабаларымыз ел қорғау сезімін, туған жерді қастерлеуді ұрпақ бойына сіңіре білді.

Отансүйгіштік рух — халықтың әлемдік өркениетті елдер қатарына қосылып, дүниежүзілік қауымдастықтан лайықты орын алуына мүмкіндік беретін қуатты күш. Кейде бір өзіне бірнеше мемлекет сыйып кететін ұлан-ғайыр жерді ата-бабамыз сан ғасырлар бойы «қанаттыға қақтырмай, тұмсықтыға шоқыттырмай» қалай аман сақтап қалды екен деп таңданасың. Қазақстан талай зобалаңды бастан өткерсе де, найзаның ұшымен, білектің күшімен жер тұтастығын сақтай білді.

Н.Ә. Назарбаев «Қазақстанның болашағы — қоғамның идеялық бірлігінде» атты еңбегінде: «Көпұлтты Қазақстанда ұлттық мүдделерді жүзеге асырудың бір ғана жолы бар. Ол — қазақ ұлтының біріктіруші рөлі жағдайында барлық халықтардың теңдігін қамтамасыз ету», — деп жазған.

Еліміздің егемендігі қалай келгені, тәуелсіздігін алған жас мемлекеттердің алғашқы жылдарындағы ауыртпалықтар, сол кезеңнен кімдердің және қалай өткені — бәрі де тарихтың маңызды сабақтары. Соның ішінде Қазақстанның қантөгіссіз, қақтығыссыз бүгінгі күнге жетуі — көрегендікке, келісімге, жауапты мемлекеттік шешімдерге сүйенген бағыттың нәтижесі.

Еуразияның жүрегінде орналасқан еліміз көптеген мемлекеттердің тағдыры сынға түскен шақтарда да елді есеңгіреткен қанды қақтығыстардан аман өтті. Кең-байтақ Қазақстанда 130-ға тарта ұлт өкілінің тату-тәтті өмір сүруі — бір күннің еңбегі емес, бірлікке ұйыстырған ортақ ниеттің жемісі.

Тарихи өлшеммен қарағанда қас-қағым сәтке тең кезең ішінде еліміз талай жетістікке жетіп, өзімізбен бір кеңістіктен тараған мемлекеттердің алдыңғы легінде ілгері қадам басты. Экономика нығайып, әлеуметтік жағдай жақсарып келеді. Айналаға барлай қарасақ, кей өңірлерде татулықтың қаймағы бұзылып, алауыздық күшейгенін де көреміз. Сол тұрғыдан алғанда, бейбіт өмірдің қадірі тіпті арта түседі.

Ел дамуы туралы биік мақсаттар қойылған сайын, қоғамда көп нәрсе өзгеруі қажет. Даланың да, қаланың да жаңаруының басты шарты — сананың өзгеруі. Кейінгі ұрпақ ретінде біз халқымыздың ерлік дәстүрін жалғастырып, заман талабына сай білім алып, еңбектеніп, елдің тірегі болуға тиіспіз.

Бүгінгі жас ұрпақ — болашақ Қазақстан азаматы. Сондықтан жастықтың жалынымен, бойдағы күш-қуат пен қарым-қабілетпен Отан-Ананың тірегі болу — парыз.

ХХІ ғасыр — білім, ғылым және бәсеке ғасыры. Бұл дәуірде рухымыздың мықты, ұжданымыздың берік болуы, ел мен жерге адал қызмет ету аса маңызды. Әрбір жас өз мемлекетінің өткеніне, бүгініне және ертеңіне тікелей қатысты екенін сезініп, Отан тағдыры үшін жеке жауапкершілік жүктелетінін терең түсінуі керек.

Тәуелсіз ел болу — қандай бақыт! Қазақстан — тәуелсіз. Біз ашық аспан астында, жарқын күн сәулесі төгілген, кең-байтақ, халқы ынтымақты, болашағы жарқын мемлекетте өмір сүріп жатырмыз.

Бұл ақиқаттың айғағы — мемлекеттік рәміздер. Әнұранымыздың «Алтын күн аспаны, алтын дән даласы» деп басталатын жолдарының өзі-ақ Қазақ елінің кеңдігін, бейбіт өмірін айқын аңғартады. «Малым — жанымның садақасы, жаным — арымның садақасы» деп ар-намысты жоғары қойған халық екеніміз де осы құндылықпен қабысады.

Кез келген елдің тәуелсіздігін оның мемлекеттік рәміздерінен бөліп қарауға болмайды. Егемендік пен тәуелсіздіктің қасиетті нышандарын қадірлеу — Қазақстанды Отаным дейтін, өз тағдырын және ұрпағының келешегін қазақ жерімен байланыстыратын әрбір азаматтың қасиетті міндеті.

Рәміздер — тәуелсіздіктің белгісі ғана емес, елдікке шақыратын, тұтастыққа ұйыстыратын, бірлікке үндейтін, жүректегі патриоттық сезімді оятатын айрықша нышан. Көк Ту көкте желбіреп, Елтаңба төрде орнығып, Әнұран асқақ шырқалған сәтте ата-бабаның сан ғасырлық арманы орындалғанын сезініп, толқымайтын жан кемде-кем.