Осынау ұлы даламыз бабаларымыздан қалған мирас

Осынау кең даланы бабаларымыз найзаның ұшымен, білектің күшімен қорғап, кейінгі ұрпаққа аманат етті. Тәуелсіздік бізге өздігінен келген жоқ — ол сан ұрпақтың төзімі мен ерлігінің жемісі.

Тарихқа үңілсек, қазақ халқы небір қиын-қыстау кезеңдерді бастан өткерді. Дегенмен халқымыз жасымады, сағы сынбады: ауыртпалықты қара нардай көтере білді.

Қазақ халқы көшпелі өмір салтын ұстанып, ру-руға, жүз-жүзге бөлініп тіршілік етті. Алайда данагөй бабаларымыздың арманы — бір жағадан бас, бір жеңнен қол шығарып, біртұтас ел болу еді.

Абылай хан тұсында үш жүздің басы қосылып, елдік мұрат айқындала түсті. Тарихта аты қалған талай тұлға халқымыздың бірлігін сақтап қалу үшін аянбай еңбек етті.

1991 жылы Қазақстан қызыл империяның құрсауынан босап, тәуелсіздігін жариялады. Қазақстан Республикасы атанып, өз шекарасын айқындады.

Әрине, тәуелсіздіктің алғашқы жылдары оңай болған жоқ. Елдігімізді сақтап қалу үшін ел ағалары күн-түн демей қажырлы еңбек етті: күдік пен үміттің арасында жүріп, ауқымды жобаларды іске асыруға тәуекел етті.

Уақыт өте келе сол үміт ақталып, еңбектің нәтижесі көріне бастады. Қазақстан өсіп-өркендеп, әлем таныған мемлекетке айналды.

Ел тәуелсіздігінің жылдарында қол жеткізген белестеріміз аз емес: қай саланы алып қарасақ та, даму қарқыны байқалады. Бұл жетістіктердің бір бөлігі мемлекет жүргізген жүйелі саясатпен, елдің бір мақсатқа ұйысуымен тығыз байланысты.

Бүгінде 130-дан аса ұлт пен ұлыс бір көк ту астында тату-тәтті өмір сүріп келеді. Болашақ жас буын үшін мүмкіндік те, жағдай да жасалуда.

Ой елегінен өткізсем, қазақ халқы ешнәрседен кенде емес. Қойнауы қазба байлыққа толы ұлан-ғайыр жеріміз бар. Табиғатымыз да айрықша көркем: көл мен шөл, ну орман мен жазық дала, қырат пен ойпат, аспанмен таласқан биік таулар — бәрі де туған өлкенің ажары.

Сонымен қатар халқымыздың мақтана алатын ұлы тұлғалары, ойшылдары, ақын-жазушылары мен ғалымдары бар. Мұның бәрі — тәуелсіз елдің рухани тірегі.