Әскербеков Диас

Ерлік пен елдікке үндеген сол рухани сабақтастық бір ұрпақтан екіншісіне табиғи түрде ауысып, ақыры 1986 жылғы Желтоқсан оқиғасының жаңғырығына ұласты. Желтоқсан көтерілісі ұлттық рухтың өлмейтінін жарқын түрде дәлелдеді.

Осы рухтың жалғасуы 1991 жылғы 16 желтоқсанда Тәуелсіздік таңын тудырды. Мен үшін тәуелсіздік ұғымы, ең алдымен, Желтоқсан оқиғасымен сабақтасып есте қалады. Өйткені мен — сол кезеңнің перзентімін, сол дәуірдің шынайы леп-тынысын сезінгенім — мен үшін үлкен қуаныш.

Бізді осы күнге жеткізген ұмытылмас оқиғалар — ел қорғау соғыстары мен ұлт-азаттық көтерілістері. Қандай ауыртпалықты да көтере білген жасымайтын жігер, қайтпайтын табандылық — өшпес өнеге, өлмес мұра.

Сондықтан тәуелсіздіктің оңайлықпен келмегенін жақсы білеміз. Ата-бабаларымыздың алдында тәуелсіздік үшін күресу мақсаты тұрса, біздің алдымызда оны нығайта түсу міндеті тұр.

Кең байтақ, күн сәулелі Қазақстан прогрессивті адамзатпен бір сапта болу үшін жаңаша өмірге қадам басты, дамудың даңғыл жолына түсті. Егемендік жылдары ішінде өзіне тән институттары қалыптасқан, әлемдік қауымдастықта ықпалды орны бар мемлекет құрылды. Қауіпсіздік пен тәуелсіздік негіздері нығайды.

Елдің демократиялық жолмен дамуының берік іргетасы қаланып, ішкі экономикалық жүйе түбірімен өзгерді: нарықтық қатынастар орнығып, Қазақстан әлемдік экономикада өзіндік орны бар елге айналды.

Қазақ елі — бейбітсүйгіш, бірлігі жарасқан дархан ел. Сан түрлі ұлттардан құралған халқымыз ауызбірлігімен танылды. Қазақстан халқы Ассамблеясы құрылып, қоғамдағы татулық пен ынтымақтастықты сақтаудың, түрлі ұлттық мәдениеттер мен діндердің үйлесімді дамуына қамқорлық жасаудың жарқын үлгісін көрсетті.

Еліміздің халықаралық беделі де нығайды: Еуропалық қауіпсіздік және ынтымақтастық ұйымына төрағалық ету, Астанада саммит өткізу сияқты ірі оқиғалар Қазақстанды әлемге жасампаз халық ретінде танытты.

Сондай-ақ қысқы спорт түрлерінен өткен Азия ойындарының жоғары деңгейде өтуі бүкіл халықтың мерейін өсіріп, ерекше мақтаныш сезімін оятты. Осындай жетістіктер Отанға деген құрмет пен жауапкершілік сезімін күшейтеді.

Тәуелсіздік — болашақ ұрпаққа аманат ету үшін көздің қарашығындай сақтайтын әрі нығайтатын басты игілігіміз. Еліміздің егемендік жылдарында қол жеткізген табыстарының барлығы — Тәуелсіздіктің жемісі.

2011 жыл Қазақстан Республикасы Тәуелсіздігінің 20 жылдығы ретінде аталып өтті. Бұл мерейтой «Бейбітшілік пен жасампаздықтың 20 жылы» ұранымен өрбіді. Негізгі идея — әр айға белгілі бір тақырып арнап, түрлі бағыттар бойынша ауқымды істерді жүзеге асыру, жаңа өндірістер мен жұмыс орындарын ашу, әлеуметтік-мәдени нысандарды пайдалануға беру.