Қандай кеш
Ол өз ойында жүргенін бір қызғыш дәптерге түсіріп, соңына дейін тұтас толтырып шыққан еді. Осылайша негізгі мақсаты да орындалғандай болды: бұл — әлдебір кештің сұлбасы ғана. Оны бір жерге жариялаймын, елге ұсынамын деген ойы да болмаған.
Тек жазбаның қандай мақсатта жазылғаны бірден түсінікті болсын деп, бірінші бетінің басына: «Қазақ хандығы құрылуының 540 жылдығына арналған бағдарлама» деп атап қойды. Бағдарламаға негіз етіп 1456 жылын алған.
Сосын дәптерді өз қағаздарының арасына салып, үнсіз қалдырды.
Жаңа оқу жылы және күтпеген сұрақ
Арада көп уақыт өтпей-ақ, мектептегі мұғалімдік жұмысының екінші жылы басталып, алғашқы қоңырау да соғылды. Жаңа оқу жылының әбігері кірісе берген.
Ол үстел үстінде тексеріліп қойылған жоспарлардың ішінен өз күнтізбелік жоспарын рұқсат сұрап алмақ болып тұрған еді. Сол кезде оқу ісінің меңгерушісі тосыннан: «Бір кеш өткізу ойда жоқ па?» — деп сұрады.
Ол аңтарыла: «Қандай кеш? Әдеби кеш пе?» — деді. Мамандығы әдебиет болған соң, ең әуелі ойына келгені сол еді.
Бірақ меңгеруші нақтылап жатпады: «Мейлі, әдеби кеш болсын, басқа тақырыптағы кеш болсын — әйтеуір, бір кеш өткізу ойда жоқ па?» Жас маман болған соң, жұмыс істесін дегені сияқты.
Есте қалған дәптер
Кеш өткізу туралы нақты жоспары жоқ еді. Бірақ сұрақ қойылған соң, орнықты бір жауап беруі де керек болатын. Дәл сол сәтте ғана есіне әлгі қызғыш дәптер түсті…