Ашық сабақ тақырыбы

Мұғалім: «Бұл оқу тамақ болар қарның ашқанда, жол табар қараңғыда адасқанда. Мал озбас, біле білсең, білім озар — ақыры керек болар бір сасқанда», — деп Міржақып ақын айтпақшы, тарыдай болып кіріп, ақыл-ойлары толысып, жақсы мен жаманды айыра білуді үйренген шәкірттеріміздің ұйымдастыруымен өткізілгелі отырған «Қош бол, бастауыш!» мерекесін бастауға рұқсат етіңіздер!

Қош келіпсіздер, құрметті ата-аналар, қымбатты әріптестер, оқушылар! Бүгінгі күн — осы залда отырған бәріміз үшін ерекше күн. Өйткені осыдан төрт жыл бұрын мектеп табалдырығын жүрексіне аттаған балаларыңыз бастауышта білім алып, қанаттарын қатайтып, енді бастауыш сыныппен қоштасқалы отыр.

«Бесіктегі баланың күлгенін көрген — бір мұрат, алдына түсіп ананың жүргенін көрген — бір мұрат», — дегендей, бастауыш сыныпты бітіруші түлектерімізді ортаға шақырайық!

Мұғалім: Сіздердің алдарыңызда тұрған 4-сынып оқушылары осыдан төрт жыл бұрын алты жасар бала болса, бүгін — ес біліп, етек жиған шәкірт.

Мектеп табалдырығын аттаған күннен бастап «Әліппемен қоштасу», дәстүрлі Наурыз тойлары, «Әдепті бала», «Әнші, биші балапан», «Кішкентай күз аруы», «Наурыз аруы», «Кішкентай жігіт сұлтаны», мәнерлеп оқу сайыстары, түрлі тақырыптағы көрмелер, сыныпаралық спорттық жарыстар, ашық сабақтар мен тәрбие сағаттары — балалардың есінде ұзақ сақталары сөзсіз.

Армандасаң да, қиялдасаң да, балалық шағың көз алдыңа келеді. Өйткені биік асуға беттеген аяулы ғұмыр, ғажайып өмір — осынау бал күлкілі балалық шақтан басталады.

Бүгін біздің бүлдіршіндер өміріне өшпес із қалдырған бастауыш сыныбымен қоштасып, тағы бір белеске қадам басқалы отыр. Ендеше қызықты да ғаламат өзгерістер сыйлаған, білім нәрімен сусындатқан, өз жолын табуға бағыт берген ұстаздарына және ата-аналарына арнап өз өнерлерін көрсетуге дайын. Олай болса жүргізушілерімізді ортаға шақырайық!