Еліміздің тыныштығы мен қауіпсіздігі, көп ұлтты Қазақстан халқының жарастығы мен ынтымақтастығы Президентіміздің жүргізіп отырған парасатты көреген саясатының нәтижесі
Мен – тәуелсіз елдің ұланымын
Мен тәуелсіздікті ақылмен, ата-баба жолымен алғанбыз деп ойлаймын. Н.Ә. Назарбаев айтқандай, 1991 жыл — еліміздің Қазақстан деген атпен бүкіл әлемге алғаш қадам басқан жылы. Сол сәттен бері жиырма жыл да өте шықты. Бүгінгі Қазақстан әлем сахнасында мақтанарлық беделге ие.
Тәуелсіз Қазақстанның орны
Жас мемлекетіміз аз ғана уақыттың ішінде ірі экономикалық, саяси және әлеуметтік жетістіктерге қол жеткізді. Қазіргі таңда Қазақстан жас мемлекет бола тұра, көптеген елдерден әлдеқайда алда.
- Еліміздің аяғынан нық тұруы
- Ұлттық қауіпсіздікті қамтамасыз ету
- Экономиканың жедел қарқынмен дамуы
Бүгінгі Қазақстан — тек өзі орналасқан аймақта ғана емес, әлемдік проблемаларды талқылауда және шешуде ықпалды рөл атқаратын ел. Елбасымыздың «тәуелсіздік сәбилік тұсауын өміршең уақытқа кестірген кезден бастап, осы жиырма жылдың бедерінде айшылық жерді алты рет аттаған алып секілді» деген сөзі егемен Қазақстанның бүгінгі танымалдығын дәл сипаттайды.
Алғашқы тарихи қадамдар
Тәуелсіздік алғаннан кейінгі алғашқы әрекеттердің қатарында ұлттық валютамыз — теңгені енгізу, көршілес мемлекеттермен шекараны белгілеу, Конституцияны бекіту болды. Ата Заңымызға сәйкес, Қазақстан және қазақстандықтар ешкімнің жеріне көз салмайды, бірақ өз жерінің бір сантиметрін де ешкімге бермейді. Мұның бәрі — ерекше тарихи жетістік.
Тәуелсіздік — сый емес, арманның ақиқаты
Жиырма жылда жеткен жетістігіміз көп. Дегенмен, бұл табыстарға апарған жолдың жеңіл болмағанын ұмытпауымыз керек. Өзім тәуелсіздіктен кейін туған буынның өкілі болсам да, егемендіктің қандай жолмен келгенін жақсы түсінемін. Қазақстан үшін, қазақ халқы үшін тәуелсіздік аспаннан түскен сый болған жоқ.
Халқымыз бостандықты аңсап, тәуелсіздікке зарығып жетті. Тәуелсіздік — ата-бабамыздың ежелден келе жатқан арманы. Бостандыққа ұмтылыс пен өшпес қайсар рухтың арқасында біз егемен ел атандық.
Тарихтан қалған өшпес өнеге
Ел бостандығын қорғау соғыстары мен ұлт-азаттық көтерілістер — тарихымызда өшпес өнеге, өлмес мұра. Елдің біртұтастығы мен тыныштығын сақтау жолында хан-сұлтандар, батырлар ғана емес, қарапайым халық та жанын пида етті.
Желтоқсан жаңғырығы
Тәуелсіздік деген ұлы жеңіске жетуде кешегі Желтоқсан оқиғасының да үлесі зор болды. Студент жастардың көшеге шығып үндеу жасауы, егемендік үшін зардап шегуге дайын екенін көрсете білуі — халыққа сенім мен жігер берген тарихи сәт.
Бірлік пен татулықтың қасиетті күні
Бүгінгі таңда Тәуелсіздік — барлығымыз үшін ерекше қасиетті күн. Бұл — бірліктің, ынтымақтастықтың, татулықтың күні. Мемлекетіміздің тәуелсіздігі — ең алдымен халқымыздың бақыты.
Егемендіктің алғашқы жылдарында негізгі мақсаттар тәуелсіздікті нығайту, ұлттық қауіпсіздікті қамтамасыз ету, экономикадағы қиындықтарға жауап беру болды. Сондықтан бүгінгі күні біз өткеннен қалған тарихи өнегені, отансүйгіштікті, ұлтына деген махаббатты жоғалтпай, оны жастардың бойына сіңіруге айрықша мән беруіміз керек.
Тыныштық, келісім және ортақ жауапкершілік
Тәуелсіздігімізді жариялағаннан бергі уақыт ішінде көптеген елеулі табыстарға қол жеткіздік. Еліміздің тыныштығы мен қауіпсіздігі, көпұлтты Қазақстан халқының жарастығы мен ынтымақтастығы — Президентіміз жүргізіп отырған парасатты, көреген саясаттың нәтижесі.
Қазақстан — қазақ халқының ата-баба мекені, ежелгі қонысы. Еліміз өлшеусіз табиғат байлығымен ғана емес, ең алдымен сан түрлі ұлттардан құралған халқымен де ерекше екенін ұмытпаған абзал.
Бүгінгі бейбіт те шуақты күндерді бағалай отырып, жаңа биіктерге ұмтылу — біздің буынның бағыты болуы тиіс.
11А сынып оқушысы — Сұлтанова Әсемнің үздік шығармашылық жұмысы.