Сабақтас құрмалас сөйлем – құрамындағы жай сөйлемдерінің алғашқысы тиянақсыз болып, соңғысына бағына байланысқан құрмалас сөйлемнің түрі. Сабақтас құрмаластың бірінші жай сөйлемдерін (бағыныңқы) өз алдына бөлек айтуға келмейді, өйткені ол тиянақсыз. Мысалы: Таңертеңгң тұнық ауа мұнартып, кең даланы сұлу сағым басты (Т.Абдрахманова).
Екінші сөйлемдері (басыңқы) тиянақты, олар өздігінен дербес айтыла береді. Құрамындағы бағыныңқы сыңарлардың мағыналық ерекшеліктеріне қарай сабақтас құрмалас сөйлемнің мынандай түрлері болады: шартты бағыныңқылы, қарсы бағыныңқылы, себеп бағыныңқылы, мезгіл бағыныңқылы, амал бағыныңқылы, мақсат бағыныңқылы сабақтас құрмалас сөйлемдер.
Негізгі тапсырмалар, сұрақтар:
1. Құрмалас сөйлемнің сабақтас болуының негізгі белгісі қандай?
2.Сабақтас құрмалас сөйлемнің құрамындағы жай сөйлемдер қандай тәсілдермен байланысады?
3. Әртүрлі жасалу жолдарын пайдалана отырып, сабақтас құрмалас сөйлемдер құрыңыз.