Тәрбие мектебі – отбасы
Мақсаты: Бала тәрбиесіндегі ата - ананың алатын орнының ерекше екендігін түсіндіру. Жанұядағы ата - ана және бала арасындағы қарым - қатынасты нығайту. Ата - анаға деген бала махаббатын ояту. Мектеп, ұстаз, ата - ана бірлігін нығайту. Отбасы мүшелері арасындағы бауырмалдық. Қайырымдылық, достық қарым - қатынасты қалыптастыру, үлкенді сыйлауға, сыпайы, ілтипатты болуға тәрбиелеу.
Көрнекілігі: қанатты сөздер Ата көрген - оқ жонар, ана көрген - тон пішер , Ата – бәйтерек, бала - жапырағы , карточкалар.
Түрі: пікір талас.
Барысы:
І. Ұйымдастыру.
Сәлемдесу. Оқушыларды 4 топқа орналастыру.
Бүгін біз Тәрбие мектебі – отбасы тақырыбындағы тәрбие сағатында бала тәрбиесі, оның жан - жақты дамуы бағытында өз ойымызды ортаға салмақпыз. Отбасы – адам баласының түп қазығы, алтын ұясы. Адам баласы шыр етіп дүниеге келгеннен бастап, сол ортаның ыстық суығына бейімделіп, ықпалына көніп, осында ер жетеді. Әке шаңырақ иесі. Отбасы мүшелерінің жауапкершілігі толығымен ер - азаматқа жүктеледі. Әйел – отбасының ұйтқысы. Баланы өсіп тәрбиелеу - ата - ана міндеті. Бала әкеден ақыл, анадан мейірім алады. Тәртіпті де тәрбиелі ұрпақ тәрбиелеу – отбасы мен мектептен алған үлгі - өнеге жиынтығының жемісі. Бүгінгі сабақ сайыс түрінде өтеді.
І бөлім: Таныстыру.
Алтын ұя тобы, Берекелі отбасы тобы, Мерекелі отбасы тобы, Бақытты отбасы тобы.
- Алдымен топтың атын таныстырып мағлұмат береді.
ІІ бөлім. Білімдіге дүние жарық деп аталады. Мұнда топтың шапшандылығын, біліктілігін аңғарамыз. Ендеше викториналық сұрақтар беріледі.
І топ
1. Балдан тәтті не? ( бала)
2. Қара шаңырақ иесі кім? (кенже ұл)
3. Әкеден балаңа берілетін зат ( мұра)
4. Үйдегі алтын адам кім? (ана)
ІІ топ
1. Бес дұшпанды атаңдар? (өсек, өтірік, мақтаншақ, еріншек бекер мал шашпақ)
2. Ұл атадан көрмейінше сапар шекпес кімнің нақыл сөзі ( Қорқыт ата)
3. Жасөспірім бала неше жастан бастап қылмыстық жауапкершілікке тартылады?(14 жас)
4. Тәрбие мен білімнің ордасы (мектеп)
ІІІ топ
1. 18жасқа толмаған адам (бала)
2. Өзін - өзі тану бағдарламасының авторы кім? (С. Назарбаева)
3. Екі адамның бір - біріне деген адалдығы (достық)
4. Бес асылды атаңыз (талап, еңбек, терең ой, қанағат, рақым)
ІV топ
1. Үш арсызды ата? (ұйқы, тамақ, күлкі)
2. Мемлекеттік рәміздерді ата (елтаңба, ту, гимн)
3. 7 атаны ата (ата, әке, бала, немере, шөбере, шөпшек, немене)
Келесі ІІI бөлім Болашағымыз білімді жастардың қолында сурет салу байқауы.
4 топ суреттерін қорғайды.
Келесі ІV бөлім Тығырықтан шығу деп аталады. Мұнда жағдаяттық сауалдар беріледі. Өз пікірлеріңізді білдіресіздер.
1. Сенің өзіңнің жақын адал досың бар, бірақ онымен дос болуға ата - анаң қарсы. Сен не істейсің?
2. Көктем мезгілі. Жолдасың сабақ оқуын азайтып, сабақтан тыс нәрселерге көп көңіл бөлетіндіктен сабақ үлгерімі төмендеп кетті. Сен не істейсің?
3. Сенің сабақ үлгерімің орташа. Сыныптастарың сені білімің бойынша бағалап, адамгершілік қасиеттеріңді көре білмейді. Сен не істейсің?
4. Пән мұғалімдері сенің жауапкершілігіңді бағалап ертеңге бір жұмыс тапсырды. Белгілі себептермен сен ол жұмысты орындап бола алмадың, не істейсің?
Келесі бөліміміз V бөлім Тіл өнері мақал мәтелдің жалғасын табу. Яғни мұнда қай топ бірінші қол көтереді, сол топ жауап береді.
1. атаның баласы болма,............................. (халықтың баласы бол)
2. Ұяда не көрсең,....................................(ұшқанда соны ілерсің)
3. Балалы үй базар,..................................(баласыз үй қу мазар)
4. ата көрген оқ жонар,..........................(ана көрген тон пішер)
5. Ананың сүті – бал,................................(баланың тілі – бал)
6. Туған үйдің түтіні жылы,..............................(туған ананың күтімі жылы)
7. Анаңа ауыр сөз айтпа,...............................(артыңа ауыр жүк артпа)
8............. – ананың бауыр еті, көз нұры. (бала)
9. Әке – асқар тау,.............................(ана - шалқар көл)
10. Жеті атасын білмеген:................(жетесіз ),
Қорытындылау:
Жеңімпаз топты жариялау
▪ Әзілің жарасса, атаңмен ойна.
▪ Атаңа не қылсаң,
Алдыңа сол келер.
▪ Атадан жақсы ұл туса,
Есіктегі басын төрге сүйрер.
▪ Атадан жаман ұл туса,
Төрдегі басын жерге сүйрер.
▪ Атадан жақсы ұл туса,
Елінің қамын жейді.
Атадан жаман ұл туса,
Елінің малын жейді.
▪ Әкең өлсе өлсін,
Әкеңді көрген өлмесін.
▪ Балалы үйдің ұрлығы жатпас.
▪ Қарға баласын аппағым дейді,
Кірпі баласын жұмсағым дейді.
▪ Жалғыз баласы бардың
Шығар - шықпас жаны бар.
Екі баласы бардың,
Өкпе, бауыр, жалы бар.
Үш баласы бардың,
Бұқарада пұлы бар
Тәрбие мектебі – отбасы жүктеу