Танакөз Толқынқызының өлеңдері
Бәлкім
Бәлкім, менің болмысым
бөлек шығар?!
Ал, сен қалай ойлайсың,
зерек шынар?!
Бар - жоғыңды өмірде білу үшін
Әлдекімді сағыну
керек шығар?!
Сыр сақтауға үндемей
терек шыдар,
Жан іздедім жанымды
ерекше ұғар.
Біз жолықтық.
Маңдайға жазғаны – сол.
Өлең байғұс жай ғана
себеп шығар.
Көңіліңде бір бейне көлбеңдесе,
Өлең, шіркін, сөйлейді өлген кеше.
Сағынышты мен ойлап тапқан жоқпын
Сенем оны ғарыштан келген десе.
Сүюдің де бар болар заңдылығы.
Еркелесем, оятам таң күдігін.
Бал қылығым сор болды... кешір жырдың
Ешбір заңға бағынбас әңгүдігін.
Жан табылмай өмірде сұңғақ одан,
Қиялымды ақ бұлтқа бұлғап алам.
Алабұртып өмірден өту үшін
Көңіліңде жүрсін бір жұмбақ адам.
Танакөз Толқынқызының басқа өлеңдерін қарау