Тұманбай Молдағалиев өлеңі
Жаңа бата
Екі жастың әрқашан жолы болсын,
Жас өмір мерекеге толы болсын.
Соңынан екеуінің сәби ерсін,
Сәбиге берсін Дана тәрбиесін.
Ешқашан үйлерінен құт кетпесін,
Екеуді елі - жұрты құрметтесін.
Осы бір қол ұстасқан қалпыменен
Болашақ базарына бір беттесін.
Сыйласын халық атты қарындасын,
Меймандар үйлерінен арылмасын.
Жағалап жақсыларды жүрсін жастар
Бағалап іздеп келген бауырласын.
Ей, жастар, ертең сендер іргелі елсің,
Құдалар қуанышты бірге бөлсін.
Дайын боп бесік тойға қос құдағи
Тойдан соң жинап алсын бірден есін.
Қуаныш, шаттық елге ерер болсын,
Екі жас ен байлыққа егер болсын.
Келінді өз қызыңдай көргендерің
Құдайым тілегенін берер болсын.
Жақсылық екі жасты аяласын,
Келген күн жалғай берсін ай арасын.
Қыз жарын өз ұлындай көргендерден
Құдайым жақсылығын аямасын...
Тұманбай Молдағалиев басқа өлеңдері